Zasnavalnica sajta Volha Karač pradała infarmacyjny resurs minskamu startap-technołahu Alaksieju Šabłoŭskamu. Redakcyja ŭ poŭnym składzie pakinuła vydańnie. Na sajcie bolš niama aŭtarskich materyjałaŭ, jon staŭ zvyčajnym dajdžestam navin, piša baj.by.
Naviedniki sajta, jaki ciaham piaci hadoŭ byŭ adnym ź niešmatlikich niezaležnych hramadska-palityčnych resursaŭ rehijona, zaŭvažyli źmieny na pačatku śniežnia minułaha hoda. Z sajta źnikli žurnalisckija daśledavańni, materyjały krajaznaŭčaj tematyki, artykuły pra prablemy haradskoha žyćcia — usio toje, što niekali zrabiła resurs papularnym.
Volha Karač: «Sajtu byŭ patrebny novy administratar»
Byłaja ŭładalnica «Vitiebskoho kuŕjera» Volha Karač tłumačyć:
— Redakcyjny kalektyŭ za čas isnavańnia sajta prafiesijna vyras, ale «nie daciahvaŭ» administracyjny bok. Asabista ja zajmacca spravami sajta nie paśpiavała, a adkaznaha za heta čałavieka ŭ nas nie było. My abviaścili, što sajt pradajecca, i adnym z achvotnych jaho nabyć byŭ Alaksiej Šabłoŭski. My niekalki razoŭ sustrakalisia pierad prodažam i damovilisia, što novy haspadar pakinie na pracy ŭvieś kalektyŭ redakcyi i budzie płacić žurnalistam zarobak pieršyja šeść miesiacaŭ. Za hety čas, mierkavałasia, resurs zmoža samastojna zarablać hrošy.
Pavodle Volhi Karač, novy ŭładalnik abiacaŭ ciaham hetaha času nie ŭmiešvacca ŭ pracu redakcyi, a zajmacca tolki techničnym pytańniami. Praŭda, usie damoŭlenaści byli tolki ŭ vusnaj formie. Redakcyjny kalektyŭ adpracavaŭ pad kiraŭnictvam novaha ŭłaśnika ŭsiaho adzin miesiac — listapad 2019 hoda. Volha Karač kaža, što škaduje pra prodaž resursu, ale paŭpłyvać na situacyju ŭžo nie moža.
Alaksiej Šabłoŭski: «Vitiebskij kuŕjer» zastajecca rehijanalnym. Pra pierśpiektyvy razmaŭlać pakul rana
Novy ŭłaśnik sajta Alaksiej Šabłoŭski žyvie ŭ Minsku, źjaŭlajecca dyrektaram centra «Startap Technałohii». Jon nie admaŭlaje, što ad pačatku byli damoŭlenaści pra supracu z kalektyvam redakcyi i pra toje, što sajt zachavaje rehijanalnuju tematyku.
Na dumku Alaksieja Šabłoŭskaha, supracoŭnictva nie atrymałasia tamu, što jahonyja rekamiendacyi admoviłasia vykonvać redaktarka Volha Radziuk. A potym jana nibyta «nastroiła suprać» i ŭsich žurnalistaŭ. Novy haspadar ličyć, što raniejšaja redakcyjnaja stratehija nieprymalnaja, bo jana nie pryniasie prybytku. Ale pra novuju stratehiju razmaŭlać jašče rana, kaža Alaksiej Šabłoŭski:
— Mahu skazać ćviorda: sajt zastajecca rehijanalnym. Ale z redakcyjaj u raniejšym składzie my supracoŭničać nie budziem. Budziem nabirać novuju kamandu, a redakcyjnaja palityka budzie zaležać ad novaha redaktara. Jon budzie vyznačać źmiest i napramak vydańnia. Viadoma, nie mahu vyklučać, što pradam sajt, kali heta budzie metazhodna.
Volha Radziuk: «Mnie vielmi škada, ale «Vitiebskij kuŕjer» pamiraje
Byłaja redaktarka «Vitiebskoho kuŕjera» Volha Radziuk adznačaje, što za hady svajho isnavańnia vydańnie zajmieła šmat prychilnikaŭ i dobruju reputacyju ŭ rehijonie, bo dapamahała vyrašać kankretnyja prablemy miascovych žycharoŭ. Jana miarkuje, što novy ŭłaśnik hetaha nie cenić:
— Padčas papiarednich pieramoŭ my ŭsie bačyli niakiepskija pierśpiektyvy. Prynamsi, ja spadziavałasia, što Alaksiej Šabłoŭski budzie zajmacca techničnym bokam spravy, a ja budu pracavać z žurnalistami. Ale praź miesiac jon pačaŭ vystaŭlać nieprymalnyja ŭmovy pracy, i ja syšła. Na kalektyŭ nichto nie cisnuŭ: kožny moh zastacca pracavać na sajcie. Ale ź niekatorymi, nakolki ja viedaju, razmoŭ pra dalejšaje supracoŭnictva navat nie było. Vielmi škada, što miascovy resurs, na aŭtarytet jakoha my stolki pracavali, prosta splažany.
Volha Radziuk kaža, što paśla sychodu sprabavała naładzić stasunki z ułaśnikam, kab tolki zachavać redakcyjny skład i mahčymaść drukavać aŭtarskija materyjały, za jakija hety sajt palubili čytačy. Ale Alaksiej Šabłoŭski, pavodle jaje słoŭ, nie pajšoŭ na pieramirje.
Pavodle nazirańniaŭ Volhi Radziuk, naviedvalnaść sajta rezka ŭpała, niahledziačy na vykarystańnie techničnych srodkaŭ, kab utrymlivać jaje na peŭnym uzroŭni. Byłaja redaktarka ličyć, što Viciebski rehijon, dzie i tak praktyčna niama niezaležnaj presy, straciŭ jašče j internet-resurs, jaki byŭ trybunaj dla hramadskich aktyvistaŭ, srodkam vyrašeńnia prablem dla haradžan i krynicaj cikavaj infarmacyi dla naviednikaŭ.
