Гэтая навіна стала папулярнай у сярэдзіне кастрычніка: на фабрыцы печыва выпусцілі навінку. У Instagram прадпрыемства запэўніваюць, што такога печыва пакупнік яшчэ не спрабаваў. Завецца прадукцыя «Малочны сюрпрыз» для дзяцей ад 3 гадоў.
Што гэта за цуд?
На сайце вытворцы сказана: печыва з высокім утрыманнем сухога малака — 30%. Печыва падыходзіць для дзяцей ад 3 гадоў, без фарбавальнікаў, кансервантаў і араматызатараў. Гэты здаровы і пажыўны ласунак, створаны спецыяльна для дзяцей, з улікам іх патрэб. Печыва стане ідэальным выбарам для ўсіх бацькоў, якія жадаюць прапанаваць сваім дзецям нешта смачнае і карыснае адначасова.
Тэма сухога малака ў апошні час стала вельмі моднай. Улетку на бабруйскай фабрыцы «Чырвоны харчавік» наладзілі выпуск цукерак «Дзіцячыя гісторыі» з падвышаным (амаль 40%) утрыманнем сухога малака. Падобныя прывёз з паездкі ў Кітай Мікалай Лукашэнка — і ў краіне паскоранымі метадамі запусцілі ўласную вытворчасць. Пра гэта нават на сайце з гонарам гаворыцца.
І вось зараз дайшла чарга да печыва.
А што там унутры?
Журналісты знайшлі ўпакоўку печыва ў фірмовай краме «Слодычы» на Камароўцы. Пакецік немаленькі, а самога печыва адносна няшмат: 150 грамаў. Ён каштуе 1,84 рубля.
Склад: мука пшанічная вышэйшага гатунку, малако сухое абястлушчанае, цукар, алей раслінны, прадукты яечныя, інвертны сіроп, разрыхляльнікі (гідракарбанат натрыю, гідракарбанат амонію).
Кансервантаў, араматызатараў, генна-мадыфікаванай соі, пальмавага алею і іншых дабавак, якімі любяць палохаць, у складзе няма.
Харчовая і энергетычная каштоўнасць прыкладна такая ж, як у звычайнага печыва: бялкоў — 15 грамаў, тлушчаў — 12 грамаў, вугляводаў — 63 грама, дабаўленага цукру — 16,6 грама, і ўсё гэта выліваецца ў 420 кілакалорый на 100 грамаў прадукту.
З выгляду печыва зусім не адрозніваецца ад іншага: круглае, з баразёнкамі-насечкамі, звычайнага колеру. Печыва і печыва.
А як яно на смак?
Гэта быў рэдкі выпадак за доўгую гісторыю дэгустацый, калі амаль усе тэсціроўшчыкі ежы аказаліся аднадумцамі. Вось іх водгукі.
— Жахлівае печыва. Мне не падабаецца. Яно сумнае, цвёрдае. Рэальна: стаміцца можна яго рассмоктваць. Але пры гэтым вельмі салодкае.
— Яно цвёрдае, але калі яго есці з малачком, то нармальна. Але ўвогуле яно вельмі цвёрдае. Дык гэта яно пры тым яшчэ і свежае, а што будзе з нясвежым? На пакунку павінна быць рэклама стаматалогіі.
— Гэта расчараванне года, гэта печыва са смакам «пазаўчора».
— Яно поснае, нясмачнае, дзеці проста зубы зламаюць. Аднак з каваю яно нармальнае.
— Гэта печыва на выпадак ядзернай вайны. Я спадзяваўся, што яно будзе як безэ, паветранае, — а яно на справе звычайнае печыва, толькі цвёрдае. Ды яшчэ і прысмак такі дзіўны.
— Калі з галадухі лопаць, то нармальна.
— Яно свежае і пры гэтым такое цвёрдае. Прычым спачатку цвёрдае, а потым прыліпае да зубоў. Для дзетак, у якіх няма зубоў, чухаць зубкі — падыдзе, яны ж не раскусяць, а рассмокчуць. Але я не дзіця, мне не падабаецца.
— Для дарослых, у якіх ужо зубоў няма, таксама падыдзе — рассмоктваць. Гэткае дыетычнае печыва атрымліваецца.
Чытайце таксама:
Леманграс, хамон з качкі, хлеб з лісічкамі. Топ-10 незвычайных прадуктаў у крамах і на рынках Мінска
У крамы паступілі цукеркі, да стварэння якіх спрычыніўся Мікалай Лукашэнка
