Jaho vinavacili pa č. 2 art. 293 KK (Udzieł u masavych biesparadkach) i pa č. 1 i 3 art. 328 KK (Zachoŭvańnie i zbyt narkotykaŭ).
Sudździa Dźmitryj Łukaševič prysudziŭ jamu 9 hadoŭ pazbaŭleńnia voli z adbyćciom pakarańnia ŭ kałonii ŭzmocnienaha režymu, a taksama štraf u pamiery 300 bazavych vieličyń (8700 rubloŭ), paviedamlajuć pravaabaroncy.
Siarhiej Sikorski ŭ sudzie
Da zatrymańnia Siarhiej Sikorski pracavaŭ pamočnikam kiraŭnika adnoj sa staličnych arhanizacyj. U jaho čaćviora dziaciej, małodšaj dačce 4 hady.
11 žniŭnia Siarhiej razam z žonkaj i siabrami vyjšaŭ na akcyju pratestu ŭ rajonie stancyi mietro «Piatroŭščyna». Paśla taho jak tudy pryjechaŭ AMAP i pačalisia zatrymańni, u aŭtobus siłavikoŭ palacieli kamiani i inšyja pradmiety. Niekalkich udzielnikaŭ tych padziej paźniej apaznali pa fota i videa i zaviali na ich kryminalnuju spravu ab udziele ŭ masavych biesparadkach. Siarhiej byŭ siarod ich.
U vieraśni jaho zatrymali doma. Zhodna z pratakołam ahladu, u momant zatrymańnia jon znachodziŭsia ŭ stanie, vyklikanym spažyvańniem psichatropnych rečyvaŭ, u jaho arhaniźmie byŭ vyjaŭleny miefiedron. Padčas pieratrusu ŭ kvatery pravaachoŭniki znajšli paraškapadobnaje rečyva. Paźniej śledčyja pryjšli da vysnovy, što Sikorski taksama zbyŭ takoje rečyva 46-hadovaj žycharcy Mahilova.
Pavodle abvinavačvańnia, Siarhiej Sikorski 11 žniŭnia ŭziaŭ udzieł u niesankcyjanavanaj akcyi, «kidaŭ kamiani i inšyja pradmiety ŭ pravaachoŭnikaŭ, nanosiŭ im udary pa roznych častkach cieła, a taksama paškodziŭ słužbovy aŭtobus».
Padčas dopytu abvinavačany raspavioŭ, što ŭ toj viečar damoviŭsia ź siabrami i jany vyrašyli pajści da «Makdonaldsa». Pa darozie zrabili fota, uziaŭšy ŭ inšych ludziej ściah i płakat. Praź niekatory čas spyniłasia aŭto, adtul vyjšła žančyna i skazała ŭsim prysutnym, što ŭ ich bok jeduć try aŭtobusy ź milicyjaj i što treba ŭsim razychodzicca. Tamu, pa słovach Sikorskaha, jany raźviarnulisia i pajšli nazad, u bok doma. Zatym jany ŭbačyli, što na supraćlehłym baku vulicy padjechaŭ aŭtobus, ź jaho vyskačyli supracoŭniki, pačali bić ludziej dubinkami i zakidvać u aŭtobus.
«Kali ŭbačyŭ, što natreniravanyja ludzi pačali pavodzić siabie tak z moładździu, jakaja ničoha nie ździajśniała, to kinuŭsia da aŭtobusa. Bo nijakich masavych biesparadkaŭ nie było, a ŭsiu situacyju spravakavali supracoŭniki, pačaŭšy zatrymańni. Pačakaŭ zialonaha sihnału śviatłafora, pierabieh vulicu. Da taho času aŭtobus užo pačynaŭ ruch, bo ŭ bok supracoŭnikaŭ palacieli kamiani i butelki. Zadniaje škło aŭtobusa ŭžo było raźbitaje. Ja taksama ŭdaryŭ pa škle, i jano rassypałasia».
Sikorski patłumačyŭ, što pieršapačatkova jon chacieŭ praduchilić zatrymańni abo jak-niebudź damovicca. Pry hetym jaho achapiła pačućcio niespraviadlivaści. 9 žniŭnia, znachodziačysia na pracy, bačyŭ, jak žorstka zatrymlivali ludziej. Da hetych padziej, pa jaho słovach, jon byŭ apalityčny.
Słovy Siarhieja ab tym, što akcyja była mirnaja i biesparadkaŭ da źjaŭleńnia supracoŭnikaŭ MUS i pačatku zatrymańniaŭ nie było, paćvierdzili jaho siabry, jakija vystupili śviedkami pa spravie.
Na sudzie byli prasłuchanyja zapisy telefonnych razmoŭ Sikorskaha, zroblenyja 11 žniŭnia. U razmovie ź siabrami jon užyvaŭ takija vyrazy, jak «idziom na barykady», «krychu pavajujem». Sikorski patłumačyŭ, heta było skazana ŭ žart. U hutarcy z byłoj žonkaj jon raspaviadaŭ pra toje, jak było vybitaje škło ŭ milicejskim aŭtobusie i što jon tady «ŭsimi kamandavaŭ». Pa słovach abvinavačanaha, tady jon značna pierabolšvaŭ padziei.
Paciarpiełymi pa spravie byli pryznanyja milicyjanty RUUS Maskoŭskaha rajona Uładzisłaŭ Dubkoŭ i Illa Šalik. Taksama jany vystupali ŭ jakaści paciarpiełych na sudzie pa spravie palitviaźnia Ivana Dacyšyna, jaki ŭ vyniku atrymaŭ 4 hady kałonii ŭzmocnienaha režymu.
Uładzimir Dubkoŭ padčas dopytu raspavioŭ, što 11 žniŭnia atrymaŭ paškodžańni, kali sprabavaŭ zatrymać hramadzianina kala milicejskaha aŭtobusa: «Ja ŭziaŭsia za jaho majku, i ŭ hety momant jon nanios mnie niekalki ŭdaraŭ pa ruce. Zatym ja adčuŭ rezki bol va ŭkazalnym palcy na levaj ruce.
Ja pavioŭ hetaha hramadzianina ŭ aŭtobus, ale pačali lacieć kamiani, i heta pieraškodziła zatrymać hramadzianina, jon vyrvaŭsia. Što heta byŭ za čałaviek, ja nie zapomniŭ. Taksama adčuŭ, što pa pravaj haloncy trapiŭ niejki pradmiet, adčuŭ rezki bol. Dla svajho vyratavańnia pabieh u aŭtobus. Zabiehšy, ubačyli, jak u aŭtobusie pačali bić šyby. Prajazdžali mašyny, zabłakavali ruch, nie daŭšy mahčymaści vyjechać».
Na nastupny dzień Dubkoŭ źviarnuŭsia ŭ palikliniku MUS, dzie jamu pastavili dyjahnaz «pierałom pieršaj fałanhi levaha ŭkazalnaha palca». Na balničnym, pa jaho słovach, jon byŭ 30 sutak.
Siarhiej Sikorski prynios Dubkovu prabačeńni, kali ŭ vyniku mienavita jaho dziejańniaŭ była pryčynienaja fizičnaja škoda.
Druhi paciarpieły Illa Šalik raspavioŭ, što ŭ toj dzień niejki čałaviek udaryŭ jaho armiejskaj dziahaj u padbarodździe. Šalik skazaŭ, što ad udaru raskryšyŭsia zub i paciakła kroŭ. Taho čałavieka zatrymać nie ŭdałosia. Pa słovach Šalika, jon nie byŭ padobny da Sikorskaha.
Taksama byli zasłuchanyja pakazańni kapitana milicyi Mikałaja Zielankoŭskaha, jakija byli padobnyja da pakazańniaŭ Dubkova i Šalika.
Častka sudovych pasiadžeńniaŭ była pryśviečana raźbiralnictvu pa spravie ab narkotykach. 7 vieraśnia, kali apieratyŭniki pryjšli ź pieratrusam u dom Sikorskaha, na stale jany vyjavili reštki psichatropnaha rečyva — para-mieciłefiedrona (miefiedrona).
U kryvi Sikorskaha taksama byŭ znojdzieny narkotyk. Zatym śledstva ŭstanaviła, što Sikorski letam pierapradaŭ častku narkatyčnaha rečyva (pa jaho słovach, reštki) siabroŭcy žonki, što i lahło ŭ asnovu abvinavačvańnia za zbyt narkatyčnaha rečyva.
Na sudzie Sikorski kazaŭ, što zaležnaści ad narkotykaŭ u jaho niama, užyvaŭ vielmi redka — dla źniaćcia stresu.
U jakaści śviedak pa dadzienaj spravie vystupili žančyny, jakija nabyvali rečyva ŭ Sikorskaha. Adna ź ich znachodzicca pad vartaj taksama pavodle č. 3 art. 328 Kryminalnaha kodeksa.
«Režuć słych frazy, što ja niepavahu akazvaŭ da hramadstva, hučna plaskajučy i vykrykvajučy łozunhi. Kali pahladzieć, to na toj momant jakraz usio hramadstva i znachodziłasia na vulicy. Na praśpiekcie Dziaržynskaha było vielmi šmat ludziej. Roznych słajoŭ nasielnictva, uzrostavych hrup, sacyjalnaha statusu», — skazaŭ Sikorski ŭ apošnim słovie.
Dziaržabvinavaŭca paprasiŭ sud prysudzić Sikorskamu 10 hadoŭ kałonii ŭzmocnienaha režymu i štraf 300 bazavych vieličyń. Sudździa Łukaševič daŭ na hod mienš.
