Ilustracyjnaje fota
Što zdaryłasia? Viasnoj 2019 hoda Nacbank užo ŭvodziŭ takuju zabaronu. Ale tady pradprymalnikam udałosia pravieści pieramovy i źmianić situacyju na svaju karyść. Pryniali pastanovu, jakaja zrabiła vyklučeńnie dla nievialikich ździełak: kali IP razava kuplaŭ za miažoj tavaru na sumu, nie bolšuju za 100 bazavych, to moh raźličvacca najaŭnymi.
U krasaviku 2021 hoda Saviet ministraŭ i Nacbank pryniali pastanovu №203/4, jakaja siarod inšaha admianiaje heta abmiežavańnie. To-bok pakupka pradprymalnikam tavaru za miažoj na lubuju sumu pavinna prachodzić pa bieznajaŭnym raźliku. Heta rašeńnie ŭstupaje ŭ siłu z 9 lipienia.
Staršynia abjadnańnia «Pierśpiektyva» Anatol Šumčanka tłumačyć, što bolšaść IP raźličvajucca najaŭnymi i nie zmohuć vykanać novyja ŭmovy. Asabliva pacierpiać pradprymalniki ŭ rajonach, jakija zakuplajuć tavar dla prodažu drobnymi partyjami: jany vymušany buduć uźvincić ceny.
«Kali jość firma, jakaja zajmajecca vialikimi pastaŭkami, to na ich kolkaść tavaru vydatki kładucca niaznačnyja — pracenty za pieravod, adkryćcio rachunku, padatki. A kali viazieš maleńkuju partyju, to hetyja vydatki časam roŭnyja koštu tavaraŭ i viaduć da padaražeńnia ŭ 100%. U Rasii nichto nie budzie pa bieznajaŭnym rachunku adpuskać piać koftačak ci piać par abutku».
Padčas epidemii karanavirusa pradprymalniki pracu nie spyniali, niahledziačy na zakryćcio miež. Jany nie mahli vyjechać sami, tamu zaklučali damovu z transpartnaj kampanijaj, zamaŭlali patrebnyja tavary, zamiežnyja partniory heta adhružali. Raźličvacca možna było najaŭnymi.
«Z novymi źmienami budzie hihanckimi tempami raźvivacca cieniavy siektar. U nas i tak ceny ŭvierch pajšli, ciapier jašče vyrastuć. My nakiravali zvarot u Saŭmin i Nacbank z prośbaj viarnuć staruju normu. Hatovy razmaŭlać na luboj dyjałohavaj placoŭcy», — kaža Anatol Šumčanka.
