«Što vy robicie zvyčajna pa vychodnych? — pytajecca ŭ ich Zołatava. —
Łyžy, fitnies, basiejn, saŭna? Adpačynak na pryrodzie ŭ kole siamji i siabroŭ? Heta vydatna. Nadzia Kalinina ŭ piatnicu ŭviečary klikała ŭ hości siabrovak — na harbuzovy sup. U subotu «chacieli paśniedać u kafe, kab zrazumieć, što choć vakoł piekła, my žyvyja i možam być ščaślivymi». Nie vyjšła. Tamu što ŭ piatnicu ŭviečary Nadzia apynułasia na Akreścina.
I voś užo prajšła subota, skančajecca niadziela — Nadzia ŭsio jašče tam. I, chutčej za ŭsio, — a my ŭžo daśviedčanyja ludzi, tamu što z maja 2020 hoda žurnalistaŭ TUT.BY zatrymlivali 39 razoŭ — u paniadziełak budzie jaki-niebudź sud. «Jaki-niebudź» — bo my navat nie viedajem, za što na Nadziu skłali pratakoł.
Tysiačy ludziej z maja 2020 hoda prajšli praź izalatary. Akreścina, Žodzina, Baranavičy — jakija asacyjacyi vyklikajuć u vas hetyja nazvy?
Vy ciapier budziecie havaryć pra bajevikoŭ, terarystaŭ, złačyncaŭ, parušalnikaŭ zakona i inšyja paniaćci, u jakija vy pa niejkich pryčynach vierycie ci robicie vyhlad, što vierycie. Ale moj list ab inšym. Tym bolš, što kankretnaja Nadzia Kalinina ŭ piatnicu dniom išła aśviatlać źjezd delehataŭ ad Minska na Usiebiełaruski narodny schod. Dy i zatrymańni, sudy, pakarańni — heta nie da vas, viadoma.
Davajcie pahavorym ab čałaviečnaści i miłasernaści. Ja spadziajusia, dla vas hetyja słovy nie pusty huk. Vy ž vybirali miedycynu, napeŭna, dla taho, kab dapamahać ludziam? Tamu što čałaviečyja pakuty prynosiać vam bol?
Bolš za try tydni na Akreścina nie prymajuć pieradačy. U Žodzinie ich taksama pierastali prymać. Naohuł. Možna pieradać tolki leki — dy i to z rypam. A jašče niekalki miesiacaŭ tamu pieradačy prymali štodzień, potym raz na tydzień.
Karanavirus, kažacie? Adnak jon nie pieraškadžaje ŭtrymlivać u kamiery, raźličanaj na šaściarych, 16 čałaviek, a taksama rehularna «raskidvać» ludziej pa roznych kamierach.
Davajcie prykiniem z vami, ci možna pratrymacca 15 sutak (raspaŭsiudžany termin administracyjnaha aryštu) bieź pieradač. Bieź ciopłych rečaŭ, biez pasty i zubnoj ščotki, biez srodkaŭ hihijeny, bieź bializny. Nu, a kali miesiačnyja? Ujavili?
15 sutak bieź źmiennaj bializny!
Dapuścim, vaša viera ŭ «złačyncaŭ-bajevikoŭ i inšaje» niepachisnaja, jak i ŭ «śviataść dziejnaj ułady». Ale, skažycie, dzieści napisana, što adsutnaść čystych trusoŭ i zubnoj pasty ŭ IČU dadaje ačkoŭ u karmu abo spryjaje vypraŭleńniu? A paścielnaj bializny i matracaŭ? Dzieści skazana, što dziaržava budzie macniejšaj, kali zatrymanyja pavodle administracyjnych spraŭ buduć lažać na hołych narach i navat na padłozie ŭ pierapoŭnienych kamierach abo kali ich nie buduć vadzić u duš ciaham 15 dzion?
Ci vy dumajecie, što čałaviek, pravioŭšy chaj navat nie 15, a troje sutak u izalatary ŭ takich umovach, prasiakniecca da ŭłady pavahaj? «O-o-o-o! Napeŭna, heta ŭłada takaja mocnaja mienavita tamu, raz moža sabie dazvolić tak ździekavacca z aryštantaŭ?»
«Administracyjna aryštavanym dazvalajecca atrymańnie pasyłak, pieradač, banderolaŭ i drobnych pakietaŭ biez abmiežavańnia ich kolkaści» — heta vytrymka z artykuła 18.7 Pracesualna-vykanaŭčaha kodeksa Respubliki Biełaruś ab administracyjnych pravaparušeńniach.
Prava na pieradačy, indyvidualnaje spalnaje miesca, paścielnyja prynaležnaści, štodzionnyja prahułki i pa krajniaj miery štotydniovy duš harantavana administracyjna zatrymanym i praviłami ŭnutranaha rasparadku miescaŭ adbyćcia administracyjnaha aryštu.
U MUS vam skažuć, što hetyja praviły vykonvajucca. Ale pacikaŭciesia ŭ kaleh-miedykaŭ, jakija pabyvali na Akreścina i ŭ Žodzinie. Upeŭnienaja, u vas jość takija znajomyja.
Voś i ŭsio, mabyć.
Spadziajusia, vy dobra praviali vychodnyja», — napisała Maryna Zołatava.
