Pasła Kitaja Sie Siaojuna nie było siarod inšych dypłamataŭ na «Usiebiełaruskim narodnym schodzie».
Pry hetym viadoma, što adpaviednaje zaprašeńnie, jak i kiraŭniki astatnich dypmisij, Siaojun atrymaŭ. «Zhodna z pratakolnymi praviłami, biełaruski bok adnolkava stavicca da ŭsich kiraŭnikoŭ dypłamatyčnych misij», — adkazali ŭ Ministerstvie zamiežnych spraŭ na pytańnie «Našaj Nivy».
Adnak jašče ŭ paniadziełak, 8 lutaha, BiełTA publikavała vialikaje intervju kitajskaha pasła.
Ci mahčyma, što pasoł nie zachacieŭ iści praz ryzyku karanavirusa? Kitajcy doma pravodziać u hetym sensie strohuju palityku. Ale hetaja viersija vyhladaje sprečna — viadoma, što dypłamaty nie całkam samastojnyja ŭ svaich dziejańniach, bo vykonvajuć zahady svajho ministerstva. Kitajcy tut nadzvyčaj kansiervatyŭnyja — pasoł moža praihnaravać mierapryjemstva ŭ inšaj krainie, kali z «centra» nie pryjšło kamandy tudy iści.
Sie Siaojun, fota BIEŁTA
Jak było ŭ minskim vypadku, niezrazumieła. Techničnaja heta ci palityčnaja adsutnaść? My nakiravali adpaviedny zapyt u pasolstva.
Viadoma, što niahledziačy na ŭźniosłuju palityčnuju rytoryku, naša handlovaje salda z Kitajem zastajecca admoŭnym, park «Vialiki kamień» praciahvaje isnavać u embryjanalnym stanie.
Ëść padstavy mierkavać, što Kitaj rasčaravany zryvam ustupleńnia Biełarusi ŭ Suśvietnuju handlovuju arhanizacyju. Akramia taho, Kitaj niehatyŭna ŭsprymaje kanflikt Alaksandra Łukašenki z Polščaj, Litvoj i Ukrainaj, bo dla realizacyi ich kancepcyi «Pojasa i šlachu» važna, kab Biełaruś mieła dobryja adnosiny z susiedziami z vyjściem da mora.
Varta adznačyć, što Kitaj padtrymlivaje roŭnyja i davoli ciesnyja ekanamičnyja suviazi z Ukrainaj, jakaja atrymała svabodny dostup na premijalny jeŭrapiejski rynak.
