Uračystaść prajšła 22 listapada. U hetym miastečku, što pad Brestam, adbyłasia važnaja dla tutejšaj katalickaj parafii padzieja: błasłaŭleńnie adbudavanaj śviatyni i pieršaja śviataja imša ŭ joj, piša catholic.by.
Abrad błasłaŭleńnia adnoŭlenaha kaścioła ździejśniŭ biskup Pinski Antoni Dziamjanka. Va ŭračystaści ŭziali ŭdzieł taksama śviatary z susiednich parafij Bresckaha dekanata: ks. Pavieł Chalaŭkin, dekan Brescki i probašč parafii ŭ Čarnaŭčycach, ks. Viktar Barysievič, probašč parafii ŭ Kamiancy, a taksama kancler kuryi Pinskaj dyjacezii ks. Andrej Ryłka.
Kaścioł u Voŭčynie byŭ pabudavany krakaŭskim kaštelanam Stanisłavam Paniatoŭskim, baćkam budučaha karala Stanisłava Aŭhusta, u 1729-1731 h. Heta byŭ muravany kaścioł, sprajektavany ŭ vatykanskaj maniery rymskaj architektury Johanam Zyhmundam Dejbłam. Nieŭzabavie paśla zakančeńnia budaŭnictva śviatyni ŭ Stanisłava Paniatoŭskaha naradziŭsia syn Stanisłaŭ, budučy polski karol, jaki byŭ u joj achryščany.
U 1750-ja miastečka stała važnym centram hramadskaj i kulturnaj aktyŭnaści kniazioŭ Čartaryjskich. Paźniej u voŭčynskim kaściole i byŭ pierapachavany Stanisłaŭ Aŭhust Paniatoŭski.
U 1866 h. carskija ŭłady adabrali kaścioł u miascovaj katalickaj parafii, častkova jaho razburyli i pieraabstalavali. Tolki ŭ 1918 h. katoliki zmahli viarnuć sabie śviatyniu. U 1924 h. kala kaścioła była pabudavanaja plabanija ŭ nieabaročnym styli dla pražyvańnia śviatara. U 1945 h. kaścioł znoŭ pieražyŭ častkovaje razbureńnie. Parafija adradziłasia na pačatku 1990-ch hadoŭ, adradziłasia miascovaja parafija, i vierniki pačali padrychtoŭku da adnaŭleńnia śviatyni. Hruntoŭnyja pracy pa adradžeńni kaścioła raspačalisia ŭ 2009 h.
