У Беларусі ўдалося стабілізаваць абстаноўку ў сферы распаўсюджвання і спажывання наркотыкаў, аднак асаблівых падстаў для самазаспакоенасці няма. Аб гэтым Аляксандр Лукашэнка заявіў на нарадзе па пытаннях процідзеяння распаўсюджванню наркотыкаў і прафілактыкі наркаманіі, паведамляе БелТА.
Удзельнікамі нарады сталі кіраўнікі ўрада, шэрагу міністэрстваў і ведамстваў, судзейскага корпуса.
Кіраўнік дзяржавы падкрэсліў, што важная, рэзанансная тэма барацьбы з наркотыкамі і прафілактыкі наркаспажывання за апошнія пяць гадоў неаднаразова абмяркоўвалася на высокім узроўні. «Прынятыя ў Беларусі ў 2014 годзе сістэмныя меры дазволілі нам пераламаць сітуацыю, — сказаў ён. — Нам удалося паставіць заслон на шляху распаўсюджвання сінтэтычных прэпаратаў, так званых спайсаў, асноўнымі спажыўцамі якіх была моладзь. Значна ўзмоцнена крымінальная адказнасць за незаконны абарот наркатычных сродкаў і псіхатропаў».
«У выніку нам удалося стабілізаваць абстаноўку», - адзначыў Аляксандр Лукашэнка. За мінулыя пяць гадоў колькасць нарказлачынстваў скарацілася ў 1,5 разу, а учыненых з удзелам непаўналетніх — прыкладна ў 5 разоў (з 466 ў 2014 годзе да 97 у 2018 годзе).
Колькасць смерцяў ад перадазіровак наркотыкамі ў Беларусі ў 14 разоў ніжэй, чым у Літве, і ў 72 разы ніжэй, чым у ЗША. Апошні выпадак гібелі падлетка ад перадазіроўкі адбыўся ў 2014 годзе.
«Аднак, нягледзячы на прыведзеныя паказчыкі, асаблівых падстаў для самазаспакоенасці няма», — звярнуў увагу кіраўнік дзяржавы.
