Łukašenka patłumačyŭ, čamu pastaviŭ u Śledčy kamitet Vakulčyka, a nie Švieda dapoŭniena słovami Łukašenki 33

Valer Vakulčyk.

Alaksandr Łukašenka pryznačyŭ Valeryja Vakulčyka staršyniom Śledčaha kamiteta Respubliki Biełaruś.

Da hetaha času V.Vakulčyk zajmaŭ pasadu načalnika Apieratyŭna-analityčnaha centra pry prezidencie Biełarusi (AAC) — samaj sučasnaj śpiecsłužby łukašenkaŭcaŭ.

Na čas kiravańnia Vakulčyka ŭ AAC prypała raspracoŭka biełaruskaha zakona pra internet.

Pieršym namieśnikam staršyni Śledčaha kamiteta pryznačany Andrej Švied, jaki raniej pracavaŭ namieśnikam hienieralnaha prakurora. Jon vioŭ spravy Biabienina i ab vybuchu ŭ mietro.

Mienavita jon taksama «praviaraŭ» skarhi palitviaźniaŭ na katavańni ŭ izalatary KDB. Viadoma, «fakty nie paćvierdzilisia».

Načalnikam AAC pryznačany Siarhiej Špiahun — čałaviek ź idealnym dla śpiecsłužby proźviščam. U internecie niama nijakaj infarmacyi pra jaho.

U łukašenkaŭskaj sistemie kiraŭniki siłavych viedamstvaŭ adyhryvajuć nadzvyčajna važnyja roli.

* * *

Śledčy kamitet stvorany ŭkazam Łukašenki ad 12 vieraśnia 2011 h. Vyznačany status Śledčaha kamiteta jak «dziaržaŭnaha pravaachoŭnaha orhana i orhana papiaredniaha śledstva, padparadkavanaha prezidentu Biełarusi, jaki ažyćciaŭlaje ŭ adpaviednaści z zakanadaŭčymi aktami paŭnamoctvy ŭ śfiery dasudovaj kryminalnaj vytvorčaści».

Akramia taho, paviedamlaje pres-słužba, vybudavana adzinaja centralizavanaja sistema, jakuju buduć składać Śledčy kamitet (centralny aparat), upraŭleńni pa abłaściach i Minsku, a taksama rajonnyja (mižrajonnyja), haradskija, rajonnyja ŭ haradach adździeły Śledčaha kamiteta.

Staršynia Śledčaha kamiteta, jaho namieśniki i načalniki ŭpraŭleńniaŭ pa abłaściach i Minsku buduć pryznačacca na pasady prezidentam.

Ukaz nabyvaje moc 1 studzienia 2012 hoda.

* * *

Łukašenka choča bačyć Śledčy kamitet mocnaj i niezaležnaj strukturaj. Ab hetym jon zajaviŭ siońnia, pryznačajučy kiraŭnictva kamiteta.

Alaksandr Łukašenka skazaŭ, što na pasadu kiraŭnika Śledčaha kamiteta razhladałasia kandydatura Andreja Švieda. Adnak Łukašenka paličyŭ, što taja arhanizatarskaja i haspadarčaja praca, jakaja vychodzić na pieršy płan pry farmavańni kamiteta, budzie istotna pieraškadžać śledčaj pracy Andreja Švieda.

Tłumačačy pryčyny vybaru kandydatury Valeryja Vakulčyk, Łukašenka adznačyŭ: «U mianie pretenzij da vas niama. Vy apieratyŭny rabotnik, a heta taksama vielmi važny napramak dla budučaha Śledčaha kamiteta, tamu što było šmat naściarožanaści ŭ tym płanie, što śledstva adryvajecca ad apieratyŭna-techničnych słužbaŭ. Vy, jak kłasny ŭ hetym śpiecyjalist, možacie navieści tam adpaviedny paradak i pastavić ich na słužbu śledstvu».

«Vielmi važna, što ŭ siłavych strukturach vy karystajeciesia zasłužanaj pavahaj. Chtości vas nie lubić, chtości niedalublivaje, ale tolki z adnoj pryčyny: praz vašu sumlennaść i pryncypovaść. Mnie patrebien taki čałaviek pry stanaŭleńni hetaj struktury. Vy budziecie pracavać u pary z Andrejem Šviedam — jon u vas budzie pieršym namieśnikam i, jak heta jon umieje dobra rabić, zajmacca niepasredna śledstvam».

Alaksandr Łukašenka jašče raz padkreśliŭ, što Valeryju Vakulčyk treba budzie pierš za ŭsio zasiarodzicca na arhanizacyjnych pytańniach. «Vy majecie ŭvachod va ŭsie struktury, karystajeciesia padtrymkaj i davieram prezidenta — lepšaha čałavieka i nie znojdzieš».

Źviartajučysia da Siarhieja Špiehuna, pryznačanaha načalnikam Apieratyŭna-analityčnaha centra pry prezidencie, Alaksandr Łukašenka adznačyŭ, što vielmi daviaraje Apieratyŭna-analityčnamu centru, jamu nie davodzicca nijakich płanaŭ i zadač, a patrabujecca tolki sumlennaść, abjektyŭnaść i addanaść krainie i biełaruskamu narodu. Alaksandr Łukašenka padkreśliŭ, što heta važna i dla AAC, i dla Śledčaha kamiteta.

* * *

Aficyjnaja bijahrafija ad ahienctva BiełTA.

Vakulčyk Valeryj Paŭłavič naradziŭsia 19 červienia 1964 hoda ŭ Bresckaj vobłaści.

U 1985 hodzie skončyŭ Charkaŭskaje Hvardziejskaje vyšejšaje tankavaje kamandnaje vučylišča. U 1992 hodzie — Vyšejšyja kursy vajennaj kontrvyviedki KDB SSSR. U 2011 hodzie — Akademiju kiravańnia pry prezidencie Respubliki Biełaruś.

Z 1985 hoda pa 1991 hod prachodziŭ vajennuju słužbu va Uzbrojenych Siłach. Z 1991 hoda pa 2008 hod prachodziŭ słužbu ŭ orhanach dziaržaŭnaj biaśpieki.

Z maja 2008 hoda — načalnik Apieratyŭna-analityčnaha centra pry prezidencie Respubliki Biełaruś.

Pryznačany staršynioj Śledčaha kamiteta Respubliki Biełaruś 24 kastryčnika 2011 hoda.

MB; inf. BiełTA

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH