Luboŭ Ziamcova — adna z samych talenavitych biełaruskich dakumientalistak novaj płyni. Skončyła Biełaruskuju akademiju mastactvaŭ (kurs Michaiła Ždanoŭskaha) i kurs dakumientalnaha kino Doc Pro ŭ Škole Vajdy (Varšava), udzielničała i była adznačanaja na mižnarodnych kinafiestyvalach. Trahična zahinuła ŭ mai 2020 hoda ŭ aŭtakatastrofie, jakaja taksama zabrała žyćci jaje siabroŭ i kalehaŭ — pradziusara Uładzimira Michajłoŭskaha i hukarežysiora Maksima Haŭrylenki.
Za tydzień u miežach čaćviortaha anłajn-fiestyvalu biełaruskaha dakumientalnaha kino BelarusDocs možna budzie ŭbačyć siem admietnych filmaŭ pra biełaruskuju rečaisnaść. Kožny ź filmaŭ prahramy budzie dastupny dla anłajn-prahladu z anhlijskimi subcitrami ŭ luboj kropcy śvietu na sajcie belarusdocs.com.
Sioleta akcent u prahramie fiestyvalu zrobleny na raznastajnaści formaŭ dakumientalnaha kino, a tematyčna — na pytańniach pravoŭ čałavieka. U pryvatnaści, hledačy zmohuć ubačyć filmy, pryśviečanyja prablemam chatniaha hvałtu («Dobrych dziaŭčynak nie bjuć»), źniavoleńnia za «niezakonny abarot narkatyčnych srodkaŭ» («Pakaleńnie 328»), prezidenckim vybaram-2020 u Biełarusi («Maršrut pierabudavany»). Taksama ŭ prahramie — film pra žyćcio šmatdzietnaj siamji na terytoryi, zabrudžanaj Čarnobylem («Nieviadomy raj»), antrapałahičnaje kino «Novaje nieba nad novaj krainaj» pra śviatkavańnie Kupalla, arhanizavanaje mastakom Alesiem Puškinym, fiłasofski film-ese «Miežy» i dakumientalnaja love-story u zdavałasia b nieprydatnych dla vysokich pačućciaŭ dekaracyjach — «Miesca kachańnia».
Charakterna, što 6 z 7 filmaŭ prahramy źniali žančyny-režysiorki. I baluča, što dvoje z maładych dakumientalistak — Luba Ziamcova i Vieranika Nikanava zahinuli ŭ trahičnych abstavinach u minułym i pazaminułym hadach.
Adznačym taksama, što BelarusDocs — heta kinafiestyval, na jakim kožny hladač moža stać siabram žury. Dla hetaha dastatkova zapoŭnić admysłovuju ankietu na sajcie, pahladzieć usie filmy prahramy i acanić ich.
