Kolkaść zahinułych ad śmiarotnaha karanavirusa ŭ kitajskim horadzie Uchań, pravincyja Chubej, pavialičyłasia da 6 čałaviek.
Na apošnich źviestkach, usiaho ŭ horadzie zarehistravana 227 vypadkaŭ zaražeńnia novym virusam, ź jakich 25 vypisanyja sa špitalaŭ, u toj čas jak 11 čałaviek znachodziacca ŭ krytyčnym stanie, 51 — u ciažkim, 6 čałaviek pamierli.
Karanavirus 2019-nCoV vyklikaje pnieŭmaniju. Pieršyja vypadki zaražeńnia byli zafiksavanyja ŭ horadzie Uchań na rynku morapraduktaŭ. Tamu ekśpierty vykazali zdahadku, što jon raspaŭsiudžvajecca praz pradukty ź miasa marskich sysunoŭ, naprykład białuch (biełych delfinaŭ). Taksama tam pradajuć kurej, kažanoŭ, trusoŭ, źmiej, adznačaje Bi-bi-si. Chutčej za ŭsio, siarod ich i varta šukać krynicu zaražeńnia.
Tryvohu vyklikaŭ toj fakt, što virus raspaŭsiudžvajecca ad čałavieka da čałavieka. Jak paviedamili ŭłady Kitaja, zaraziłasia ŭžo 15 miedycynskich rabotnikaŭ, što lekavali pieršych chvorych.
Aeraporty ZŠA, Aŭstralii i bolšaści krain Azii paviedamili, što ŭvodziać miedyčny skryninh dla pasažyraŭ na rejsach z Uchania. Situacyja ŭskładniajecca tym, što ŭ Kitai ciapier śviatkujecca Novy hod i sotni miljonaŭ ludziej tam pieramiaščajucca z rehijona ŭ rehijon.
22 studzienia adbudziecca ekstrannaje pasiadžeńnie Suśvietnaj arhanizacyi achovy zdaroŭja z-za novaha śmiarotnaha karanavirusa 2019-nCoV. Tam buduć vypracavany rekamiendacyi dla baraćby z 2019-nCoV.
