Fota: vecteezy
Kali ŭ vas jość vostraja nieabchodnaść pamyć džynsy, to hienieralny dyrektar Levi Strauss Čyp Bierh (Chip Bergh) raić spažyŭcam prymać duš nie zdymajučy ich ci jašče lepš — abmiežavacca tolki miascovaj čystkaj. Bierh miarkuje, što paźbiahańnie vykarystańnia pralnaj mašyny nie tolki pryniasie karyść navakolnamu asiarodździu, ale i pradoŭžyć termin słužby vašych džynsaŭ.
Spadar Bierh kaža, što na vytvorčaść džynsaŭ idzie tona vady, pałova jakoj vykarystoŭvajecca ŭ čas vyroščvańnia bavoŭny, a druhaja pałova — spažyŭcami, jakija kidajuć svaje džynsy ŭ pralnuju mašynu. Tamu kali jon pralje što-niebudź na džynsy, to zamiest pralnaj mašyny jon čyścić heta miesca ŭručnuju. Ale kali patrebna bolš dbajnaja čystka, to jon myje ich pad dušam.
Heta značyć, što nieabchodna iści ŭ duš u džynsach i myć ich z myłam hetak ža, jak vy myjecie cieła, ale tolki kali jany majuć sapraŭdy ŭžo «ahidny» vyhlad. Bierh śćviardžaje, što ŭ toj čas jak ludzi, naprykład, u ZŠA rehularna myjuć džynsy, u inšych rehijonach śvietu ich nie myjuć hadami, što, biezumoŭna, lepš dla navakolnaha asiarodździa.
Daśledavańni pakazvajuć, što zabrudžvańnie ad džynsavaj tkaniny całkam realnaje i adbyvajecca prosta ciapier. Tak, navukoŭcy paviedamlajuć, što mikravałokny vyciakajuć z pralnych mašyn u reki, aziory i akijany pa ŭsim śviecie. Daśledčyki jašče nie viedajuć, nakolki drenna heta ŭpłyvaje na dzikuju pryrodu i navakolnaje asiarodździe. Aŭtary daśledavańnia, apublikavanaha ŭ Environmental Science and Technology Letters kažuć, što, niahledziačy na toje, što denim zrobleny z naturalnaha materyjału (bavoŭny), jon utrymlivaje chimikaty.
Niahledziačy na toje, što daśledavańni paćviardžajuć arhumienty spadara Bierha suprać myćcia vašych brudnych džynsaŭ u pralnaj mašynie, heta nie admianiaje taho fakta, što bakteryi buduć praciahvać žyć na džynsach navat paśla dušu. Bierh prapanuje zamarozić džynsy, kab pazbavicca pachu i źniščyć bakteryi, ale nie ŭsie zhadžajucca, što heta dapamoža.
Gizmodo cytuje Styviena Krejha Kery, ekśpierta pa zamarožanych mikrobach z University of Delaware: «Možna padumać, što kali tempieratura apuścicca značna nižej za tempieraturu čałaviečaha cieła, jany nie vyžyvuć, ale na samaj spravie mnohija vyžyvuć. Mnohija ź ich prystasavanyja da vyžyvańnia pry nizkich tempieraturach».
Ekśpiert prapanuje abo pavysić tempieraturu da 121°C minimum na 10 chvilin abo prosta pamyć ich. Kaniešnie, čym mienš vady vy vykarystajecie pry hetym, tym lepš. Tamu nastupny raz, kali budziecie kidać vašu paru džynsaŭ u košyk dla brudnaha adzieńnia, padumajcie jašče raz: moža, hetuju plamu možna admyć pry dapamozie zvyčajnaha myła i źmienšyć kolkaść vady i elektryčnaści, jakaja budzie vykarystanaja padčas myćcia. Tak vy dapamožacie źbierahčy navakolnaje asiarodździe.
Čytajcie taksama:
Zvyčki, jakija psujuć pralnuju mašynu i adzieńnie
Branzalety smart-hadzińnikaŭ zaražanyja vielizarnaj kolkaściu škodnych bakteryj — daśledavańnie
