Як паведамляе тэлеграм-канал «Агентство. Новости», Аліна Афанаскіна стварыла тэлеграм-канал «биомусор.» 2 лютага, а канал «David Kozák / Давид» з'явіўся 9 снежня. Спачатку яны былі закрытымі, але ў дзень страляніны сталі агульнадаступнымі.
У абодвух каналах ёсць вельмі падобныя пасты: «Мяне проста ўсе ненавідзелі, ненавідзяць і будуць ненавідзець» (Козак) і «МЯНЕ АБСАЛЮТНА УСЕ НЕНАВІДЗЯЦЬ» (Афанаскіна). Акрамя гэтага, абое амаль аднолькава тлумачаць прычыны, якія іх прывялі да злачынства: «Я заўсёды хацеў забіваць» (Козак) і «Я ўсё мацней хачу забіваць» (Афанаскіна).
Запісы ў тэлеграм-канале @Kozak_David
Падабенства заўважна і ў наступнай пары пастоў: «Проста цяпер гляджу на зброю баці і хочацца застрэліцца» (Афанаскіна), «П'ю чай і хачу застрэліцца» (Козак).
Журналісты таксама звяртаюць увагу, што абое стралкі выкарыстоўваюць падобную слоўную канструкцыю для апісання стральбы з дзеясловам «рабіць»: «рабіць страляніну» (Афанаскіна) і «зрабіць скулшутынг», «зрабіць страляніну» (Козак), што не адпавядае нормам маўлення.
У пастах у абодвух тэлеграм-каналах выкарыстоўваецца літара «ё» і непрыстойная (абсцэнная) лексіка. А слова «будто» пішацца праз дэфіс — «буд-то». Такая памылка, па словах «Радио Свобода», выключае магчымасць таго, што тэкст быў напісаны з дапамогай машыннага перакладу.
Яшчэ адным падазроным супадзеннем зʼяўляецца згадка ў абодвух «дзённіках» іншых стралкоў. І Козак, і Афанаскіна пішуць пра Ільназа Галявіева, які расстраляў школьнікаў у Казані ў 2021 годзе. А ў канале Козака ёсць запіс ад 10 снежня, дзе ён піша: «Я вельмі натхніўся Алінай… вельмі». У пастах Афанаскінай таксама згадваецца Дылан Кліболд, які ў 1999 годзе зладзіў страляніну ў школе «Калумбайн» у ЗША.
Запісы ў тэлеграм-канале @Kozak_David
Такія супадзенні выклікаюць пытанні да абодвух «дзённікаў». Аўтарства іх ставіцца пад сумнеў. На карысць гэтага сведчаць некаторыя факты.
Так, першы пост ад 9 снежня ў закрытым акаўнце ў тэлеграм-канале Давіда Козака пазней рэдагаваўся і на момант, калі канал стаў адкрытым, выглядаў так: «Гэта будзе мой дзённік, як я іду да скулшутынгу». Адзін з журналістаў выдання «Медыязона» звярнуў увагу на тую акалічнасць, што гэты пост рэдагаваўся 21 снежня ў 16:55 па чэшскім часе, калі забойца ўжо быў мёртвы.
Запісы ў тэлеграм-канале @Kozak_David
Аўтар канала @Kozak_David таксама ў адным з пастоў піша пра тое, што «гэты канал будзе доўгі час закрытым», хаця ён «хацеў зрабіць яго з самага пачатку адкрытым, але потым прачытаў адну інструкцыю, што правільней за некалькі гадзін за страляніны адкрыць канал».
Першы запіс ў тэлеграм-канале @Kozak_David
Дзіўным, на погляд аднаго з журналістаў «Чэшскага радыё», зʼяўляецца тое, што Козак у сваіх запісах згадвае толькі два выпадкі страляніны ў расійскіх школах. Пры гэтым няма ніякіх спасылак на падобныя выпадкі ў іншых краінах.
Па інфармацыі The New York Times, некаторыя назіральнікі адзначылі вельмі высокі ўзровень ведання рускай мовы, які не ўласцівы няносьбіту. Незразумела, як чэх, які вырас у маленькай вёсцы, мог авалодаць моладзевым слэнгам і багата выкарыстоўваць ненарматыўную лексіку.
Выданне таксама звяртае ўвагу на тое, што позна ўвечары ў дзень страляніны канал зноў стаў прыватным. У той час Давід Козак ужо быў мёртвым. А пазней канал зусім быў выдалены.
Што ж тычыцца канала Аліны Афанаскінай, то, на меркаванне яе бацькі, у «дзённіку» «дарослы тэкст», напісаны пад чыімсьці ўздзеяннем».
Усе гэтыя акалічнасці выклікаюць дадатковыя пытанні да абодвух «дзённікаў».
Чытайце яшчэ:
Што вядома пра стралка, які забіў не менш за 15 чалавек у Празе
Школьніца зладзіла страляніну ў школе ў расійскім Бранску і забіла сябе
