U Rasii abjadnajuć Archanhielskuju vobłaść i Nienieckuju aŭtanomnuju akruhu. Pra heta zajaviŭ časovy vykanaŭca abaviazkaŭ kiraŭnika aŭtanomnaj akruhi Juryj Biazdudny ŭ razmovie z radyjostancyjaj «Hovorit Moskva».
Refierendum pa abjadnańni projdzie ŭžo ŭ 2020 hodzie.
Adnoj z pryčyn abjadnańnia Nienieckaj aŭtanomnaj akruhi (NAA) i Archanhielskaj vobłaści staŭ katastrafičny stan biudžetu NAA.
Amal pałova dachodaŭ biudžetu ciapier vypadaje z-za situacyi na naftavym rynku, pakolki jon byŭ raźličany z cany na naftu 57 dalaraŭ za baral. Pry hetym ułady abaviazanyja vykonvać finansavyja abaviazacielstvy pierad žycharami — vypłačvać lhoty, subsidyi.
Heta ŭžo nie pieršaja likvidacyja nacyjanalnych aŭtanomnych akruhaŭ u sučasnaj historyi Rasii.
U pieryjad z 2003 pa 2008 hod u Rasii prachodziła abjadnańnie aŭtanomnych akruhaŭ ź inšymi rehijonami. U vyniku abjadnańnia kolkaść subjektaŭ Rasii skaraciłasia z 89 da 83, ź ich aŭtanomnych akruhaŭ zastałosia 4 z 10.
U 2003 hodzie pačałosia stvareńnie Piermskaha kraju — Piermskaja vobłaść abjadnałasia z Komi-Piarmiackaj aŭtanomnaj akruhaj. Aficyjna novy rehijon źjaviŭsia ŭ 2005 hodzie.
U 2007 hodzie ŭ Krasnajarski kraj uvajšli dźvie jaho aŭtanomnyja akruhi. U hetym ža hodzie paśla abjadnańnia Kamčackaj vobłaści i Karakskaj aŭtanomnaj akruhi ŭtvaryŭsia Kamčacki kraj.
U 2008 hodzie Irkuckaja vobłaść pahłynuła Uść-Ardynskuju Burackuju akruhu, a Čycinskaja vobłaść i Ahinskaja Burackaja aŭtanomnaja akruha abjadnalisia ŭ Zabajkalski kraj.
