25 krasavika alimpijski pryzior lohkaatlet Andrej Kraŭčanka abviaściŭ 10-dzionnuju haładoŭku ŭ znak salidarnaści z palitviaźniami. Termin haładoŭki vyznačany nievypadkova — stolki dzion jon razam z baksioram Ivanam Haninym pravioŭ u Žodzinskaj turmie ŭ listapadzie 2020-ha. Užo ŭ pieršyja dni paśla pačatku akcyi Kraŭčanka skinuŭ amal piać kiłahramaŭ, ale trymaŭsia ŭpeŭniena, treniravaŭsia i byŭ pierakanany, što ŭsio nie darma.
Pieršyja dni spartoviec navat treniravaŭsia, kab adahnać dumki pra ježu. Ale paśla pačaŭ hublać prytomnaść, z nosa išła kroŭ, źjaviłasia słabaść i hałavakružeńnie. 5 maja Kraŭčanka zaviaršaje 10-dzionnuju haładoŭku.
Jon raskazaŭ, što samymi ciažkimi byli 9-ja sutki. Adzin raz, rezka ŭstaŭšy, spartoviec źnieprytomnieŭ. Ale znajšoŭ siły admovicca ad prapanavanaj talerki supu.
Kraŭčanka ciaham 10 dzion piŭ tolki vadu i skinuŭ pa vyniku 11 kh. «Sam siabie bajusia», —žartuje jon.
«Paru razoŭ u Instagram napisali mnie, što ja zachacieŭ papijarycca, a zaadno i schudnieju. Blin, nafih mnie heta treba — tak ździekavacca ź siabie dziela pachudzieńnia? Jaki pijar moža być u haładoŭcy? Ale heta byli takija akaŭnty, u jakich 0 padpisčykaŭ, 0 pastoŭ. Pytalisia, navošta ja vystaŭlaju fota «da» i «paśla». Zrazumiejcie, ja chaču pakazać ludziam, što takoje haładoŭka. Ad ludziej, jakija siadziać u turmach, naohuł ničoha nie zastajecca. Ja naohuł nie razumieju, jak [palitviazień Ihar] Łosik haładaŭ 27 dzion. Što ad jaho zastałosia? Kali ja padaju na dziaviaty dzień, vyhladaju, jak dryšč, što ad Ihara zastałosia pa skančeńni amal miesiaca? Dumaju, jon chadziŭ pa rysie, byŭ na miažy žyćcia i śmierci», — skazaŭ siarebrany pryzior Alimpijskich hulniaŭ.
Z haładoŭki jon źbirajecca vychodzić ciaham 7 dzion i ad zaŭtra pačnie pić markoŭny sok.
Čytajcie taksama: «Za kratami siadziać sapraŭdnyja hieroi»: siarebrany pryzior Alimpijady Andrej Kraŭčanka abviaściŭ haładoŭku
