«Без іх рашэння не возьмуць нават у санітаркі». У бальніцах цяпер ёсць свае ідэолагі 8

Ідэалагічнае выхаванне медыкаў у дзеянні. Ілюстрацыйнае фота: grsmu.by

Як пішуць «Белыя халаты», у задачы ідэолагаў уваходзяць гутаркі з работнікамі медыцынскіх устаноў, а таксама стварэнне і адміністраванне «сацсетак ідэалагічна правільнай скіраванасці». 

Па словах саміх медыкаў, адказных за «ідэалагічна правільнае выхаванне кадраў» пачалі прызначаць яшчэ ў канцы мінулага года.

Галоўнай на той момант іх задачай была зачыстка ўстаноў аховы здароўя ад дактароў, нелаяльных да рэжыму Лукашэнкі.

Пад увагу найперш трапілі ўдзельнікі пратэстаў 2020 года. З сілавых структур кіраўніцтву бальніц паступалі спісы супрацоўнікаў, заўважаных на маршах і акцыях салідарнасці. Непажаданымі былі лекары, якія ў калектыве выказвалі думкі аб кепскім стане беларускай медыцыны.

Ад іх спачатку патрабавалі напісаць тлумачэнне, а затым ідэолагі прапаноўвалі звольніцца па згодзе бакоў. Пагражалі праблемамі, калі тыя ўпарціліся.

«Гэты супрацоўнік перыядычна выклікае да сябе супрацоўнікаў і правярае іх тэлефоны. У яго ў бальніцы ёсць свае інфарматары. Без яго рашэння не могуць узяць на працу нават санітарку», — расказала доктарка адной з бальніц Віцебскай вобласці аб працы ідэолага.

Журналіст «Нашай Нівы» паспрабаваў запісацца на прыём да «намесніка галоўнага доктара па ідэалогіі».

У трох бальніцах патлумачылі, што пытаннямі ідэалогіі займаецца «намеснік галоўнага доктара па арганізацыйна-метадычнай рабоце з сумяшчэннем ідэолага». Ён сустракаецца з медыкамі, збірае інфармацыю пра сітуацыю ў калектыве і арганізоўвае ідэалагічныя мерапрыемствы.

У яшчэ адной лякарні за ідэалогію паставілі адказваць намесніка галоўнага доктара па медыцынскай частцы, грамадзянскай абароне і мабілізацыйнай рабоце.

У двух бальніцах параілі пагутарыць пра ідэалогію з намеснікамі галоўнага доктара па бяспецы, рэжыму і кадрах.

У структуры медыцынскіх устаноў яны кантралююць аддзелы кадраў, юрыстаў, сектар аўтаматызаваных сістэм. На сайтах прагледжаных намі лякарняў фотаздымкі такіх супрацоўнікаў адсутнічаюць. Не пазначаныя і іхнія службовыя абавязкі.

Так выглядае адказны за выхаванне ідэалагічна правільнага медычнага калектыву. Фота: 2gkb.by

Яшчэ ў дзвюх лякарнях заявілі, што за пытанні ідэалогіі адказвае асабіста галоўны доктар.

Паводле тэлеграм-канала «Белыя халаты», пасаду намесніка па кадрах у бальніцах увялі ў 2021 годзе. Яе звычайна займаюць асобы, якія не маюць дачынення да медыцынскай галіны. 

«Калі на прадпрыемствах ёсць ідэолагі, то чаму іх не мусіць быць у іншых дзяржаўных арганізацыях? Бальніцы не выключэнне. Яны дзяржаўныя. За нас вырашаюць, якія пасады ўводзіць у штатны расклад», — сказаў прадстаўнік адміністрацыі адной з лякарняў.

Паводле яго, адказныя за ідэалогію — не публічныя работнікі, таму пра іх і няма звестак. Суразмоўца не захацеў гаварыць, як ідэолагі выправяць сітуацыю з недахопам кадраў у медычных установах.

Згодна з нацыянальным банкам вакансій, медычным установам краіны патрабуецца 6467 дактароў-спецыялістаў, 4122 медсястры, 2284 санітары.

Глядзіце таксама:

«На 45 месцаў — 5 дзяўчат». Хірургаў у субардынатуру будуць размяркоўваць па палавой прыкмеце — студэнты абураныя

«Адзін будзе мяняць, а двое — зашываць рану». Лукашэнка даручыў да канца года зрабіць аперацыі па эндапратэзаванні ўсім, хто стаіць у чарзе

У якім стане знаходзіцца медыцына праз амаль 30 год лукашэнкаўскага кіравання? Гэта толькі тое, што апублічылі

«Якое шчасце, што я сутыкнулася з гэтым дыягназам тут!» Як беларускі даюць рады цяжкім хваробам далёка ад дому

Васіль Вашчыла

Хочаш падзяліцца важнай інфармацыяй ананімна і канфідэнцыйна? Пішыце рэдактару «Нашай Нівы» ў ТГ