Fota pixabay.com
Źniešniaja maładość — jakaść, jakuju ceniać amal u kožnaj śfiery žyćcia. Ale na pracy da maładych ludziej zvyčajna staviacca nie tak dobra. Niama dakładnaj statystyki na hety kont, ale ŭ siecivie chapaje asobnych historyj pra nieparazumieńni i navat ckavańnie takich supracoŭnikaŭ, piša VVS.
Źjaŭlajecca ŭsio bolš dokazaŭ taho, što małady vyhlad nie tolki stvaraje niazručnaści. Takaja źniešnaść taksama moža radykalna paŭpłyvać na toje, nakolki kampietentnym vas buduć ličyć, i navat vyznačyć, jakija kankretna zadačy vy budziecie vykonvać u pieršy čas pracy na novym miescy. Naprykład, takich ludziej chutčej pryznačać na miescy, dzie patrebnyja kłopat i ŭvaha da inšych, ale im ź mienšaj imaviernaściu prapanujuć pracavać na dziaržaŭnych pasadach.
U hetaha jość niekalki pryčyn, ale, napeŭna, hałoŭnaja ź ich — tak zvany efiekt lalečnaha tvaru. Jon aznačaje, što ludzi schilnyja ličyć, što kali ŭ čałavieka dziciačyja rysy tvaru, to jon maje adpaviedny niastały charaktar. Ale ŭ takoj źniešnaści jość i svaje plusy, bo ludzi zvyčajna žadajuć abaraniać tych, chto maje takija rysy. Taksama ludzi, źniešnie maładziejšyja za svoj uzrost, ličacca bolš pryvabnymi.
U asnoŭnym pad dziciačymi rysami razumiejuć kruhły tvar, maleńkuju skivicu, nos huzikam i vialikija vyraznyja vočy. Cikava, što nie važna, kolki nasamreč hadoŭ čałavieku z hetymi rysami. Efiekt lalečnaha tvaru spracoŭvaje, kali taki čałaviek vyhladaje maładziejšym za ludziej svajho ŭzrostu.
Ad ludziej ź dziciačymi rysami tvaru časta čakajuć, što im nie budzie chapać važnych dla karjernaha rostu rysaŭ charaktaru ci što jany buduć zusim niazdolnyja pracavać u niejkich śfierach. Takich ludziej ličać tymi, kamu ŭ paraŭnańni ź inšymi nie chapaje kantrolu nad saboj — naprykład, kampietentnaści ci zdolnaści dasiahać svaich metaŭ.
Jak ža pieraadoleć hetuju dyskryminacyju? Samaje prostaje, što možna zrabić, — heta niejak źmianić źniešni vyhlad. Naprykład, žančyny va ŭzroście trochi za 20 vyhladajuć starejšymi, kali nanosiać makijaž, chacia z bolš stałymi žančynami heta čamuści nie pracuje. Akramia makijažu, dapamahaje našeńnie štanoŭ zamiest sukienak ci spadnic i kaštoŭnych upryhažeńniaŭ. Mužčynam ža varta pasprabavać našeńnie barady.
Ale možna i prosta źmianić staŭleńnie da prablemy. Varta zrazumieć, adkul u kožnaha kankretnaha čałavieka biarecca tryvoha, źviazanaja z tym, nakolki kampietentnymi jany vyhladajuć, i pačać pracavać nad upeŭnienaściu i samaacenkaj. Kali čałaviek budzie vyłučać upeŭnienaść, inšyja aŭtamatyčna pačnuć ličyć jaho bolš kampietentnym.
