Źjezd sabraŭ 135 delehataŭ, jakija amal adnadušna vykanali farmalnyja pracedury pa stvareńni partyi. Ź vitalnym słovam vystupiŭ deputat Dziarždumy RF Dźmitryj Bielik ź Sievastopala i deputat Pałaty pradstaŭnikoŭ Biełarusi Tenhiz Dumbadze, a taksama pradstaŭniki abjadnanaj rasijskaj partyi «Spraviadlivaja Rasija — za praŭdu» Alaksandr Kazakoŭ i Viktar Jacenka, jakija pieradali pryvitańnie ad svajho lidara Zachara Prylepina. Bielik paličyŭ simvaličnaj datu źjezdu, nahadaŭšy, što akurat 6 sakavika byŭ pryznačany refierendum «ab viartańni Kryma ŭ rodnuju havań».
Biełaruski deputat Tenhiz Dumbadze nazvaŭ siabie «biełaruskim hruzinam», a taksama «prychilnikam ułady, jaki nie baicca praŭdy». Jon vitaŭ budučuju pracu «Sajuza» pa pahłybleńni intehracyi Biełarusi i Rasii, jakaja «nie pavinna ŭdaryć pa suvierenitecie».
Taksama pakazalnaje pryvitańnie źjezdu ad praŭładnaha publicysta Alaksieja Dziermana, jaki padziakavaŭ Łušču za dapamohu ŭ arhanizacyi mitynhaŭ u padtrymku Łukašenki ŭ žniŭni-vieraśni. Sam Dzierman adnak pryznaŭsia, što maje namier ustupić u praprezidenckuju partyju, u jakuju budzie pieraŭtvorana hramadskaje abjadnańnie «Biełaja Ruś».
Simvalična, što kandydaturu Łušča na miesca staršyni «Sajuza» vysunuŭ Mikałaj Siarhiejeŭ, jaki z 1992-ha da rospusku ŭ 1999 hodzie byŭ adnym ź lidaraŭ prarasijskaj partyi «Słavianski sabor «Biełaja Ruś». Paśla likvidacyi «Słavianskaha sabora» takich adkryta prarasijskich partyj u Biełarusi bolš nie było da 2021 hoda.
Čytajcie taksama: Prarasijskija radykalnyja siły ŭ Biełarusi abjadnoŭvajucca ŭ partyju. Vystupić zaprasili paplečnikaŭ Zacharčanki z DNR
