Razam ź im śviatuju Imšu celebravali Apostalski administratar Minska-Mahiloŭskaj archidyjacezii sede vacante biskup Kazimir Vielikasielec OR, arcybiskup Tadevuš Kandrusievič i dapamožny biskup Minska-Mahiloŭskaj archidyjacezii Alaksandr Jašeŭski.
Na pačatku celebracyi pradstaŭnik Papy źviarnuŭsia da ŭdzielnikaŭ Eŭcharystyi z pryvitalnym słovam:
Ante Jezič
«Ja vielmi rady, što mahu ŭpieršyniu ŭznačalić celebracyju śviatoj Imšy na biełaruskaj movie i malicca za vas i za vašyja siemji»,— skazaŭ Apostalski nuncyj. Havoračy pra 30-hodździe adradžeńnia kaścielnych struktur u našaj krainie, jon adznačyŭ, što Kaścioł u Biełarusi, niby jevanhielskaja zakvaska, pastupova pieramianiaje i adnaŭlaje ŭ Chryście ŭsio biełaruskaje hramadstva.
«Z nahody hadaviny adnaŭleńnia kaścielnych struktur zyču Kaściołu Minska-Mahiloŭskaj archidyjacezii i Mitrapolii dalejšaha raźvićcia i paśpiachovaha ažyćciaŭleńnia misii abviaščeńnia Jevanhiella ŭsiamu stvareńniu va ŭźlublenaj Biełarusi. Niachaj hety addany i vierny Božy narod uzrastaje pad Matčynym zastupnictvam Najśviaciejšaj Panny Maryi Budsłaŭskaj i budzie zachavany ad usialakaha zła pad mahutnaju abaronaju śviatoha Archanioła Michała, niabiesnaha Apiekuna Minska-Mahiloŭskaj kaścielnaj pravincyi», — vykazaŭ pažadańnie arcybiskup Ante Jozič.
Uzhadaŭšy słovy kłasika biełaruskaj litaratury Uładzimira Karatkieviča «Na Biełarusi Boh žyvie», pradstaŭnik Papy ŭpeŭniena śćvierdziŭ: «I budzie žyć!»
Hamiliju padčas Eŭcharystyi, jakuju ŭ pramoj tranślacyi na partale Catholic.by hladzieła mnostva viernikaŭ u Biełarusi i za miažoj, pramoviŭ arcybiskup Tadevuš Kandrusievič — pieršy katalicki biskup u historyi Kaścioła niezaležnaj Biełarusi i śviedka hetych 30 hadoŭ.
Tadevuš Kandrusievič
Ijerarch, uzhadvajučy dośvied žorstkich hanieńniaŭ, jaki daviałosia pieražyć Kaściołu ŭ Biełarusi, nazvaŭ Saviecki Sajuz «biaskrajniaj krainaj, usiejanaj pracoŭnymi i kancentracyjnymi łahierami, jakija stali dla šmatlikich viernikaŭ roznych vieravyznańniaŭ, biskupaŭ i śviataroŭ Hałhofaj XX stahodździa».
Vajaŭničy ateizm u 20-ja hady minułaha stahodździa pazbaviŭ Kaścioł u Biełarusi biskupaŭ i duchoŭnaj sieminaryi, šmat kaściołaŭ i klaštaraŭ było kanfiskavana, a niekatoryja byli zrujnavany «niečałaviečym ateistyčnym režymam».
«Ruiny kaściołaŭ na našaj ziamli — heta maŭklivyja śviedki źniščeńnia duchoŭnaści i chryścijanskaj kultury. Jany jaskrava śviedčać ab tym, na što zdolny čałaviek biez Boha»,— adznačyŭ arcybiskup.
«Zdavałasia, niama takoj siły, jakaja mahła b źniščyć kamunistyčna-ateistyčny režym, — praciahvaŭ niaprostyja ŭspaminy ijerarch, — i mnohija apuścili ruki i pahadzilisia ź situacyjaj.
Adnak Jan Pavieł II <…> vieryŭ u facimskaje praroctva 1917 hoda, što Biezzahannaje Serca Maryi zatryumfuje, i na našych ziemlach adrodzicca viera. 25 sakavika 1984 hoda, zhodna z žadańniem Maryi, jon achviaravaŭ śviet jaje Biezzahannamu Sercu. Nieŭzabavie paśla hetaha ŭ Savieckim Sajuzie raspačałasia pierabudova i hałosnaść».
Viasna Kaścioła raspačałasia i ŭ našaj krainie. «Nie paŭsiul ułady vykazvali svaju prychilnaść da Kaścioła i viery, ale praces pajšoŭ, i ništo nie mahło jaho strymać».
U 1989 hodzie byŭ pryznačany pieršy paśla dziesiacihodździaŭ pieraśledu katalicki biskup, jakim, jak pryznaŭsia arcybiskup Kandrusievič, «pa niezrazumiełym Božym Providzie» daviałosia stać jamu.
«Raspačaŭsia praces reanimacyi Kaścioła»: parafijam viartalisia śviatyni, pryjazdžali z dušpastyrskaj dapamohaj śviatary i kansekravanyja asoby z-za miažy — Polščy, Litvy, Ukrainy.
1 kastryčnika 1990 hoda ŭ Savieckim Sajuzie byŭ pryniaty novy zakon ab svabodzie sumleńnia i relihijnych arhanizacyjach, jaki daŭ bolš svabody i pryznaŭ jurydyčny status zarehistravanych relihijnych arhanizacyj.
«U facimski dzień, 13 krasavika 1991 hoda, Papa Jan Pavieł II pryniaŭ histaryčnaje rašeńnie: była zasnavana Minska-Mahiloŭskaja mitrapolija.Jana składałasia z adnajmiennaj archidyjacezii i dvuch sufrahannych dyjacezij — Hrodzienskaj i Pinskaj. U 1999 hodzie ź Minska-Mahiloŭskaj archidyjacezii była vyłučana Viciebskaja dyjacezija», — adznačyŭ ijerarch, dadaŭšy, što rašeńnie śviatoha Jana Paŭła II było «natchnionym Božym Providam i svoječasovym, pradyktavanym kłopatam pra naš Kaścioł, jaki ciarpieŭ i nie zdaŭsia».
Arcybiskup Tadevuš z udziačnaściu ŭzhadaŭ śviataroŭ, kansekravanych asobaŭ i viernikaŭ z-za miažy, jakija tady prybyli z dušpastyrskaj i sponsarskaj dapamohaj.
Ijerarch koratka spyniŭsia na dasiahnieńniach Kaścioła ŭ Biełarusi za apošnija try dziesiacihodździ: značna pavialičyłasia kolkaść parafij i śviataroŭ, dziejničaje Duchoŭnaja sieminaryja ŭ Hrodnie, raźvivajecca dušpastyrstva — ahulnaje i śpiecyjalizavanyja, dziejničajuć katalickija ŚMI, vydviectvy rychtujuć i vydajuć malitoŭnuju i relihijnuju litaraturu, dabračynnaja arhanizacyja «Karytas» dapamahaje patrabujučym.
Kažučy pra rolu Kaścioła ŭ hramadskim žyćci krainy, ijerarch padkreśliŭ, što «vykliki našaha času nie dazvalajuć zatrymlivacca na dasiahnutym: nieabchodna dalej raźvivacca, kab svoječasova adkazvać na ich».
Na zakančeńnie hamilii arcybiskup Tadevuš Kandrusievič zaklikaŭ prystunych uściaž daviarać Kaścioł u Biełarusi zastupnictvu Božaj Maci i śviatoha Juzafa.
«Kaścioł u Biełarusi! Ty adkryvieš novuju staronku svajoj historyi i ŭstupaješ u novy etap svajho žyćcia. Niachaj tvaja dziejnaść budzie napoŭniena kłopatam pra duchoŭnaje daskanaleńnie čałavieka. Niachaj budzie nadzieja, navat nasupierak nadziei. Vykarystoŭvajučy sacyjalnaje vučeńnie dapamahaj u vyrašeńni aktualnych prablem našaha hramadstva.
Budź aryjenciram u budavańni ščaślivaj budučyni našaj Baćkaŭščyny»,— zaklučyŭ arcypastyr.
Kazimir Vielikasielec
Na zakančeńnie śviatoj Imšy Apostalski administratar Minska-Mahiloŭskaj archidyjacezii biskup Kazimir Vielikasielec padziakavaŭ pradstaŭniku Papy, biskupam, śviataram i ŭsim viernikam za supolnuju malitvu i pažadaŭ usim žyć tak, kab stać pierad Boham z čystym sumleńniem.
Mocnym duchoŭnym akordam na zaviaršeńnie śviatoj Imšy staŭ himn-malitva za Baćkaŭščynu i Kaścioł na Biełarusi «Mahutny Boža», jaki liŭsia z vusnaŭ i sercaŭ usich udzielnikaŭ uračystaha nabaženstva na čale z Apostalskim nuncyjem Ante Jozičam.
