Niderłandskaja teleradyjokampanija NOS apublikavała rasšyfroŭku novych aŭdyjazapisaŭ pa spravie ab krušeńni rejsa MN17 na Danbasie ŭ lipieni 2014 hoda.
Na ich zafiksavanyja, u pryvatnaści, pieramovy padazravanych Siarhieja Dubinskaha i Ihara Strałkova-Hirkina.
Pieramovy pierachapili ŭkrainskija śpiecsłužby. Bolš za dziasiatak zapisaŭ byli apublikavanyja Mižnarodnaj śledčaj hrupaj.
U dzień avijakatastrofy 17 lipienia Dubinski zajaviŭ, što maje niepasredny kantakt z Maskvoj. Na zapisach čuvać, jak u toj ža dzień Dubinski kaža pra rakietnuju ŭstanoŭku Buk na padkantrolnaj bajevikam terytoryi.
Prykładna praz paŭhadziny paśla krušeńnia Boinha Dubinski daviedaŭsia ad terarystaŭ, što jany nibyta źbili ŭkrainski źniščalnik. Jamu spatrebiłasia amal dźvie hadziny dla taho, kab vyśvietlić, što ŭ hety ž čas byŭ źbity pasažyrski samalot.
Pry hetym z apublikavanych aŭdyjazapisaŭ niezrazumieła, chto mienavita addaŭ zahad stralać z Buka.
Maskva była ŭciahnutaja ŭ vajskova-stratehičnyja rašeńni, a terarysty atrymlivali ad Rasii srodki suviazi, abaronienyja ad prasłuchoŭvańnia. Śćviardžajecca, što da pastavak aparatury mieła dačynieńnie FSB.
Pasažyrski Boeing 777 małajzijskich avijalinij, jaki vykonvaŭ rejs MN17 z Amsterdama ŭ Kuała-Łumpur, byŭ źbity ŭzbrojenymi siłami Rasii nad akupavanym Danbasam 17 lipienia 2014 hoda. Na borcie łajniera znachodziłasia 283 pasažyry i 15 členaŭ ekipaža. Usie jany zahinuli.
