Prapanoŭ ab pastaŭkach i pierapracoŭcy ŭ Biełarusi nafty ŭžo niamała. Pra heta Alaksandr Łukašenka zajaviŭ siońnia na sustrečy sa staršynioj kancerna «Biełnaftachim» Andrejem Rybakovym i vice-premjeram Juryjem Nazaravym, pieradaje BIEŁTA.
«Tema razmovy, jak vam viadoma, raniejšaja — pastaŭki ŭ Biełaruś vuhlevadarodnaj syraviny, pierš za ŭsio nafty. Da mianie pastupiŭ šerah prapanoŭ pa pastaŭkach nafty i pierapracoŭcy ŭ Biełarusi. Ciapier takich prapanoŭ ŭžo, dziakuj Bohu, niamała. Ja chaču z vami ŭzhadnić niekatoryja pytańni. I paraicca, jakim čynam nam (varta, nie varta kuplać hetuju naftu) lepš pastupić, što bolš ekanamična vyhadna», — skazaŭ kiraŭnik dziaržavy.
«Dumaju, što my znojdziem rašeńnie. Ja vas tuzanuŭ u vychodny dzień, bo pytańnie nie tryvaje adkładańnia. Nam treba prymać rašeńnie i ŭžo z paniadziełka-aŭtorka zabirać hetuju naftu. Bo abjomy vialikija — bolš za 6 młn ton», — dadaŭ Alaksandr Łukašenka.
Nahadajem, u aŭtorak 3 sakavika Alaksandr Łukašenka taksama pravioŭ naradu pa pytańniach zabieśpiačeńnia efiektyŭnaj raboty naftapierapracoŭčaha kompleksu krainy ŭ 2020 hodzie i na pierśpiektyvu.
Jon kanstatavaŭ, što asobnyja dziaržavy zrazumieli, što pry dapamozie vientyla na naftavaj trubie vyhadnyja im pytańni vyrašajucca značna lahčej. Niahledziačy ni na jakija ŭzajemnyja abaviazacielstvy, takaja praktyka stała prymianiacca i ŭ dačynieńni da Biełarusi. U toj ža čas mienavita na naftavuju syravinu zaviazanyja nie tolki patreby ŭnutranaha rynku paliva, ale i stabilnaja praca chimičnych i inšych pradpryjemstvaŭ.
«My nieapraŭdana zacyklilisia na niekalkich pastaŭščykach i nie majem doŭhaterminovych alternatyŭnych krynic syraviny. Nafta — nie manapolny tavar, i achvotnych pracavać z nami dastatkova navat u samoj Rasii. Pastaŭščykoŭ treba znachodzić, ź imi treba damaŭlacca. I heta zadača numar adzin. Asabliva ŭ ciapierašniaj niaprostaj situacyi ŭ śviecie, u tym liku z našym partnioram-manapalistam», — zajaviŭ u aŭtorak Alaksandr Łukašenka.
Nie mienš intensiŭna, padkreślivaŭ kiraŭnik dziaržavy, varta adpracoŭvać łahistyku pastavak. U hetym płanie nieabchodnyja nie prosta dahavory na transparciroŭku nafty, a kompleksnyja i sistemnyja infrastrukturnyja rašeńni, varta pradumać mahčymaść realizacyi sumiesnych prajektaŭ z zamiežnymi kampanijami — ułaśnikami syraviny.
