Pierad pačatkam sustrečy Džo Bajdena i Uładzimira Pucina ŭ Ženievie. Fota Rojterz.
Upieršyniu biełaruskaje pytańnie — u paradku dnia pieramoŭ kiraŭnikoŭ ZŠA i Rasii.
Dobra heta ci kiepska? Mnohija pamiatajuć ab pryncypie «nic o nas bez nas» («ničoha pra nas biez nas»), datrymańnia jakoha doŭha — i časam biespaśpiachova — dabivalisia ad Zachadu palaki.
U našym vypadku, što Biełaruś abmiarkoŭvajuć — vydatna. Taho, čaho niama, nie abmiarkoŭvajuć. My ŭžo jość.
Kali b za adzin stoł z pradstaŭnikami Rasii i Zachadu sieli Łukašenka i Cichanoŭskaja — było b jašče lepš. Pakul heta nierealna, ale ci dumali my dva hady nazad, što padziei 2020-ha zdaracca?
Pamiatajecie, jak Anton Łuckievič niaŭdała prabivaŭsia na Viersalskuju kanfierencyju? Biełarusaŭ doŭha nie razhladali jak asobny subjekt. 2020 staŭ hodam, kali naša nacyja kančatkova vyjšła na histaryčnuju arenu. «My ŭśviadomili siabie nacyjaj», jak skazała Śviatłana Aleksijevič.
Ciapier biełaruskaje pytańnie było na stale ŭ G-7, Biełaruś stała hałaŭnym bolem Jeŭrasajuza. Pryčym vyznačać palityku Zachadu pa biełaruskim pytańni buduć pieradusim krainy-susiedki — Polšča, Litva — užo ciapier heta adbyvajecca, a z časam budzie tolki ŭzmacniacca pa miery rostu ekanamičnaj i palityčnaj vahi Uschodniaj Jeŭropy. Miž tym u nacyjanalnym intaresie susiednich krain, u tym liku i Ukrainy — umacavańnie niezaležnaści Biełarusi i jaje ekanamičnaj mocy. Im treba mocny, stabilny i suvierenny susied. Pierad samitam Bajden havaryŭ z Dudam, Naŭsiedam, Levitsam i Kaljułajd. ZŠA ŭsio bolš kancentrujucca na Kitai, tam hałoŭny vyklik zachodnim demakratyjam u XXI stahodździ. A stratehija pa Biełarusi budzie farmulavacca ŭ tych stalicach aljansu, jakija majuć tut najbolšyja intaresy.
Niekatoryja pramaliniejna pieranosiać strachi 1921-ha (Ryžskaja damova), 1938-ha (Miunchien i pakt Mołatava-Rybientropa) na abmierkavańnie biełaruskaha pytańnia miž Zachadam i Rasijaj. Pamyłka. Trahiedyjaj narodaŭ Uschodniaj Jeŭropy ŭ 1930-ch było apynucca miž dvuma tatalitarnymi monstrami. Mołatavy jość i ciapier, rybientropaŭ niama.
Biełaruś na paradku dnia ŭ Ženievie — heta ŭ našym vypadku značyć, što hołas biełarusaŭ pačuty i maje značeńnie. Užo maje.
Biełaruś jašče hołaja i bosaja, zaviedzienaja ŭ tatalnuju ekanamičnuju i siłavuju zaležnaść ad Maskvy. Ale sam fakt abmierkavańnia našaha pytańnia aznačaje sihnał Maskvie — Biełaruś nie vaša. Jana — asobnaje cieła.
