U milicyju źviarnułasia 35-hadovaja žančyna. Jana raspaviała, što 39-hadovaja znajomaja nie viartaje 40 tysiač dalaraŭ, jakija ŭziała ŭ doŭh dla raźvićcia biznesu.
Vyśvietliłasia, što daŭžnica prydumała kamiercyju pa prodažy darahich futraŭ, ale patraciła ŭsie hrošy na ŭłasnyja patreby (restarany, adzieńnie, juvielirnyja rečy, turystyčnyja pajezdki i inšaje).
Jašče čatyry čałavieki kupilisia na historyju z nabyćciom ziamielnaha ŭčastka i pazbavilisia 20 tysiač dalaraŭ. Taksama žančynie ŭdałosia trojčy pradać kanfiskavany za sistematyčnuju niavypłatu lizinhavych płaciažoŭ Mercedes-Benz S-kłasa.
Samym bujnym akazaŭsia padman 30-hadovaha minčuka, jaki pradaŭ atrymany ŭ spadčynu budaŭničy biznes i ŭsie hrošy pazyčyŭ znajomaj. Bolš taho, kab dapamahčy joj, mužčyna sam braŭ pazyku. Usiaho jon pieradaŭ kala 500 tysiač dalaraŭ.
Viadoma, što žančyna ŭvachodziła ŭ davier da svaich kredytoraŭ taksama praz padman. Arhanizoŭvała im typovyja kansultacyi ź finansavymi rabotnikami, daktarami i jurystami pad vyhladam ekskluziŭnych pasłuh, paśla čaho prasiła ŭ doŭh.
Pakul ustanoŭlena bolš za dziesiać paciarpiełych, u jakich žančyna vymaniła kala 750 tysiač dalaraŭ.
Jana zajmałasia takim «biznesam» z 2017 hoda z dapamohaj svajakoŭ i znajomych, jakija hrali rolu słužbovych asob roznych arhanizacyj. Ciapier vyśviatlajucca dadatkovyja epizody.
