U kancy minułaha hoda da administracyjnaha aryštu za ŭdzieł u antyintehracyjnych akcyjach pratestu było asudžana 11 čałaviek. Bolšaść ź ich adbyvali sutki ŭ sumnaviadomym Centry izalacyi pravaparušalnikaŭ na Akreścina ŭ Minsku. Amal usie aryštavanyja praviali ŭ izalatary i Novy hod. Ci atrymałasia im niejak adśviatkavać hety dzień? «NN» raspytała byłych viaźniaŭ.
Pavieł Sieviaryniec, sustaršynia Biełaruskaj chryścijanskaj demakratyi
Pavieł Sieviaryniec z žonkaj Volhaj i synam Franciškam. Fota z facebook.com.
«Na Novy hod u kamiery byŭ sa ślesaram-stanočnikam z Zavodskaha rajona, jaki ŭstaloŭvaje łaŭki. Vypili višniovaha soku ŭ honar hetaha dnia, zakusili sałam i chlebam. Z vulicy čuŭ, jak hukali «Žyvie Biełaruś». Zrazumieŭ, što hetkim čynam padtrymlivajuć nas, palityčnych.
Na Rastvo ŭsio było padobna. Tolki ŭ kamiery nas było čaćviora, a sok byŭ piersikavy, jaki pieradała mnie [žonka] Volečka, dziakuj joj. Byli jašče cukierki-«rafaełki». Pamalilisia kamieraj, pierakusili. Mahčymaść pačytać Bibliju ci pamalicca na Akreścinie zaŭsiody jość.
Staŭleńnie administracyi było jak zaŭsiody kiepskaje. Mnie prosta daviałosia vykinuć dva pakunki z adzieńniem, bo heta praściej, čym jaho vyparvać ad vošaŭ. Sprava ŭ tym, što ŭ kamiery, kudy adpraŭlajuć palityčnych, spačatku sadžajuć biazdomnych.
Mnie, piśmieńniku, tolki na 14-ja sutki dazvolili ručku.
A dvoje apošnich sutak siadzieŭ z čałaviekam, u jakoha była biełaja haračka. Jamu zdavałasia, što my nibyta chavajem ad jaho televizar.
Palityčnych razam nie sadžali, źmianili taktyku. Adnačasova nas na Akreścinie było dzieviać čałaviek, ale pakolki kamier bolš za dvaccać, to nichto ni z kim nie pierasiakaŭsia».
Aleś Čacholski, adkazny sakratar KCHP-BNF
Fota euroradio.fm.
«Vielmi cikavyja ludzi sa mnoj siadzieli. Byłyja zeki: adzin adsiedzieŭ 21 hod (u tym liku siamnaccać hadoŭ za zabojstva), druhi — 26 (usie za kradziažy). Apošni kazaŭ, što daŭno choča saskočyć z hetaj ściažyny, ale jaho zahnali ŭ koła, nichto nie biare na pracu.
Na Novy hod vypili pa «śviatočnaj» šklancy vady i zakusili «śviatočnym» kavałkam sała. Charčavalisia ŭ kamiery najpierš za moj košt, bo tolki mnie byli pieradačy. A tak usio zvyčajna: adboj a 22-j, padjom — a 6-j.
Ja apošni raz siadzieŭ na sutkach u 1999 hodzie. Nu dyk u pobytavym płanie ŭmovy stali lepšymi. Kali raniej u kamiery była draŭlanaja «scena», to ciapier jość asobnyja łožki z matracami, jość aharodžany sanvuzieł. Kali ty spraŭlaješ naturalnuju patrebu, to ŭžo nie na vačach usioj kamiery.
Što tyčycca čałaviečaha staŭleńnia, to tut mała što źmianiłasia — ty nichto i zvać ciabie nijak. Asabliva heta tyčycca navat nie palityčnych, a zvyčajnych žycharoŭ Akreścina. Dla piersanału jany prosta bydła. Zrešty, usio zaležyć ad čałaviečaha faktaru, ad źmieny. Ale jość i ščyryja sadysty, jakija nie pavinny słužyć u pravaachoŭnych orhanach».
Stas Šašok, udzielnik kampanii Legalize Belarus
Stas Šašok u pieršyja chviliny paśla vyzvaleńnia. Fota z facebook.com.
«Sustreŭ Novy hod u kamiery ŭ adzinocie. Majho sukamiernika vyzvalili dzieści 30 śniežnia, i da 4 studzienia ja zastavaŭsia absalutna adzin. Padarunkaŭ ad administracyi ŭ hety dzień nie było. Pra toje, što Novy hod nastupiŭ, zrazumieŭ sa śviatkavańnia, jakoje adbyvałasia ŭ susiedniaj čaści ŭnutranych vojskaŭ.
Svoj čas na sutkach pryśviačaŭ čytańniu. U mianie z saboj byli «Kałasy pad siarpom tvaim» Uładzimira Karatkieviča, taŭščeznaja kniha «Anhlijskaja na kožny dzień», a taksama Biblija i Novy Zapaviet. Padumałasia: dzie jašče budzie lepšy šaniec pačytać Bibliju, jak nie padčas aryštu?»
