Mahiła Staroha Ułasa ŭ Sužanach. Fota: fejsbuk
Zaniadbanuju mahiłu znajšli ŭ Sužanach (Sužionys) Vilenskaha rajona, pišuć u sacsietkach.
Stary Ułas, jon ža Uładzisłaŭ Sivy-Sivicki, naradziŭsia ŭ 1865 hodzie ŭ siamji vałožynskich sialan Piatra i Ludviki. Baćka pracavaŭ kucharam u miascovym majontku hrafa Michała Tyškieviča. Kali synu było ŭsiaho dzieviać hadoŭ, baćka pamior, tym ža letam nie stała i maci. Siratu zabrała ciotka.
Stary Ułas i rukapis jahonaha vierša. Fota: Wikimedia Commons
Nieŭzabavie Uładzisłaŭ pajšoŭ u pamočniki da kuchara taho ž hrafa Tyškieviča. Praź niekatory čas jon sam staŭ hrafskim kucharam, a zatym, kali jamu było kala tryccaci, staŭ abjezdčykam i, urešcie, laśničym u majontku Sužany na Vilenščynie. Žyŭ u vioscy Varniany Astravieckaha rajona, u Vilni.
Z 1907 hoda drukavaŭsia ŭ «Našaj Nivie», potym u zachodniebiełaruskich vydańniach. U biełaruskich kalendarach źmiaščaŭ vieršy i vieršavanyja apaviadańni. Vystupaŭ i jak publicyst.
U 1908 hodzie ŭ redakcyi «Našaj Nivy» paet paznajomiŭ Janku Kupału z nastaŭnicaj Uładzisłavaj Francaŭnaj Stankievič, jakaja stanie žonkaj kłasika.
Mahiła Staroha Ułasa i jaje raźmiaščeńnie na schiemie na mohiłkach u Sužanach. Fota: fejsbuk
U 1910-m zasnavaŭ škołu piśmiennaści, u jakoj razam sa svaimi dočkami vučyŭ dziaciej hramacie. Svojeasablivym letapisam pracy i pobytu sialanstva źjaŭlajecca paema «Hod biełarusa» (1911).
Maksim Harecki tak pisaŭ pra Staroha Ułasa: «Takija paety majuć u našaj paezii litaralna maralnaje značeńnie jak pieśniary z mazolnaju rukoj, što nie tolki «z narodu», ale i «sam narod». Jaho tvory časam nie vielmi składnyja, ale čujecca ŭ ich siła samaje ziamli, niepasredny pavieŭ samoha žyćcia biełaruskaj vioski. Jany — naturalny adrostak narodnaj paezii, kazak i hutarak, lehiendaŭ i žartaŭ».
Za polskim časam u 1920 hodzie Sivy-Sivicki pierajechaŭ u viosku Sužany, a paźniej u Šašelhiški Vilenskaha pavieta, dzie zajmaŭsia ziemlarobstvam. Pamior nieŭzabavie paśla pačatku Druhoj suśvietnaj vajny, 30 vieraśnia 1939 hoda ŭ Vilni.
Miesca, dzie kaliści stajała chata Staroha Ułasa ŭ vioscy Šašelhiški, u jakoj toj pražyŭ da samaj svajoj śmierci, i nadmahille ŭ Sužanach, jakoje dahladaŭ A. M. Kurčejka. Z knihi «Hod biełarusa»
Časta ŭ jakaści miesca apošniaha spačynu paeta nazyvaŭsia mienavita hety horad, choć u pryśviečanych jamu manahrafijach padavaŭsia navat fotazdymak mahiły ŭ Sužanach. Tym nie mienš dakładnaje miesca mahiły zabyłasia, a ludziej, jakija dahladali jahonuju mahiłu, nie zastałosia. Siońnia nadmahille słavutaha biełarusa patrabuje adnaŭleńnia.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Na vilenskich mohiłkach Rosy ŭšanavali Kalinoŭskaha i paŭstancaŭ. Padniali i biełaruski ściah FOTY
