U čaćvier viečaram, kala 21.15, u Vilni, kala skryžavańnia vulic Naŭharduka (Navahradskaj) i Alhierda daradca pasolstva Biełarusi Jarasłaŭ Dzichcijeŭski na aŭtamabili VW Jetta ź zialonymi dypłamatyčnymi numarami ŭrezaŭsia ŭ mikraaŭtobus Renault, a toj jašče ŭrezaŭsia ŭ aŭtamabil BMW, jaki taksama stajaŭ na vulicy.
Kiravaŭ VW Jetta dypłamat pasolstva Biełarusi; jon nie paciarpieŭ, u inšych mašynach ludziej nie było. Pavodle słovaŭ supracoŭnikaŭ palicyi,
dypłamat byŭ u došku pjany, ale admoviŭsia prajści pravierku ałkatestaram.
Jon tłumačyŭ palicejskim, što vielmi stamiŭsia na pracy i zasnuŭ za rulom.
Palicyja nie mahła zatrymać daradcu, jaki maje dypłamatyčnuju niedatykalnaść, tamu jaho pryjšłosia pieradać pradstaŭnikam pasolstva Biełarusi (pasolstva znachodzicca pobač, na vuł. Mindoŭha). Pradstaŭniki pasolstva, jakija prybyli na miesca, źniali dziaržnumar z raźbitaha aŭtamabila. Mašynu pryjšłosia buksiravać — VW Jetta była raźbita tak, što nie mahła jechać.
Biełaruski dypłamat na miescy avaryi byŭ vidavočna niećviarozym, paviedamlaje delfi.lt. Kiroŭca inšaha aŭtamabila pasolstva, što pryjechaŭ na miesca zdareńnia, nakinuŭsia na žurnalista LNK Jaŭniusa Matonisa.
Mužčyna, nie pradstaviŭšysia, patrabavaŭ nie rabić zdymki ipa-rasiejsku pahražaŭ dać žurnalistu «ŭ mordu».
Inšyja žurnalisty rastłumačyli mužčynu, što jon nie ŭ Biełarusi, i prapanavali supakoicca. Ale tolki paśla taho, jak Matonis, skončyŭšy zdymku, vyklučyŭ kamieru, razzłavany mužčyna, uzdychajučy, staŭ źbirać detali raźbitaha aŭtamabila pasolstva.
