Zimoj dzień karotki, a noč doŭhaja i chałodnaja. Zdabyć korm u zimovy čas robicca ciažej, ale pry hetym jaho treba bolš: ptuškam treba dadatkovaja enierhija, kab sahrecca. Asabliva ciažka ptuškam, kali halinki i ziamla pakryvajucca ldom paśla adlihi i marozu.
Siniaja sinica na karmušcy. Fota Anastasii Siarhiejevaj
Karmuška na drevie ci za aknom — vydatny sposab dapamahčy drobnym ptuškam pieražyć zimu i panazirać za imi.
Dzie ŭziać karmušku?
Siońnia karmušku možna lohka nabyć u roznych kramach, u tym liku budaŭničych. A možna prajavić tvorčaść i zrabić jaje svaimi rukami z dreva, płastykavaj butelki abo navat z šyšak. Važna, kab dno karmuški było z adtulinami, adkul budzie vyciakać lišniaja vilhać. I nie zabyvaj rehularna čyścić ptušynuju stałoŭku.
Paraicca z adnadumcami nakont karmušak i padkormki možna ŭ telehram-čacie «Ciŭ-ciŭ».
Što kłaści ŭ karmušku?
Samy ŭniviersalny korm dla ptušak — niesalonyja niasmažanyja siemki słaniečnika. Smačna, karysna, dastupna. Krupy takoj papularnaściu ŭ vierabjinych ptušak nie karystajucca.
Raznastaić mieniu možna nasieńniem rapsu, lonu, harbuzovymi siemkami, arachisam, kavałačkami jabłyka dy jahadami. Kali chočaš zrabić asablivy padarunak dla sinic i dziatłaŭ, pryčapi na halinku kavałak niesalonaha niasmažanaha sała.
Jakaja ježa škodnaja ptuškam?
Ni ŭ jakim razie nie karmi ptušak reštkami sa svajho stała. Nie kładzi ničoha smažanaha, piečanaha i salonaha ŭ karmušku. Chleb, jak čorny, tak i bieły, jak śviežy, tak i suchi, — nieprydatnaja ježa dla ptušak.
Kaho čakać na karmušcy?
Navat u horadzie akramia damavych i palavych vierabjoŭ, sinich i vialikich sinic da ciabie na karmušku mohuć zavitać zielanuški, taŭstadziuby, papaŭźni, hili, dziatły, sojki, čyžy, amiałuški dy inšyja kryłatyja hości.
Ci treba padkormlivać kačak i lebiedziaŭ?
Vadapłaŭnych ptušak častavać varta tolki ŭ vialikija marazy, kali tempieratura trymajecca na ŭzroŭni nižej za 15 hradusaŭ marozu. Lebiedziam i kačkam možna prapanavać ziernie, krupy i aŭsianyja šmatki, ale nie treba davać im chleb i baton: jany dajuć adčuvańnie sytaści na karotki čas, ale nie majuć patrebnych ptuškam karysnych rečyvaŭ.
Vialikaja sinica z areškam. Fota Anastasii Siarhiejevaj
