Chutkuju vyklikali nastaŭniki, kali zaŭvažyli vučanicu ŭ kalidory amal u nieprytomnym stanie. Piedahohi akazali dziaŭčyncy pieršuju dapamohu, choć niepadalok u miedpunkcie viali prafahlad štatnyja lekar i fielčar.
Pa słovach mamy Hanny, Śviatłany Fiaduta, daktary chutkaj dapamohi, jakija pryjechali pa vykliku, vyznačyli, što ŭ dziciaci aciok hartani, vyklikany alerhičnaj reakcyjaj. Śviatłana nie ździviłasia, bo dačka daŭno pakutuje ad alerhii. Vypadak adbyŭsia 6 kastryčnika ŭ siaredniaj škole № 31. Dziaciej tut vučycca 1400, tamu miedpunkt ukamplektavany i lekaram, i fielčaram. Mama vyrašyła damahčysia adkazu, čamu paŭstała padobnaja situacyja. Rezanans, miž tym, padniaŭ pytańnie jakaści akazańnia mieddapamohi ŭ škołach.
Siońnia Upraŭleńnie achovy zdaroŭja Hrodzienskaha abłvykankama pravodzić pravierku pa hetym fakcie, stvorana śpiecyjalnaja kamisija. Pra heta paviedamiła namieśnik zahadčyka pa miedycynskaj častcy dziciačaj palikliniki № 2 (jakoj padparadkoŭvajecca miedpunkt) Iryna Hołub. Lekar miedpunkta siaredniaj škoły № 31 Alena Kandakova raspaviała svaju viersiju taho, što adbyłosia. Jana patłumačyła, što vyhlad dziciaci joj nie padaŭsia chvaravitym:
— Ničoha padazronaha ŭ stanie dziaŭčynki nie zaŭvažyła i skazała joj patelefanavać baćkam, — rastłumačyła doktar padčas našaj sustrečy ŭ SŠ № 31.
Kali pryjšła Ania, lekar ź fielčaram pravodzili prafahlad, u kabiniecie znachodziłasia vialikaja kolkaść dziaciej. Pry hetym Alena Kandakova nastojvaje, što, kali dziaŭčyncy sapraŭdy ŭ kalidory stała drenna, joj pra heta nie paviedamili.
Nastaŭniki ŭ škole viedali, što Ania pakutuje alerhijaj na pachi. Ab hetym papiaredzili baćki. Tamu piedahohi paviedamlali dziaŭčyncy, kali buduć farbavać ścieny abo vokny, kab jana zastavałasia doma.
U dzień zdareńnia na ŭroku biełaruskaj litaratury repietavali scenku. U hety čas u kłasie źjaviŭsia śpiecyfičny pach hary, krynica jakoha nastaŭnica doŭha nie mahła znajści. Jana vyrašyła, što ciahnie z vulicy, i začyniła fortki. Zatym vyjaviłasia, što «vinavataja» lampa, jakuju ŭ jakaści dekaracyi prynios adzin z vučniaŭ.
— Dačka raspaviała, što, kali jana vyjšła ź miedpunkta, u vačach u jaje paciamnieła, nohi amal nie išli z-za słabaści. U takim stanie jaje ŭbačyła nastaŭnica i zaviała ŭ kabiniet dyrektara, — patłumačyła Śviatłana Fiaduta.
Pavodle słoŭ v. a. dyrektara siaredniaj škoły № 31 Maryi Saročyk, dziaŭčynka ŭsia dryžała, jana nie mahła stajać, skardziłasia na toje, što ničoha nie bačyć.
— Vyklikali chutkuju. Pakul čakali, znajšli ŭ aptečcy na vachcie supraćalerhičnyja leki, — raspaviała Maryja Saročyk.
Jana pryznałasia, što zaniepakojenaja nie tolki hetym incydentam, ale i režymam pracy miedpunkta. Ź jaje słoŭ, lačebny kabiniet pracuje da 16.00, choć školniki vučacca da 18.00. Kabiniet byvaje «na zamku»: časam miedyki ŭ pieršaj pałovie dnia sychodziać na płaniorki i narady. Z prośbaj padoŭžyć pracoŭny dzień miedpunkta administracyja škoły nieadnarazova źviartałasia ŭ dziciačuju palikliniku № 2. Adnak, jak vyśvietliłasia, na takuju kolkaść vučniaŭ pavodle štatnaha raskładu dajuć tolki 0,75 miedyčnaj staŭki, astatni čas (0,25 staŭki) doktar znachodzicca ŭ inšaj škole.
Jak pavinien pracavać piersanał školnaha miedpunkta
Zahadčyca dziciačaj paliklinikaj № 1 Iryna Łukanskaja kuryruje pracu lačebnych kabinietaŭ u škołach Leninskaha rajona Hrodna. Pavodle jaje słoŭ, hałoŭnaja praca miedpunkta zaklučajecca ŭ ambułatornym pryjomie školnikaŭ, heta značyć u akazańni dapamohi pry skarhach. Zatym iduć płanavyja ahlady i vakcynacyi. Aptečki miedpunkta ŭkamplektavany usimi nieabchodnymi preparatami, u tym liku ad branchijalnych i astmatyčnych prystupaŭ.
— Kali dzicia skardzicca na chvaravity stan, miedyki pavinny pravieści pieršasny ahlad — pamierać cisk, tempieraturu, bo časam byvaje, što dzieci simulujuć, kab nie chadzić na zaniatki. Na padstavie ahladu prymajecca rašeńnie: vyklikać baćkoŭ abo chutkuju, — kaža Iryna Łukanskaja. Sama miedyk nie bačyć prablem u nahruzcy, uskładzienaj na miedpunkty, i stanoŭča adhukajecca ab kvalifikacyi školnych lekaraŭ i fielčaraŭ, ale nie vyklučaje čałaviečy faktar.
