Rasija sumiesna ź Mižnarodnym valutnym fondam hatovyja akazać dapamohu Biełarusi ŭ suviazi z apłatnym kryzisam u krainie, ale tolki ŭ tym vypadku, kali ŭrad budzie hatovy praciahnuć reformy,zajaviŭ ministr finansaŭ RF Alaksiej Kudryn u Vašynhtonie, pieradaje «RIA Naviny».
Kudryn nahadaŭ, što raniej MVF prapanoŭvaŭ Biełarusi prahramu dapamohi, jakaja zasnoŭvałasia na kankretnych i dastatkova žorstkich reformach.
«Prahrama była žorstkaj, navat bolš žorstkaj, čym my mahli b paprasić, — heta i zamarožvańnie zarobkaŭ, i skaračeńnie raschodu biudžetu, i pavyšeńnie taryfaŭ na enierhanośbity ŭnutry krainy. Ale ŭradu Biełarusi zdałosia, što jany pieražyli prablemy, i paśla zaviaršeńnia prahramy (biełaruskija ŭłady) pierajšli tyja abmiežavańni, jakija stvaralisia hetaj prahramaj. Nam chaciełasia b dapamahčy Biełarusi. My ličym, što hetyja važnyja reformy pavinny być pradstaŭleny ŭ prahramie ŭrada Biełarusi, i tady Rasieja prymie ŭdzieł u padtrymcy», — skazaŭ ministr, vystupajučy na forumie pa rasiejska-amierykanskich adnosinach.
Pavodle jaho słoŭ, Rasija abmiarkoŭvaje z MVF pytańni akazańnia dapamohi Biełarusi i hatova «vystupić pieršym ešałonam padtrymki». «Spadziajemsia, što paśla hetaha padrychtujucca ŭmovy dla ŭdziełu MVF», — padkreśliŭ Kudryn.
«Ja viedaju, što MVF ciapier nie hatovy dać novuju prahramu, pa krajniaj miery, pakul usie rašeńni pa źnižeńni deficytu biudžetu, pa kursavoj palitycy nie buduć znoŭ uklučany ŭ płany ŭrada i nie buduć pryniatyja. Zołatavalutnyja reziervy Biełarusi źnižajucca, i ja viedaju, što ŭrad Biełarusi hatovy da reformaŭ. Nakolki hetaja rašučaść budzie realizavana, ja nie mahu śćviardžać dakładna», — zajaviŭ rasijski ministr.
