— Jakaja była stratehičnaja meta Łukašenki padčas sustrečy z Pucinym u Sočy? Ci dabiŭsia jon jaje?
— Hałoŭnaj jahonaj metaj było i jość zastavacca kiraŭnikom Biełarusi. A dla hetaha treba, kab, akramia jaho samoha, jašče niechta tak ličyŭ. Voś Rasieja tak ličyć, Pucin tak ličyć i prymaje jaho jak prezydenta Biełarusi.
Kab heta praciahvałasia, Łukašenku treba prapanoŭvać niejkija temy dla pieramovaŭ, niejkija palityčnyja pracesy. Tamu na sustrečy ŭ vieraśni jon prapanoŭvaŭ «kanstytucyjnuju reformu». Ale zaraz aktualnaść hetaj temy dla Rasiei źnikła, bo biełaruskija pratesty ŭžo pierakinulisia na Rasieju, i ŭžo pozna rabić niejkija zachady, kab hetych pratestaŭ u Rasiei nie było. A Łukašenka ličyć, što pratesty zdušyŭ, i tamu nijakaja realnaja reforma ŭłady ŭ krainie ciapier nie patrebnaja.
Tamu Łukašenka vymušany ŭ razmovie z Pucinym mianiać temu i prapanoŭvać niejkija inšyja pracesy. Naprykład, «pahłybleńnie intehracyi» — tema, jakuju jon cudoŭna vykarystoŭvaŭ šmat hadoŭ.
— Mienavita tamu Łukašenka ŭ razmovie z Pucinym zahavaryŭ sam pra «darožnyja mapy», čamuści zajaviŭšy, što ich užo 33 (raniej było 30). Tym samym jon padyhryvaje Pucinu, padymajučy hetuju temu.
— Tak, heta praces, jakija dazvalaje Łukašenku vieści dyjaloh z prezydentam Rasiei, niešta abmiarkoŭvać, prapanoŭvać, havaryć pra ekanomiku, padatki, inšaje. Jon lubić havaryć pra sumiesnaje procistajańnie Zachadu, prapanuje macavać vajskovy sajuz, što ja znachodžu vielmi niebiaśpiečnym.
— Ci niama ŭ hetaj hulni peŭnaj niebiaśpieki dla samoha Łukašenki, u sensie intehracyi? Maŭlaŭ, Kreml pasłuchaje, što Łukašenka kaža pra intehracyju, i, uličvajučy ciapierašniaje ŭraźlivaje stanovišča Łukašenki, skaža sabie — «dyk davajcie narešcie jaho daciśniem». Zmoža što-niebudź Kreml realna zrabić?
— Nie. U Kramli jak dzieci — pierakananyja, što im dastatkova Łukašenku niešta skazać, i jon pabiažyć vykonvać. Nibyta nie było dośviedu ŭsich 25 hadoŭ. Heta tak nie pracuje. Rasieja nie hatovaja padmacoŭvać svaje žadańni i patrabavańni niejkimi realnymi instrumentami, akramia zvykłych — to bok akramia dyjalohu z samim Łukašenkam.
— Z hetaha hledzišča — u žniŭni-vieraśni Rasieja vidavočna padtrymała Łukašenku. Ale mnohija analityki kažuć, što heta było tolki sytuatyŭna, a na samoj spravie Kreml daŭno choča zamianić Łukašenku. Jakoje ž stratehičnaje staŭleńnie Rasiei da hetaj asoby i perspektyvy jaho zamieny?
— Stratehičnaja zadača Rasiei vidavočnaja — zachoŭvać upłyŭ na Biełaruś i kab Biełaruś pry lubym jaje kiraŭnictvie trymałasia stratehičnych intaresaŭ Rasiei. Tamu Maskva chacieła b, kab biełaruskaja palityčnaja i ekanamičnaja systema bolš nahadvała rasiejskuju, to bok mieła b bolš «punktaŭ uvachodu», jak skazaŭ kaliści Arciom Šrajbman. Kab u Biełarusi mieli značeńnie hrošy, kab byli partyi, inšymi słovami — bolš šyrokaje koła surazmoŭcaŭ, a nia tolki Łukašenka. Kab byli niejkija orhany i struktury, ź jakimi b mieła sens damaŭlacca, — bo ciapier Łukašenka ŭ luby momant moža abnulić lubuju damovu.
Hetaksama niama nijakaha sensu zaraz kuplać niejkija biełaruskija pradpryjemstvy, bo ŭ luby momant dziaržava moža ich zabrać.
— Ale sama ŭłada, dyj jaje apanenty, niaredka pałochajuć ludziej tym, što voś Rasieja choča zabrać, pryvatyzavać našy pradpryjemstvy, naša nacyjanalnaje bahaćcie. Vy ličycie heta iluzijaj?
— Nia viedaju, zaŭsiody moža znajścisia niejki idyjot. Idyjot u biznesie — heta nie takaja ŭžo i redkaść. Čałaviek, jaki čamuści padumaje, što jon akažacca nie takim, jak inšyja, a bolš paśpiachovym. Jak tolki hetyja pradpryjemstvy pačnuć niešta zarablać, Łukašenka ich zabiare.
— Na vieraśnioŭskaj sustrečy z Pucinym Łukašenka, jak było pryniata ličyć, daŭ davoli kankretnyja abiacańni pra tranzyt ułady, jaki adbudziecca ŭžo ŭ 2021 hodzie, pra toje, što sam jon adydzie ad ułady. Ale dalejšyja padziei pakazali, što jon zusim nie źbirajecca vykonvać hetyja abiacańni. Jak da hetaha moža stavicca Pucin, ci pavinna jaho heta niepakoić?
— Jak ja ŭžo kazała, aktualnaść kanstytucyjnaj reformy ciapier užo nie nastolki važnaja, terminovaść hetaha pracesu ŭžo adpała, bo pratesty ŭžo ŭ Rasiei. Tamu śpiašacca tut Łukašenku ŭžo niama nijakaha rezonu. Kreml, viadoma, budzie nastojvać na kanstytucyjnaj reformie, ale kali jon budzie heta rabić tymi ž naiŭnymi metadami, jak dahetul, to nijakaha pośpiechu tut nia budzie.
— Łukašenka, asabliva apošnija miesiacy, lubiŭ havaryć «my ŭ adnoj łodcy», majučy na ŭvazie siabie i Pucina. Ci zhulali hetyja słovy, ci staŭ Pucin z Łukašenkam «śpina ŭ śpinu»?
— Rasieja zaraz usia taksama pahłybiłasia ŭ antyzachodniuju rytoryku, pratesty z pryčyny palityki ŭładaŭ taksama traktujucca jak zamiežnaja ahresija. Tamu zbližeńnie na hlebie antyzachodniaha patasu vidavočnaje.
— Ci daść Maskva jašče hrošy?
— Viadoma, daść. My ž pavinny Rasiei značna bolš, čym jana daje apošnim časam. Tamu jana budzie davać chacia b dla taho, kab Biełaruś mahła restrukturyzavać svaje daŭhi pierad Rasiejaj.
Treba zaznačyć, što chacia b u hetym pytańni — finansavym — rasiejcy ŭdaskanalvajucca i pierajmajuć dośvied kitajskich tavaryšaŭ. Imknucca nie akazvać pramoj finansavaj padtrymki, a davać źviazanyja kredyty. Jak z AES. Dali kredyt, Biełaruś pabudavała AES i ciapier sama pavinna dumać, kudy padzieć hetuju enerhiju, jakuju Rasieja nie źbirajecca kuplać.
Na sustrečy Pucina z Łukašenkam było skazana, što, niahledziačy na ŭvod AES, Biełaruś budzie kuplać pa-raniejšamu bolš za 20 miljardaŭ kubametraŭ rasiejskaha hazu ŭ hod. Ale ž AES budavałasia nibyta dziela taho, kab kuplać mienš rasiejskaha hazu. I kab zachavać Biełaruś jak hałoŭnaha pakupnika, Rasieja hatovaja vydać kredyt na budaŭnictva hetaha «Hrodna Azot 2», kab biełarusy praciahvali kuplać rasiejski haz i pry hetym praciahvali płacić pracenty za kredyty.
— U palityčnaj sfery, jak vy adznačyli, Rasieja zastajecca prychilnaja da starych schiemaŭ, dyjalohu tolki z samim Łukašenkam. Čamu jany nie razhladajuć mahčymaść dyjalohu ź jahonymi apanentami, jakija na siońnia pradstaŭlajuć bolšaść biełaruskaha hramadztva? Čamu jany hetaha nia robiać? Heta takaja zakaścianiełaść myśleńnia — ci prosta nia bačać u hetym nieabchodnaści?
— Heta naiŭnaść, viera ŭ vialikaść Kramla. Viera ŭ toje, što Pucin, jaki taki važny dla samich rasiejcaŭ, hetaksama važny i dla Łukašenki, što kali Pucin skazaŭ, «nachmuryŭšy brovy», to niechta pabiažyć i budzie adrazu vykonvać. Kreml pieraaceńvaje svaje mahčymaści ŭ Biełarusi, u infarmacyjnaj prastory.
Kali b Maskva pracavała i z apanentami, i z namenklaturaj, kiroŭnym klasam Biełarusi — to, viadoma, heta było b značna bolš efektyŭna.
