Paviedamleńni ab pierakidańni desantnikaŭ pastupajuć na fonie pavieličeńnia rasiejskaj vajskovaj prysutnaści la miežaŭ z Ukrainaj.
Uviečary 10 krasavika na YouTube źjaviłasia videa ešalona z vajskovaj technikaj, jaki nočču prachodzić praz stancyju Nižniahorskaja na paŭnočny ŭschod ad Symferopala. Technika na platformach charakternaja dla desantnych častak.
7 krasavika ŭ TikTok było apublikavana videa z takoj ža technikaj na platformach. U kamentarach havorycca, što jano źniataje ŭ Pskovie. CIT udałosia paćvierdzić hiealakacyju.
«Paraŭnaŭšy paradak husieničnaj techniki na dvuch videa, my pryjšli da vysnovy, što ŭ Pskovie byŭ źniaty toj ža ešalon, što i ŭ Krymie — ale jašče da taho, jak da jaho pryčapili pasažyrskija vahony i platformy z hruzavikami. U Pskovie i vakolicach bazujecca 76-ja hvardziejskaja desantna-šturmavaja dyvizija — raniej my pisali ab pierakidańni jaje techniki ŭ Krym, a z taho času my i inšyja daśledčyki nieadnarazova fiksavali sastavy, jakija ruchalisia z Pskova ŭ Symferopal», — adznačajuć eksperty.
Kolkaść ciahnikoŭ z technikaj dyvizii dazvalaje vykazać zdahadku, što ŭ Krym pierakidajuć značnuju častku techniki i asabovaha składu dyvizii. Adnak heta pieršy vypadak, kali jaje prysutnaść była zaŭvažanaja na poŭnač ad Symferopala.
8 krasavika hrupa Conflict Intelligence Team praanalizavała publikacyi ŭ sacyjalnych sietkach i pryjšła da vysnovy, što rasiejskija vojski skancentravalisia ŭ palavym lahiery ŭ Varonieskaj vobłaści, prykładna za 250 km ad miažy. U 2014—2015 hadach lahiery rasiejskich vajskoŭcaŭ raźmiaščalisia našmat bližej da miažy.
Miascovyja žychary pisali, što vajskoŭcy raźmiaścilisia «ŭ poli pobač z žyłymi damami». Taksama jość śviedčańni pra dyślakacyju rasiejskich vajskoŭcaŭ u rajonie horadu Astrahosk Varonieskaj vobłaści (kala 150 km ad miažy z Ukrainaj).
Rasieja ŭ apošnija dni, śćviardžajučy, što pierakidańnie jaje vojskaŭ nie niasie nikomu pahrozy, adnačasova pahražaje Ŭkrainie «nastupstvami» ŭ vypadku hipatetyčnaha nastupu na pazycyi separatystaŭ u Danbasie. Kali Kijeŭ pačnie bajavyja dziejańni ŭ Danbasie, heta stanie «pačatkam kanca Ŭkrainy», zajaviŭ namieśnik kiraŭnika administracyi prezydenta RF Dźmitry Kozak (kuryruje postsavieckuju prastoru).
Pavodle jaho słovaŭ, Rasieja budzie vymušanaja stać «na abaronu svaich hramadzian» u zaležnaści ad maštabu kanfliktu. U niepadkantrolnych Ukrainie rajonach Danieckaj i Łuhanskaj abłaściej užo niekalki socień tysiačaŭ čałaviek atrymali rasiejskija pašparty (Ukraina rasiejskaha hramadzianstva hetych asobaŭ nie pryznaje).
Žurnalisty-daśledčyki ŭstanavili, što ŭ 2014 hodzie prynamsi niekalki vajskoŭcaŭ 76-j dyvizii zahinuli ŭ bajach suprać ukrainskich vajskoŭcaŭ u Danbasie. Rasiejskija ŭłady abo admaŭlali ich hibiel, abo zajaŭlali, što jany zahinuli, zvolniŭšysia z vojska ci «syšoŭšy ŭ adpačynak».
