Fota manunitedcore.com
16 červienia zbornaja Uelsa vyjhrała ź likam 2:0 u kamandy Turcyi. Abodva halavyja pasy addaŭ Haret Bejł — lidar kamandy, hulec anhlijskaha «Totenchema» i viadomy fanat holfa. Jaho zachapleńnie hetym vidam sportu dasiahaje takich maštabaŭ, što časam navat vyklikaje abureńnie futbolnych fanataŭ — maŭlaŭ, holf — heta cudoŭna, ale my čakajem ad Bejła bolš futbolnych pośpiechaŭ.
Ale nie mienš cikavy i Aaran Remzi, paŭabaronca valijskaj zbornaj i italjanskaha «Juvientusa», jaki zabiŭ siońnia pieršy z dvuch hałoŭ svajoj nacyjanałki. Hety 30-hadovy futbalist niekali moh pajści pa inšym šlachu, naprykład vybrać dla siabie rehbi, a nie futboł. U haradku Kajrfili, dzie Remzi pravioŭ rańniaje dziacinstva, jon i pačaŭ zajmacca sportam. Mabyć, paŭpłyvali baćkoŭskija hieny: maci Aarana hulała ŭ chakiej, a baćka da ŭzrostu 40 hadoŭ hulaŭ za miascovyja futbolnyja kamandy.
Kali chłopčyku było dzieviać, jon kančatkova admoviŭsia ad dziciačaha zachapleńnia rehbi i piaciborjem na karyść futboła. Remzi ŭziali ŭ dziciačuju kamandu najlepšaha valijskaha kłuba «Kardyf Sici», i paźniej, va ŭzroście 16 hadoŭ, jon zrabiŭsia samym maładym hulcom u darosłaj kamandzie kłuba.
Fota liverampup.com
Z 2008 da 2019 hoda Remzi vystupaŭ za łondanski «Arsienał». U hety čas ź im zdaryłasia surjoznaja traŭma, paśla jakoj hulec adnaŭlaŭsia niekalki hadoŭ i byŭ nakiravany hulać u arendzie ŭ inšych kamandach, u tym liku u rodnym «Kardyf Sici».
U lutym 2010 hoda «Arsienał» hulaŭ u anhlijskim čempijanacie z «Stok Sici», i hety matč skončyŭsia dla Remzi dvajnym adkrytym pierałomam nahi. Pryčyna — sutyknieńnie z abaroncam supiernikaŭ Rajanam Šoŭkrasam. Było nieviadoma, ci vierniecca Remzi na minuły ŭzrovień i ci zdoleje jon uvohule paśla takoj surjoznaj traŭmy hulać u futboł. Adnak mocnaja vola i padtrymka treniera «Arsienała» Arsena Vienhiera pastupova viarnuli jaho ŭ stroj za dzieviać miesiacaŭ.
Praź niekalki hadoŭ Remzi ŭžo ličyli adnym z najlepšych paŭabaroncaŭ Jeŭropy. Ale sapraŭdny pośpiech napatkaŭ jaho na čempijanacie Jeŭropy — 2016, dzie ŭ źviazcy z Džo Alenam i Haretam Bejłam Remzi pakazaŭ cudoŭnuju hulniu. U vyniku Uels dajšoŭ da paŭfinała turnira, dzie sastupiŭ budučym pieramožcam čempijanatu — partuhalcam. U Kardyfie valijskich futbalistaŭ sustrakali jak nacyjanalnych hierojeŭ.
Siužet pra sustreču valijskaj futbolnaj nacyjanałki paśla Jeŭra-2016
Historyja Remzi, kaniešnie, mocnaja, ale jon bolš viadomy praź inšaje. Kažuć, što kali Aaran zabivaje hoł, pamiraje niechta viadomy, i takich prykładaŭ užo kala dvuch dziesiatkaŭ.
Heta pačałosia ŭ 2009 hodzie. Remzi adznačyŭsia hołam u matčy z «Portsmutam», a praz try dni pamior viadomy amierykanski sienatar Edvard Kienedzi, małodšy brat amierykanskaha prezidenta Džona Kienedzi. Praz dva hady Remzi zabiŭ «Mančester Junajted», a na nastupny dzień stała viadoma pra zabojstva, jak tady kazali, terarysta №1 — Usamy bien Ładena. Praz try dni paśla hołu «Totenchemu» źjaviłasia navina pra śmierć Styva Džobsa, a na nastupny dzień paśla hołu ŭ varoty «Marselu» byŭ zabity Muamar Kadafi.
Voś tolki niekatoryja ź inšych ludziej, što pamirali paśla hałoŭ Remzi: śpiavačka Uitni Chjustan, akciory Robin Uiljams, Ałan Rykman i Poł Uokier, piśmieńnik Hiunter Hras, navukoviec Styvien Chokinh i byłaja pieršaja łedzi ZŠA Nensi Rejhan.
Fota justarsenal.com
Tym nie mienš, zusim nie zaŭsiody paśla hołu Remzi źjaŭlajecca navina pra śmierć kahości viadomaha. Paru hadoŭ tamu žurnalisty padličyli, što pra śmierć znakamitaści viadoma tolki paśla 25% hałoŭ valijca. Adnak brytanskija fanaty ŭžo ŭspomnili pra praklon Remzi, i zaraz pa tehu #Ramseycurse ŭ Tvitary možna znajści roznyja viersii taho, chto ž stanie novaj «achviaraj» valijca.
Sam Remzi stavicca da historyi z praklonam z humaram i kaža, što jon usio ž taki «zabiŭ» niekatorych «drennych chłopcaŭ» — maje na ŭvazie bien Ładena i Kadafi. U jaho dobry imidž, i lahčej pačuć pra dabračynnyja akcyi z udziełam Remzi, čym pra skandały. U minułym hodzie, naprykład, valijec pieraličyŭ 10 tysiač funtaŭ brytanskaj Nacyjanalnaj słužbie achovy zdaroŭja, a praź niejki čas padtrymaŭ centr dapamohi biazdomnym u valijskim Ńjuparcie.
