Finał sahi «Źmiarkańnie»: piarevaratni pad sudom + trejler 2

U prakat vychodzić film «Źmiarkańnie. Saha: Śvitańnie — Častka 2» — zaklučnaja sieryja vampirskaj historyi kachańnia z Robiertam Pacinsanam i Krysten Ściuart.

Pakul pieratvoranaja narešcie ŭ vampira Beła (Krysten Ściuart) atrymlivaje asałodu ad novaha poŭnaha farbaŭ i hukaŭ śvietu, a taksama ad paścielnych uciechaŭ z kachanym Edvardam (Robiert Pacinsan), nie škadujučy pra pakinutuju čałaviečuju niemač, jaje novanarodžanaja dačka raście nie pa dniach, a pa hadzinach (i vyrastaje ŭ junuju artystku i madel Makienzi Toj) na rukach kłapatlivaha vampirskaha siamiejstva Kalenaŭ i jašče bolš kłapatlivaha eks-zakachanaha piarevaratnia Džiejkaba (Tejłar Łotnier). Całkam atrymać asałodu ad novaha žyćcia, ź jakoha kančatkova źnikajuć ludzi, pieraškadžajuć tolki niaŭrymślivyja italjanskija intryhany Valtury. Daviedaŭšysia pra cuda-dzicia, jany źbirajuć sud, prysud jakoha viadomy zahadzia — śmierć Kalenam.

U detali spravy śledstva ŭdavacca nie źbirajecca, ale abvinavačanyja ŭsio ž źbirajuć pa śviecie kamandu śviedak abarony, jakija pry peŭnym raskładzie mohuć stać i maleńkaj revalucyjnaj armijaj.

Na niejki čas «Źmiarkańnie» pieratvarajecca ŭ ahlad talentaŭ rehijonaŭ płaniety:

amazonskaja tuziemka vyklikaje halucynatornyja vidziežy, łondanski indus to dureje z vadoj u basiejnie, to ahoń biez zapałak arhanizuje (ale nazyvajecca heta hrozna — «kiruje stychijami»), jašče adna nieśmiarotnaja moža ŭdaryć tokam. Mierkavany praciŭnik taksama vyjaŭlaje novyja zdolnaści. Sprava ruchajecca da vialikaj, z vykarystańniem śpiecefiektaŭ bojki, nie praduhledžanaj ŭ ramanie.

Ale ŭ ramanie kanflikt naohuł vyrašajecca niejak zanadta mirna i razumna — u kino tak nie maje być.

Pryjemna ŭsio ž nie viedać siužet da prahladu, kab acanić dva kalektyŭnyja ŭzdychi, što pralatajuć nad załaj bližej da finału. Adzin — natchniony i pierachodziačy ŭ apładysmienty, kali čarhovaja hałava pakidaje plečy. I druhi, trochi rasčaravany, kali vyśviatlajucca abstaviny, što źmianiajuć raskład papiaredniaha epizodu.

Padrychtavany siurpryz abiasceńvaje adstupleńnie ad litary pieršakrynicy. Kinasaha pierakulvaje na knihu žuravinavy sok, što prykidvajecca na chvilinu kryvioju. Adrazu ŭspaminajecca i toje, što Kaleny — niby vyjšli ź situacyjnaj kamiedyi, i toje, što patencyjna zdolnym pierajhrać ich artystam (Majkł Šyn, Dakota Faninh, Džejmi Kempbeł Bauer) dastalisia zanadta plaskatyja roli Valtury. I toje, što było viadoma ad samaha pačatku: pad iskrystaj na sonca kamienna-chałodnaj skuraj nie ciače kroŭ i nie bjecca serca.

Hazieta.ru

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH