Ministerstva pa padatkach i zborach prymaje prapanovy pa pytańni stvareńnia ŭ Biełarusi sistemy elektronnaha kantrolu za tavarnymi i finansavymi patokami pry abarocie tavaraŭ.
Jak paviedamlaje pres-centr MPZ, u adpaviednaści z daručeńniem urada razhladajecca pytańnie ab stvareńni takoj sistemy, vykarystańnie jakoj budzie realizoŭvacca na dobraachvotnaj asnovie.
Miarkujecca, što sistema budzie funkcyjanavać nastupnym čynam. Jaje ŭdzielnikami buduć subjekty pradprymalnickaj dziejnaści, jakija ažyćciaŭlajuć vytvorčaść, impart peŭnaj hrupy tavaraŭ, aptovy i roźničny handal joj. U sistemie ŭ režymie realnaha času buduć rehistravacca ŭsie klučavyja apieracyi pry abarocie tavaraŭ, u tym liku ich vytvorčaść, impart, atrymańnie, adhruzka. Praduhledžvajecca identyfikacyja kožnaha vidu ŭpakoŭki tavaru (spažyvieckaj (butelka, banka, pakiet i inš.), łahistyčnaj (skryni i inš.) i transpartnaj (palety, paddony i inš.) unikalnym identyfikacyjnym kodam. Spažyvieckaja adzinka tavaru budzie identyfikavacca pry dapamozie štrychavaha koda tavaru, a łahistyčnyja i transpartnyja adzinki — z vykarystańniem łahistyčnaj etykietki, jakaja sumiaščaje štrychavyja kody i radyjočastotnuju identyfikacyju. Lubaja apieracyja z tavaram budzie ŭličvacca ŭ sistemie šlacham sčytvańnia ŭnikalnaha koda łahistyčnaj etykietki.
Jak adznačajuć u MPZ, stvareńnie sistemy zapatrabuje raschodaŭ subjektaŭ haspadarańnia, jakija žadajuć udzielničać u joj, u tym liku na nabyćcio nieabchodnaha abstalavańnia; raschodnyja materyjały; apłatu pasłuh pa vykarystańni sistemy.
Ukaranieńnie sistemy dazvolić zabiaśpiečyć kantrol za abarotam kožnaj łahistyčnaj i (ci) transpartnaj adzinki pry ŭmovie zaniasieńnia danych u sistemu; źnizić transpartna-łahistyčnyja raschody, aptymizavać schiemu ŭnutranaha tavararuchu; arhanizavać ekspart tavaraŭ u adpaviednaści ź mižnarodnymi standartami; źnizić straty i kradziažy; pierajści na novy ŭzrovień manitorynhu i kiravańnia tavarna-transpartnymi patokami.
Pavodle danych MPZ, u mižnarodnaj praktycy supravadžeńnie tavaru na asnovie aŭtamatyčnaj identyfikacyi realizujecca arhanizacyjami na dobraachvotnaj asnovie ŭ roznych śfierach — tam, dzie ŭ siłu śpiecyfiki dziejnaści stanoŭčy efiekt pieravyšaje zatraty na vykarystańnie sistemy. Naprykład, padobnyja sistemy kantrolu realizujucca bujnymi arhanizacyjami samastojna dla abarony brendavaj darahoj pradukcyi, a taksama dla abarony pradukcyi, užyvańnie jakoj źviazana z pavyšanymi ryzykami.
