Rada Mižnarodnaj fiederacyi chakieja na hetym tydni pavinna była vyrašyć, ci pieranosić Čempijanat śvietu ź Biełarusi ŭ inšuju krainu, ale tolki zasłuchała dakład ekśpiertnaj kamisii. Nierašučaść kiraŭnictva IICHF pryviała da burnaj reakcyi ŭ samych papularnych jeŭrapiejskich ŚMI, jakija jarka vykazvalisia ab mahčymaści praviadzieńnia turniru ŭ Minsku, piša Tut.by.
Viadomy šviedski žurnalist Pier Biurman napisaŭ kałonku dla viadučaj šviedskaj haziety Aftonbladet. Jon miarkuje, što situacyja z čempijanatam u Minsku całkam adnaznačnaja.
«Nie razumieju, čamu jašče idzie niejkaje abmierkavańnie? Absalutna vidavočna, što niemahčyma pravodzić turnir u krainie, u jakoj dziaržava teraryzuje pratestoŭcaŭ, a kiraŭnik fiederacyi chakieja, pa ŭsioj vierahodnaści, źviazany z karnikami.
Rene Faziel, Anders Łarsan (kiraŭnik šviedskaj fiederacyi chakieja) i inšyja kiraŭniki nakinuć na siabie viečnuju hańbu, kali vyrašać pakinuć Čempijanat śvietu ŭ Biełarusi», — piša Biurman.
Jon ličyć, što spartyŭnyja spabornictvy nie pavinny pravodzicca ŭ krainach, dzie nie vykonvajucca pravy čałavieka, taksama raskrytykavaŭšy rašeńnia addać Alimpijadu Kitaju, a Čempijanat śvietu pa futbole — Kataru.
«Hetym letam Biełaruś uzrušyła paŭstańnie ludziej, jakija bolš nie mohuć vynosić pryhniot, niespraviadlivaść i adsutnaść elemientarnych pravoŭ čałavieka. Prajšli masavyja akcyi pratestu. Adkaz režymu na ich byŭ prosty: hvałt. Štodnia źjaŭlajucca paviedamleńni ab terory ŭ adnosinach da demanstrantaŭ i navat ab śmierci. Apošni vypadak — hibiel 31-hadovaha Ramana Bandarenki. Kažuć, što padčas jaho źbićcia prysutničaŭ kiraŭnik fiederacyi chakieja Dźmitryj Baskaŭ, jaki padtrymlivaje dziejańni siłavikoŭ.
U takoj situacyi nieprymalna navat dumać ab mahčymaści praviadzieńnia čempijanatu ŭ Minsku.
Rene Faziel usio bolš nahadvaje chakiejnaha Zepa Błatera (eks-prezident FIFA, jaki pakinuŭ svoj post z-za abvinavačvańniaŭ u karupcyi). Paśla Savieta IICHF jon tolki vycisnuŭ ź siabie niekalki fraz, jakija ni da čaho nie abaviazvajuć, pra važnaść čempijanatu dla Mižnarodnaj fiederacyi. Pra pakuty biełaruskaha naroda Faziel nie vymaviŭ ni słova», — piša Biurman, u kancy artykuła jašče raz zaklikaŭšy pieranieści čempijanat ź Biełarusi.
Na staronkach Aftonbladet taksama vykazaŭsia i lehiendarny šviedski chakieist Pieter Forśbierh.
«Miarkujučy pa toj situacyi, jakaja składvajecca, jechać u Biełaruś i hulać tam Čempijanat śvietu, budzie niedarečna», — adznačyŭ Pieter.
Žurnalist adnoj z najpapularniejšych haziet Hiermanii Frankfurter Allgemeine Zeitung Krystaf Biekier ličyć, što pravodzić ciapier čempijanat u Biełarusi niemahčyma. U svajoj kałoncy jon taksama pryvodzić słovy trochrazovaj pryziorki alimpijad i kiraŭnicy Biełaruskaha fondu spartyŭnaj salidarnaści Alaksandry Hierasimieni.
«Što jašče pavinna adbycca, kab śviet uśviadomiŭ, što hety čempijanat nie budzie śviatam abo padstavaj dla honaru?» — pytajecca Alaksandra Hierasimienia. U jaje fondzie sabralisia vybitnyja spartsmieny, zadača jakich — źviarnuć uvahu na žorstkaść i niespraviadlivaść, jakim biełaruski narod padviarhajecca štodnia ź dziaviataha žniŭnia.
«Sa žniŭnia zahinuli dzieviać čałaviek, — piša Alaksandra Hierasimienia, — bolš za 400 padvierhlisia katavańniam, bolš za 27 tysiač aryštavanyja. «Minsk-Arenu» možna było dvojčy zapoŭnić źniavolenymi», — adznačaje Alaksandra.
U sieradu Mižnarodnaja fiederacyja chakieja admianiła 18 turniraŭ, ale heta nie kranuła čempijanat u Minsku. Fiederacyja pad kiraŭnictvam Rene Faziela praciahvaje ciahnuć čas. Heta čas jana daje Łukašenku i jaho staŭlenikam — čas dla novych aryštaŭ. Fond Alaksandry Hierasimieni niekalki razoŭ papiaredžvaŭ IICHF i MAK pra pieraśled spartoŭcaŭ. Tolki ŭ pačatku hetaha tydnia čynoŭniki sa Šviejcaryi atrymali listy ab roli Baskava ŭ niadaŭnich padziejach i tryvožnych padazreńniach u dačynieńni da jaho. Ale MAK praciahvaje rasśledavańnie i pakul nie robić nijakich vysnoŭ. A Faziel i Rada IICHF addajuć pieravahu tamu, kab ničoha nie vyrašać. Jany trymajuć dźviery dla turniru ŭ Minsku adčynienymi.
Faziel adznačaje, što situacyja z čempijanatam patrabuje vielmi ŭvažlivaha analizu, a rašeńni pavinny być pryniaty z ulikam pandemii karanavirusa i biahučaj situacyi ź biaśpiekaj. Pry hetym Prezident IICHF zajaŭlaje, što na dadzieny momant pravieści turnir u Minsku było b niemahčyma.
IICHF, Faziel, takija hulni z dyktaturaj zabiaśpiečvajuć karyść tolki čynoŭnikam. Tak było ŭ Bierlinie ŭ 1936-m hodzie i ŭ Arhiencinie ŭ 1978-m. Ciapier historyja moža paŭtarycca ŭ Minsku ŭ 2021-m», — padsumoŭvaje Biekier.
Finski kałumnist Vahi Parviajnien tłumačyć u artykule dla Iltalehti, čamu Mižnarodnaja fiederacyja chakieja nie śpiašajecca admianiać čempijanat.
«U sieradu IICHF apublikavała zajavu z padrabiaznym apisańniem prablem, źviazanych z arhanizacyjaj čempijanatu śvietu ŭ Minsku, ale za abciakalnymi farmuloŭkami Fiederacyi ŭdałosia pramaŭčać pra toje, jak drenna iduć u Biełarusi spravy z pravami čałavieka. IICHF zachavała maŭčańnie pra ŭrad Łukašenki, jaki naśmichajecca nad zakonam i demakratyjaj. Pryčyna takich bieschrybietnych pavodzin tolki adna — hrošy.
Ja maju na ŭvazie nie karupcyju, tamu što śviedčańniaŭ najaŭnaści jaje ŭ IICHF u mianie niama, a strachavyja patrabavańni, strachoŭku. Kali Fiederacyja admienić ČS samastojna, to strachoŭki nie budzie. Hetaja situacyja znajomaja nam ź viasny, kali IICHF adkładała pryniaćcie rašeńnia pa čempijanacie śvietu ŭ Šviejcaryi. Admiena turniru ŭ adnabakovym paradku aznačała b stratu vialikich hrošaj, tamu treba było čakać rašeńnia šviejcarskich uładaŭ.
Z rašeńniem ad biełaruskich uładaŭ usio budzie jašče składaniej. Łukašenka nie pryznaje ni krytyki, ni surjoznaści situacyi z karanavirusam ŭ jaho krainie. Tamu IICHF pavinna vyrašyć sama, admianiać ci nie čempijanat śvietu. Uźnikaje pytańnie, čamu Fiederacyja kaža tolki ab admienie ČS, a nie ab jaho pieranosie ź Minska ŭ jakuju-niebudź demakratyčnuju i biaśpiečnuju krainu. Pieranos mieŭ by bolš pieravah niezaležna ad taho, adbudziecca turnir ci nie. IICHF vyratavała b svaju reputacyju, kali b apraŭdała svajo rašeńnie zachodnimi kaštoŭnaściami», — adznačyŭ Parviajnien.
Žurnalist dackaha vydańnia DR Łars Jorhiensen pryśviaciŭ vialiki materyjał situacyi z pravami čałavieka i ruchu svabodnych spartoŭcaŭ u Biełarusi. Padrabiazna jon spyniŭsia i na mahčymaści pieranosu čempijanatu śvietu pa chakiei ź Minska. Kałumnist ustrymaŭsia ad ułasnych vysnoŭ, ale źviazaŭsia z kiraŭnikom dackaj fiederacyi chakieja Chienrykam Bacham Nilsenam.
«Dla mianie najvyšejšuju kaštoŭnaść maje biaśpieka hulcoŭ i zaŭziataraŭ. My bačym, što sa žniŭnia situacyja ŭ Biełarusi nie palepšyłasia. I kali padazreńni adnosna kiraŭnika Biełaruskaj fiederacyi paćvierdziacca, to heta budzie niesumiaščalna z mahčymaściu praviadzieńnia čempijanatu śvietu ŭ Minsku. Heta budzie jak padlivańnie aleju ŭ ahoń. Ale pakul ja čuŭ ab hetaj infarmacyi tolki ź ŚMI. Na Radzie IICHF my heta nie abmiarkoŭvali», — ličyć Bach Nilsen.
