Ilustracyjnaje fota: mir.pravo.by
U dadatak da apastylu atestata VNU prosiać u ich dać daviedku, što škoła, jakuju abituryjent skančaje, moža vydavać dakumienty dziaržuzoru. Adnak Departamient jakaści adukacyi ŭ atrymańni takoha dakumienta niečakana staŭ admaŭlać, piša «Lusterka».
Andrej — tata 11-kłaśnika, jaki sioleta źbirajecca pastupać u adzin z polskich univiersitetaŭ. Mužčyna raspaviadaje, što zvyčajna daviedku, pra jakuju idzie havorka, vypuskniki brali ŭ Departamiencie kantrolu jakaści adukacyi Minadukacyi.
— U dakumiencie ŭtrymlivajecca infarmacyja, što škoła, jakuju skončyła dzicia, maje akredytacyju ŭ Biełarusi i moža vydavać dakumienty dziaržaŭnaha ŭzoru, — tłumačyć surazmoŭca. — Akramia taho, u joj ukazvajuć, što atestat, jaki padaŭ abituryjent, paćviardžaje: jaho ŭładalnik sapraŭdy atrymaŭ ahulnuju siaredniuju adukacyju i moža praciahnuć vučobu va ŭstanovach prafiesijna-techničnaj, siaredniaj śpiecyjalnaj i vyšejšaj adukacyi na terytoryi Biełarusi.
Jašče ŭ daviedcy jość źviestki «ab adpaviednaści adznak». Naprykład, toje, što acenki 9-10 bałaŭ adpaviadajuć piaciorcy («vydatna»), a, dapuścim, 6-8 — čaćviorcy («dobra»).
Andrej dakładna nie viedaje, ci patrebnyja takija daviedki va ŭsie zamiežnyja VNU. Ale polski ŭniviersitet, kudy źbirajecca jaho syn, taki dakumient prosić. Syn hetaj viasnoj zmoh atrymać patrebnuju daviedku. A voś ich znajomym, jakija źviarnulisia ŭ Departamient kantrolu jakaści adukacyi na dniach, u joj admovili.
Patłumačyli heta tym, što nibyta jaje vydača nie praduhledžanaja zakonam i raniej jaje taksama nielha było vypisvać.
Pa słovach surazmoŭcy, u čatach dzieci, jakija ŭ hetym hodzie źbirajucca pastupać za miažu, i ich baćki, pišuć, što i inšyja abituryjenty, jakija źviarnulisia niadaŭna ŭ Departamient, taksama sutyknulisia z padobnaj prablemaj.
— Znajomym skazali, kali hetuju daviedku ŭklučać va ŭkaz № 200, to jaje vydaduć, — raspaviadaje surazmoŭca i tłumačyć: — u hetym dakumiencie apisany administracyjnyja pracedury, jakija tyčacca adukacyi (naprykład, dublikaty jakich dakumientaŭ možna atrymać). Tut sapraŭdy niama źviestak ab hetaj daviedcy.
Što kažuć čynoŭniki?
U Departamiencie kantrolu jakaści adukacyi situacyju z daviedkami paćvierdzili. U pryjomnaj nie admaŭlali, što letaś vypuskniki taki dakumient atrymlivali.
— [Ale] na siońniašni dzień my takuju infarmacyju ŭžo nie vydajem, — paviedamili tam, — heta nie adnosicca da pieraliku administracyjnych pracedur (nie ŭvachodzić u pieralik [dakumientaŭ], zaćvierdžanych ukazam Łukašenki ad 2010 hoda №200). Tamu my, jak dziaržorhan, vydavać takuju infarmacyju nie možam. U hety pieralik uvachodzić tolki apastyl. Kali vam treba praapastylavać dakumient, tady, kali łaska, padychodźcie na Kazłova, 28 (adras departamienta).
Taksama žurnalisty spytali ŭ Departamiencie, jak być, kali ad hetaha dakumienta zaležyć pastupleńnie. U viedamstvie prapanavali napisać u Ministerstva adukacyi elektronny zvarot. Adkaz paabiacali ciaham 15 dzion.
— Heta budzie jak pierapiska: vy napisali, vam adkazali. Ci budzie heta źjaŭlacca dakumientam dla toj ža Polščy, ja nie viedaju, — skazali ŭ Departamiencie.
Akramia taho, tam nahadali, što niekatoryja škoły raźmiaščajuć siertyfikaty z paćviardžeńniem akredytacyi na svaich sajtach. Mahčyma, vykazała zdahadku čynoŭnica, zamiežnamu ŭniviersitetu budzie dastatkova hetaha fota.
— U nas usie škoły akredytavanyja, tamu jany vydajuć dakumient ab adukacyi, — nahadali tam.
Andrej raspaviadaje, što ludzi, jakija trapili ŭ takuju biurakratyčnuju pastku, u listach płanujuć ukazvać nastupnaje: «Ja taki, skončyŭ škołu tady, moj atestat numar taki, prašu paćvierdzić, što škoła (paznačyć jaje nazvu) maje prava vydavać atestaty i hety dakumient dazvalaje mnie dalej atrymlivać adukacyju ŭ VNU».
Čytajcie taksama:
U Minadukacyi pierastali vydavać daviedki ab lehalnaści atestataŭ
U škołach źjavicca siem novych fakultatyvaŭ
U Polščy vyjavili «studenckuju» častku vizavaha skandału. Nastupstvy mohuć zakranuć i biełarusaŭ
