Bolš za hod tamu «Svaboda» pisała pra vysialeńnie mienčuka Viesłava Miedanoŭskaha ź jaho pryvatnaha doma na zavułku Viljamsa, 13. Praz budoŭlu kompleksu Minsk World, jakuju razharnuła kampanija «Dana Astra» (uvachodzić u «Dana Chołdynhz»), dom Viesłava Miedanoŭskaha trapiŭ pad znos. Za dom jon atrymaŭ hrašovuju kampensacyju. Ale zhodna z ukazam Łukašenki №58, zamiest adabranaha ziamielnaha ŭčastka jamu musili dać biez čarhi i praviadzieńnia aŭkcyjonu raŭnaznačny ŭčastak dla budaŭnictva novaha doma.
Dla vyrašeńnia svajho pytańnia Viesłaŭ Miedanoŭski źviartaŭsia hod tamu da kiraŭnikoŭ Biełarusi i Serbii. Adnak adkazu ad ich nie atrymaŭ, i dahetul ułady nie pajšli nasustrač siamji Miedanoŭskaha.
Viesłaŭ Miedanoŭski pracuje vykładčykam u mienskim medyčnym kaledžy, jon vice-staršynia pčalarskich arhanizacyj Biełarusi BelApiUnion, prezydent Medyčnaj Palonii Miensku i Mienskaj vobłaści.
U 2011 hodzie jon kupiŭ pałovu pryvatnaha doma płoščaj 63 kvadratnyja metry, kab rekanstrujavać i žyć tam razam z dvuma synami. Kali kuplaŭ dom, jamu kazali, što jaho možna rekanstrujavać. Ale paźniej jamu admovili ŭ rekanstrukcyi, bo ŭsio vyrašyli znosić dziela budoŭli. Tady jašče było nieviadoma, što buduć budavać, a aeraport jašče dziejničaŭ. Viesłaŭ Miedanoŭski źviarnuŭsia da ŭładaŭ, kab jamu dali mahčymaść pabudavać dom u Miensku naŭzamien taho, jaki źniasuć. Adnak učastku ŭ Miensku ŭłady nie dali. Miančuk pahadziŭsia na ŭčastak z kamunikacyjami ŭ Mienskim rajonie, adnak vyśvietliłasia, što jany vydajucca tolki pa vynikach aŭkcyjonaŭ.
«Atrymlivajecca, my budziem biazdomnymi»
Viesłaŭ Miedanoŭski pabyvaŭ na pryjomie ŭ staršyni Mienharvykankamu Ŭładzimiera Kucharava.
«Byŭ jon, pamočnik prezydenta pry Mienharvykankamie i pradstaŭnik architekturnaha adździeła. Była cikavaja ich reakcyja: jany viedajuć, što tut ziamla budzie adviedziena pad katedžy. Ja ŭžo nie prašu ŭčastak u Miensku, niachaj mnie daduć u rajonie, — kaža Viesłaŭ. — Pierad hetym ja znajšoŭ dva ŭčastki ŭ Tarasavie i im dasłaŭ prapanovy. Na heta Kucharaŭ mnie adkazaŭ, što hetyja ŭčastki vystaŭlenyja na aŭkcyjon. Maŭlaŭ, treba było vybrać kvateru i žyli b ciapier z kamfortam. To-bok jon vyrašaje za mianie, jakoje žyllo patrebna majoj siamji!»
Pa słovach Miedanoŭskaha, kiraŭnik Mienharvykankamu paviedamiŭ, što jaho vysielać da 1 červienia.
«Ja prasiŭ u Kucharava dazvołu, kab ad jaho imia źviartacca ŭ sielsaviety z prośbaj pieravieści dla mianie ŭčastak, jaki vystaŭlajecca na aŭkcyjon. Kankretnaha adkazu ja nie atrymaŭ, — kaža Viesłaŭ. — Tamu nas buduć znosić, ale ja trymajusia dahetul. Ja viedaju, što, jak tolki źniasuć moj dom, to jany tym bolš nie daduć nam učastak. Kali jany nam nia vydzielili ŭčastak z 2017 hodu, to ciapier tym bolš vykinuć nas, i ŭsio. Ciapier ža, pavodle zakanadaŭstva, vysialeńnie adbyvajecca na vulicu z prysvajeńniem statusu asoby biaz peŭnaha miescažycharstva. Atrymlivajecca, my budziem biazdomnymi».
Pavodle Viesłava Miedanoŭskaha, znajści ŭčastak pavodle prezydenckaha ŭkazu № 58 «Pra niekatoryja zachady pa abaronie majomasnych pravoŭ pry zabirańni ziamielnych učastkaŭ dla dziaržaŭnych patreb» niemahčyma. Usie ŭčastki sa śpisu Mienskaha rajvykankamu byli biez kamunikacyj. A kab ich pravieści, treba patracić značnuju sumu z atrymanaj hrašovaj kampensacyi za dom (amal 150 tysiač rubloŭ).
«Susiedzi atrymali ŭčastak biez kamunikacyj u Mienskim rajonie. Kab pravieści kamunikacyi, ułady naličyli 20 tysiač dalaraŭ. A ŭčastak na 15 sotak jany kupili za 60 tysiač dalaraŭ. Voś jakija sumy. To bok atrymlivajecca, što kampensacyju, jakuju mnie dali za znos doma, ja pavinien patracić na ŭčastak».
Viesłaŭ dahetul nie padpisaŭ dakument na adčužeńnie nieruchomaści, chacia na sudzie pradstaŭnik upraŭleńnia kapitalnaha budaŭnictva Mienharvykankamu zajaviŭ, što jaho ziamlu i dom užo adabrali.
«Jany adabrali biez majho podpisu, i atrymlivajecca, što ja tut znachodžusia nielehalna».
«Ciapier ja bjusia jak ryba ab lod»
Viesłaŭ źviarnuŭsia taksama ŭ kampaniju «Dana Astra», kab pahladzieć, kolki ŭ ich kaštuje žyllo. Jamu prapanavali dvuchpakajoŭku, «hołyja ścieny», bieź pieraharodak, elektryki i santechniki za 80 tysiač eŭra.
«Ja spytaŭ, a chto budzie stavić pieraharodki i ŭsio pravodzić? Jany skazali, što mohuć jany i minimalna heta budzie kaštavać jašče 20 tysiač eŭra, — kaža Viesłaŭ. — Ja viedaŭ, što ŭ ich akcyja z rasterminoŭkaj. Menedžar naličyŭ, što pa akcyi budzie 120 tysiač eŭra, bo rasterminoŭka 20%. Makiej kazaŭ, što jany, maŭlaŭ, ilhotna pradajuć heta žyllo. Dyk voś heta i jość ilhota. Jany dla lekaraŭ prapanavali 10-hadovuju rasterminoŭku na 20%. To bok 20% usio roŭna im viartajecca. Dyk jakaja heta ilhota? Heta ŭsio chitra zroblena».
Viesłaŭ Miedanoŭski kaža, što nie źbirajecca pakidać svoj dom.
«Ciapier ja bjusia jak ryba ab lod. Jak skazaŭ juryst Mienharvykankamu, my pryjedziem z AMAPam i vyvieziem usiu vašu meblu na skład. I dom źniasuć. Ja chacieŭ vyrašyć heta pytańnie mirna. U mianie cełyja tamy pierapiski z uładnymi strukturami, — kaža Viesłaŭ. — Ale ŭsio, ja dumaju, upirajecca ŭ hrošy, bo ŭ nas ziamlu adbiaruć i pradaduć jaje. Niachaj z AMAPam pryjaždžajuć i vynosiać rečy».
Što za budoŭla?
«Dana Chołdynhz» kantralujecca serbskimi miljanerami Karyčami. U śniežni minułaha hodu Eŭraźviaz uvioŭ sankcyi suprać hetaha chołdynhu, uładalniki jakoha, pavodle aficyjnaha časopisa Eŭraźviaza, padtrymlivajuć ciesnyja adnosiny z Alaksandram Łukašenkam.
«Dana Astra», jakaja ŭvachodzić u «Dana Chołdynhz», źjaŭlajecca zakazčykam budaŭnictva šmatfunkcyjanalnaha žyłoha kompleksu Minsk World na miescy byłoha aeradroma «Miensk-1», na płoščy amal 340 ha. Tut planujecca ŭźvieści 3 młn kvadratnych metraŭ žytła, siarod inšaha i katedžy.
Pad budoŭlu Mienharvykankam pavinien začyścić terytoryju ad pryvatnaha sektaru na vulicach Aeradromnaj, Viljamsa, u zavułku Viljamsa i jašče niekalkich susiednich vulicach.
