kremlin.ru
Viktar Marcinovič na budzma.by razvažaje pra dačynieńni Rasii i Biełarusi, jakija padčas pandemii zrabilisia krainami-antahanistami.
My bačym, jak da tradycyjnych prablemnych tem u dačynieńniach Rasii i Biełarusi: nafty, hazu, tranzitu, abjadnańnia hrašovych sistem — voś prosta ciapier dałučajecca jašče adna — karanavirus. Luboje palityčnaje abjadnańnie, kali jano isnuje chacia b niejak, musić prajaŭlać siabie ŭ krytyčnyja momanty. Sajuźniki, kali jany sapraŭdy sajuźniki, musiać nie sabačycca, a dapamahać adno adnamu.
Zamiest hetaha my bačym, jak TH-kanały «ruskaha śvietu» pierachodziać u nastup na Biełaruś pa «virusnaj temie», u Biełarusi błohiery zadajucca pytańniem, ci nie budzie z boku Maskvy ŭvodu «miedyčnych vojskaŭ», rekrutavanych z «vietlivych ludziej», a aficyjnyja asoby Biełarusi dajuć voś takija intervju.
Prabačcie, ale z Kitajem u Rasii (i ŭ Biełarusi z Kitajem!) supolna supraćstajać vyklikam virusa atrymlivajecca lepiej, čym z RB. Pry tym, što Kitaj — vidavočny kankurent Rasii i «sajuznych damovaŭ» ź joj nie padpisvaŭ.
Šmat chto ŭžo zaznačaŭ, što «virusny kryzis-2020» padzielić mapu śvietu razčej, čym Pieršaja suśvietnaja vajna, i kontury novych padziełaŭ možna ŭbačyć užo ciapier. I pra adno možna kazać całkam peŭna: bližej adna da adnoj Rasija i Biełaruś nie zrobiacca. Chutčej naadvarot.
Čamu tak adbyłosia?
Spačatku Biełaruś nie mahła «daravać» Rasii zanadta «samastojnaj» palityki z zakryćciom miežaŭ.
Ja nie viedaju, ci pravodzilisia niejkija kansultacyi pa supolnaj pamiežnaj palitycy padčas epidemii, ci była sproba vypracavać adzinyja padychody, jakija my bačym u krainach Šenhienskaj zony. Kali nie pravodzilisia, vialikaje pytańnie čamu. I navošta taja adkrytaja miaža, kali jana zakryjecca adrazu ž, jak čort chvastom laśnie.
Ale ŭ biahučy momant Rasija i Biełaruś zrabilisia krainami-antahanistami ŭ pytańni palityki supraćstajańnia virusnaj pahrozie. Niama ŭ śviecie bolš adroznych mieraŭ, čym tyja, jakija prosta ciapier prymajucca ŭ Maskvie i ŭ Minsku. Maskvu zakryvajuć na ŭjezd, vystaŭlajuć kardony pa pierymietry, u Maskvie ludziej zatrymlivajuć za vyhuł sabak, u Biełarusi čarhovym razam zajaŭlajuć, što karanavirus — «psichoz», jaki da taho ž užo «zhortvajecca».
Što cikava, ludzi jenčać i ŭ Biełarusi, i ŭ Rasii. Isus Varabjoŭ zrabiŭsia takim samym ściaham maskoŭskich libierałaŭ, niezadavolenych łakdaŭnam, jak taja viciebskaja doktarka, jakuju vyklikali ŭ prakuraturu ŭ Biełarusi, — dla biełarusaŭ. I pytańnie tolki ŭ tym, chto tut — Łukašenka ci Pucin — maje racyju ŭ niejkim kančatkovym sensie.
Bo padsumavańnie kolkaści achviaraŭ usio ž budzie. I kali achviaraŭ stanie šmat — schavać heta hulniami sa statystykaj budzie niemahčyma.
I paviercie, taja kolkaść zachvarełych i achviar u Biełarusi zrobicca klučavoj temaj u bujnych dziaržaŭnych miedyja Rasii, bo hramadzianam RF treba niejak rastłumačyć, dziela čaho jany byli zamknutyja minimum dva tydni. Što Sabianin mieŭ racyju, a «sajuźniki» — nie.
I što mianie jak čałavieka, što naradziŭsia ŭ Biełarusi i źjaŭlajecca biełaruskim hramadzianinam, turbuje ŭ hetym supraćstajańni «sajuznych» padychodaŭ — dyk heta vielizarnyja čerhi z «chutkich», jakija ŭsie vychadnyja stajali na darohach, što viaduć da lakarniaŭ, jakija prymali karanavirusnych pacyjentaŭ u Maskvie i jaje navakolli.
Jašče Skaryna ŭ pradmovie da knihi «Judzif» daŭ nam zapaviet mieć «vialikuju łasku» da miesca, dzie ty «byŭ uzhadavany ŭ Bozie». I nastupaje składany momant dla luboha biełarusa — hladzieć na maskoŭskija miery i razumieć, što jany adekvatniejšyja za našy. Padličvać: kali Isusa Varabjova zatrymali za vychad z kvatery jašče 4 krasavika, a čerhi z «chutkich» źjavilisia tolki na hetych vychadnych, dyk što budzie ŭ Biełarusi praz 2 tydni?
Ci musić biełaruski patryjot taksama dumać, što virus — psichoz i lačycca treba traktaram i kozačkami?
Ja nie viedaju, jaki adsotak bravady, što vypramieńvajuć biełaruskija najvyšejšyja čynoŭniki, pachodzić ad žadańnia pieraadoleć ułasnyja BSSRaŭskija kompleksy niepadparadkavańnia Maskvie. I jak nahadać hetym ludziam, što łakdaŭn byŭ nie tolki ŭ Rasii, ale i ŭ Jeŭropie i šmat dzie pryvioŭ da dobraj dynamiki.
I što admianić parad — nie soramna.
Što SSSR užo raspaŭsia, pryčym daŭno. I što «braty», «siabry», «sajuźniki» — heta tyja ludzi, jakija musiać supolna supraćstajać navale. Kali b Druhaja suśvietnaja, jakuju vy ŭvieś čas zhadvajecie, zdaryłasia b ciapier, vy b zmahalisia ŭ joj, adharadziŭšysia adno ad adnaho miežami, spaborničali ŭ ličbach strataŭ, a paśla znoŭku abviaščali siabie bratami pa zbroi?
