U Muzyčnym teatry znoŭ premjera. Ledź paśpieli adnavić balet «Miefista» — pradajuć kvitki na kamiedyju «Maja žonka — padmanščyca». I heta nie adnaŭleńnie staroha śpiektaklu 1978 hoda, što pratrymaŭsia na scenie 20 hod, a sucelna novaja pastanoŭka.
Bo tady stavili dla taho, kab pryvabić nie nadta patrabavalnuju publiku i zarabić hrošaj na pravincyjnych hastrolach. Ciapier staviać ź piedahahičnymi metami: kab aktory nabirali artystyčnuju formu.
Nie viedaju, ci staviŭ by teatr «Padmanščycu», kali b heta zaležała ad novaha kiraŭnictva. Na čas źmieny teatralnaj ułady repiertuar byŭ užo źviarstany. Jak i płanavałasia, 41 teatralny siezon adčynicca 11 vieraśnia premjeraj muzyčnaha reviu «Adnojčy ŭ Čykaha» pa matyvach kinafilma «U džazie tolki dziaŭčaty», a ŭ listapadzie — zusim u styli byłoha režysiora Isajeva — adbudziecca premjera muzyčnaj kamiedyi «Aršyn mał ałan» Uzeira Hadžybiekava.
Ale mianiajecca sam padychod da hetych premjeraŭ. Jany ŭsprymajucca jak mahčymaść surjozna papracavać z «lohkim» repiertuaram i padrychtavacca da składanych zadač. Tut praca z «Padmanščycaj» vielmi karysnaja. Bo kamiedyja zvyčajaŭ — heta kamiedyja čałaviečych stasunkaŭ, chleb nadzionny luboha teatra.
Pastanoŭkaj «Padmanščycy» zajmałasia režysior Teatra opiery i baleta Halina Hałkoŭskaja. U artystyčnym asiarodździ ŭ Hałkoŭskaj reputacyja režysiora surovaha i patrabavalnaha. Tamu dla mianie było siurpryzam, ź jakoj piaščotaj i zachapleńniem havorać pra jaje akciory Muzyčnaha teatru roznych pakaleńniaŭ: i junaja vypusknica Akademii mastactvaŭ Viktoryja Stryhankova, i zasłužany artyst Vasil Sierdziukoŭ, jaki ŭdzielničaŭ jašče ŭ pieršaj pastanoŭcy «Padmanščycy». Asabliva padkreślivajuć, što Hałkoŭskaja prajšła HITISaŭskuju škołu, i što jaje nastaŭnikam byŭ kolišni hałoŭny režysior abodvuch našych muzyčnych teatraŭ Viačasłaŭ Ciupa.
Zachapleńnie vučobaj u teatry nie vypadkovaje. Bo niadaŭna pryznačany mastacki kiraŭnik, zasłužany rabotnik kultury Adam Murzič — vydatny vakalny piedahoh. Samo źjaŭleńnie takoha čałavieka abudžaje žadańnie ŭdaskanalvacca. Dyj
novy kiraŭnik stavić pierad teatram ambitnyja zadačy: stvaryć nacyjanalny repiertuar, asvoić žanr kłasičnaj vienskaj apierety i navat opiery… «Ahatka», «Silva» (sapraŭdnaja, nie apahanienaja savieckimi cenzurnymi nažnicami!), «Don Žuan» Mocarta — takija ciapier aryjenciry ŭ Muzyčnaha teatra.Buduć i miuzikły, ź jakimi pracuje asobnaja častka trupy. Ale 60–70% repiertuaru składzie kłasika. Heta viartańnie ŭ jeŭrapiejskuju kulturnuju prastoru, praź cierni da zorak: ad «Babskaha bunta» praz «Padmanščycu» i «Aršyn mał ałan» da «Don Žuana».
U Muzyčnym teatry Mocarta chočuć nie tolki praśpiavać, ale i daskanała pastavić. Jak pastavili balet «Miefista». Pa jarkaści muzyki jon nahadaŭ mnie «Aniutu» Bialinskaha z muzykaj Haŭrylina, a pa nasyčanaści emocyjaŭ i teatralnaj dziei — moj lubimy kupałaŭski śpiektakl «Bolš čym doždž».
U «Padmanščycy» takich mocnych pačućciaŭ napeŭna nie budzie. A
budzie lohkaja muzyčnaja kamiedyja, jakuju tak lubić publika, asabliva ŭletku. Premjernyja pakazy adbuducca 14, 15 i 18 lipienia.
