Juryj Vaskrasienski staŭ adnoj z samych cytavanych pierson na biełaruskim telebačańni. Złamany biełaruskimi śpiecsłužbami, jon viaščaje ŭsiakija niebylicy, jakija całkam adpaviadajuć aficyjnaj linii. I vydaje zadumy kiraŭnika z nahody dalejšych scenaroŭ.
Praz Vaskrasienskaha KDB paćviardžaje sens niečakanaj sustrečy Łukašenki ź viaźniami KDB. Meta padvojnaja: lehitymizavać pustyšku z «kanstytucyjnaj reformaj», kab advieści ŭvahu hramadskaści ad asnoŭnaha patrabavańnia (adstaŭka Łukašenki i novyja vybary) praz padklučeńnie da pracesu (častki) apazicyi, a z dapamohaj hetaha i darohu da adnaŭleńnia adnosin z Zachadam prakłaści.
Jak skazaŭ Vaskrasienski ŭ «intervju» prapahandystu Markavu, «treba zachavać šmatviektarnaść».
Z nahody ŭdziełu ŭ kanstytucyjnaj havarylni, KDB vusnami Vaskrasienskaha abiacaje, što prapanovy «buduć uličanyja samym dbajnym čynam», i biare apazicyju na pont: «Kali my ich [kanstytucyjnyja prapanovy] nie padadzim i nie voźmiem udzieł u lehalnym palityčnym pracesie, to jakija mohuć być u nas pretenzii da ŭłady potym? Nas zaprasili — davajcie rychtavacca».
U realnaści situacyja pakul blizkaja da advarotnaj: tyja palityčnyja siły, jakija klunuć na vykrut z «kanstytucyjnymi papraŭkami», stanuć palityčnymi trupami, tamu što 80% nasielnictva Biełarusi vydatna razumieje, što da čaho.
Vaskrasienski navat dzielicca płanami, jak ułady majuć namier budavać padkantrolny psieŭdademakratyčny praces. Pa-pieršaje, Usiebiełaruski schod płanujuć vykarystoŭvać dla farmalnaha adabreńnia papravak. Pa-druhoje,
hramadzianskuju aktyŭnaść i čakańni pieramienaŭ płanujuć «źlivać» praź fiktyŭnyja hramadskija rady pry vykankamach.
Niadobry namiok i pahrozu biełaruskija ŭłady pasyłajuć praz Vaskrasienskaha z nahody mahčymych ekstremisckich dziejańniaŭ typu padziei 3 lipienia 2008 hoda:
«Rana ci pozna ŭ lubym natoŭpie źjaŭlajucca ludzi nie zusim adekvatnyja, ź jakimi-niebudź psichičnymi adchileńniami. Moža być, heta hučyć na pieršy pohlad śmiešna, ale my pamiatajem situacyju 3 lipienia adzin raz, šmat hadoŭ tamu la Steły. I budzie absalutna nie śmiešna. Tamu treba spyniać vychodzić u niadzielu na hetyja akcyi. I pierakładać svaju aktyŭnaść u palityčnuju płoskaść. Ciapier ułada praciahnuła nam ruku, i hetuju ruku treba abaviazkova pacisnuć».
