Skradzienyja 40 hadoŭ tamu karciny Hansa Holbiejna starejšaha, Jana Brejhiela starejšaha, Fransa Chalsa, Jana Liviensa i Antonisa van Dejka vyjaŭlenyja ŭ FRH, paviedamlaje interfax.ru sa spasyłkaj na Spiegel Online.
U 1979 hodzie nieviadomyja skrali z muzieja ŭ zamku Frydenštajn u horadzie Hota piać karcin starych majstroŭ, heta stała najbujniejšym kradziažom pradmietaŭ mastactva ŭ HDR. Pavodle vydańnia, z kanca vieraśnia karciny znachodziacca ŭ łabaratoryi fondu Dziaržaŭnych muziejaŭ Bierlina, tam ich praviarajuć na sapraŭdnaść.
Paviedamlajecca, što oberburmistr horada Hota mnohija miesiacy vioŭ sakretnyja pieramovy z advakatam z paŭdniovaj Hiermanii, jaki zajmajecca «lehalizacyjaj» skradzienych pradmietaŭ mastactva. Advakat kazaŭ burhamistru, što pradstaŭlaje «spadkajemcaŭ», za piać pałotnaŭ jon zapatrabavaŭ 5,25 młn jeŭra.
Ciapier u adnosinach da advakata i jaho pastaŭščyka, niejkaha doktara z Uschodniaj Fryzii, rehijonu na paŭnočnym zachadzie FRH, zaviedziena kryminalnaja sprava pa padazreńni ŭ vymahalnictvie i skupcy skradzienaha. Palicyja praviała pieratrusy ŭ kvaterach i ofisach padazravanych i troch śviedkaŭ, byli znojdzienyja dokazy.
Karcina Liviensa, pra jakuju idzie havorka, nazyvajecca «Stary», heta kopija karciny Rembrandta, aryhinał znachodzicca ŭ zbory ŭniviersiteta Harvarda. Taksama ŭ liku vykradzienych karcin — «Partret nieviadomaha spadara ŭ kapielušy i palčatkach» Chalsa i majsterni; «Śviataja Kataryna» Holbiejna — karcina datujecca 1509—1510 hodam; «Aŭtapartret z słaniečnikam» van Dejka (kopija aŭtapartreta, zroblenaja samim mastakom, aryhinał znachodzicca ŭ zbory hiercaha Vestminstera); «Viaskovaja vulica z vazami i karovami» Brejhiela-starejšaha.
Pakul nie viadoma, jak mienavita karciny trapili da skupščykaŭ.
