Paśla praciahłych avijaŭdaraŭ i abstrełu «Hradam» jany vysadzili desant z metaj atačyć hruzinski ŭmacavany rajon u Ažary. Ale a 12.50 pa maskoŭskim časie źjaviłasia paviedamleńnie ab tym, što prezydent Rasiei Dźmitry Miadźviedzieŭ zahadaŭ spynić vajennyja dziejańni. A pad viečar Sarkazi ŭdałosia pierakanać Rasiju advieści vojski na pieradvajennyja pazycyi.
Sa słovaŭ Miadźviedzieva, meta «aperacyi zmušeńnia Hruzii da miru» dasiahnutaja. «Biaśpieka rasijskich hramadzianaŭ i miratvorčych siłaŭ adnoŭlenaja, ahresar pakarany i panios značnyja straty», — skazaŭ Miadźviedzieŭ. Jon daručyŭ Hienštabu rasiejskich vojskaŭ «pry novaj ahresii z hruzinskaha boku prymać rašeńnie pa źniščeńni ahresara».
Paśla pieramovaŭ Miadźviedzieva z Sarkazi, da jakich na abiedzie dałučyŭsia Pucin, stała viadoma, što Rasieja pahadziłasia na šeść pryncypaŭ, prapanavanych Sarkazi, z svaimi ŭdakładnieńniami. Pryncypy pieraličyŭ na pres-kanferencyi Miadźviedzieŭ:
«Pieršy — nie prybiahać da vykarystańnia siły. Druhi — kančatkova spynić usie vajennyja dziejańni. Treci — svabodny dostup da humanitarnaj dapamohi. Čaćviorty — uzbrojenyja siły Hruzii viartajucca ŭ miescy svajoj stałaj dyślakacyi. Piaty — uzbrojenyja siły Rasiei vyvodziacca na liniju, što papiaredničała pačatku bajavych dziejańniaŭ. Šosty — pačatak mižnarodnaha abmierkavańnia pytańniaŭ budučaha statusu Paŭdniovaj Asiecii i Abchazii i šlachoŭ zabieśpiačeńnia ich tryvałaj biaśpieki».
Niahledziačy na vialikija straty — jak pišuć karespandenty rasiejskaha vydańnia gazeta.ru z rasiejskaha boku linii frontu hruzinskija nasielenyja punkty vakoł zony kanfliktu zrujnavanyja dazvańnia — hruzinskija vojski akazali Rasiei ŭpartaje supraciŭleńnie. Pavodle zajavaŭ hruzinskaha boku, im udałosia źbić 19 rasiejskich samalotaŭ. Rasieja pryznaje stratu tolki 4-ch mašynaŭ, u tym liku stratehičnaha bambavika Tu-22. Heta ŭ lubym razie bolej, čym straciła ZŠA za aktyŭnuju fazu bajavych dziejańniaŭ u Iraku. Gazeta.ru taksama paviedamlaje pra toje, što ŭ Cchinvali možna nazirać mnoha padbitaje rasiejskaje techniki.
Uranku miascovaje nasielnictva ŭ pamiežnych z Abchazijaj i Asiecijaj rajonach Hruzijaj u panicy pakidała svaje damy. Kadory i Zuhdzidzi apuścieli.
Aperacyja na zachodnim froncie pačałasia z trochdzionnych avijaŭdaraŭ. Rasija tym časam uviała ŭ Abchaziju dadatkovuju desantnuju dyviziju i blakavała marskoje ŭźbiarežža Hruzii.
Šturm Kadory — hruzinskaha bastyjonu na darozie z Abchazii ŭ serca krainy — pačaŭsia na dośvitku ŭ aŭtorak,a 4-j ranicy pa miascovym časie. Abchaskija vojski zadziejničali roznyja vidy ŭzbrajeńniaŭ, u tym liku artyleryju i ŭstanoŭki załpavaha ahniu «Hrad», paviedamiŭ u efiry rasiejskaha telekanału «Viesti-24» ministar zamiežnych spraŭ Abchazii Siarhiej Šamba.
Paźniej u nizie ciaśniny byŭ vysadžany desant u składzie 250 čałaviek.
Hruzinski harnizon naličvaje 3000 vajskoŭcaŭ. Rasiejska-abchaskija siły pieraŭzychodziać jaho ŭ žyvoj sile ŭ 5 razoŭ, a pa ŭzbrajeńniach — na paradak. Atakujučyja raźličvajuć taksama na paniku ŭ šerahach hruzinskich vojskaŭ.
Rasijskaja avijacyja praciahvała nanosić udary pa horadzie Hory.Haryć universytet Hory. U liku achviaraŭ u hetym nasielenym punkcie siońnia akazaŭsia taksama niderlandzki žurnalist.
Rasiejskija vajskoŭcy ruchajucca na poŭdzień Abchazii.
U Cchinvali prybrali, pakinuli stajać tolki padbity hruzinski tank.
Žyćcio ŭ horadzie patrochi naładžvajecca.
U bajach byli razburanyja mnohija žyłyja damy.
Spustošany i hruzinski horad Hory, jaki bambiła rasiejskaja aiviacyja.
U Tbilisi a 13:00 pa miascovym časie raspačynajecca nadzvyčajnaje pasiedžańnie parlamentu, sklikanaje prezydentam.
Zachad pakul abmiažoŭvajecca słovami padtrymki, ale nie akazvaje nijakaj realnaj dapamohi Hruzii.
Siońnia
ŭ Tbilisi ŭ jakaści žestu padtrymki skiravalisia prezydenty Polščy, Litvy, Ukrainy, premjer-ministry Łatvii i Estonii.U svajoj zajavie prezydent Estonii Toomas Chendryk Ilvies, prezydent Łatvii Vałdzis Zatlers, prezydent Litvy Vałdas Adamkus i prezydent Polščy Lech Kačyński asudzili ŭvarvańnie ŭ suverennuju i niezaležnuju Hruziju i paabiacali vykarystać usie srodki, jakija jany majuć u svaim rasparadžeńni, kab spynić rasiejskuju vajennuju ahresiju ŭ dačynieńni da maleńkaj eŭrapiejskaj dziaržavy. Pierad vyletam u Tbilisi prezydent Polščy mieŭ razmovu z prezydentam ZŠA Džordžam Bušam. U toj ž čas polski ŭrad vystupiŭ z zaściarohami adnosna pajezdki prezydenta.
Učora ŭdzień i ŭnačy hruzinski ŭrad pierasoŭvaŭ vojski na liniju abarony ŭ niepasrednaj blizkaści ad Tbilisi, bo nie vyklučaŭ šturmu horadu. Tym časam zachodnija ŭrady praciahvali dyplamatyčny cisk na Maskvu, niahledziačy na adsutnaść ryčahoŭ uździejańnia. U Hruzii sytuacyju paraŭnoŭvali z 1921 hodam, kali balšaviki akupavali krainu i skinuli ŭrad Hruzinskaj Demakratyčnaj Respubliki.
Zachop Hruzii abo źmiena ŭradu ŭ Tbilisi na maryjanetkavy pryviała b da poŭnaha kantrolu Maskvy nad šlachami pastavak nafty i hazu ŭ Eŭropu z Centralnaje Azii i vyklikała b u stalicach eŭrapiejskich dziaržavaŭ pačućcie poŭnaje biezdapamožnaści pierad vajskovaj i finansavaj mahutnaściu Maskvy.
Aperacyja Rasiei ŭ Hruzii vykliča vialikija źmieny ŭ hieapalityčnych planach ZŠA i eŭrapiejskich dziaržavaŭ.Možna čakać paskareńnie pryniaćcia rašeńnia Polščaj ab systemie procirakietnaj abarony i rostu vydatkaŭ na vajskovyja patreby va ŭschodnieeŭrapiejskich dziaržavach.
Dahetul nijak nia vykazaŭsia pra kanflikt u Hruzii Alaksandar Łukašenka, što vyklikała razdražnionuju reakcyju šerahu maskoŭskich analitykaŭ. Jany chočuć, kab ich sajuźnik padtrymaŭ dziejańni Rasiei.
