Zvarot da ministra adukacyi Alaksandra Radźkova 5

31 maja kala budynka Ministerstva adukacyi Biełarusi na płoščy Niezaležnaści adbyłasia akcyja «Apošni zvanok Alaksandru Radźkovu», zładžany moładzievymi aktyvistami i čalcami kamandy kandydata ŭ prezidenty Alesia Michaleviča. Nižej źmieščany tekst ich zvarotu da ministra adukacyi.

Spadar ministr!

30 krasavika Vy zajavili, što dla praviadzieńnia rehistracyi na centralizavanaje testavańnie ŭsio padrychtavana. Takim čynam,

Vami byŭ dadzieny aficyjny start štohadovaj kampanii pa prafanacyi viedaŭ.

Nieaficyjna ž jana pačałasia ŭ toj dzień, kali pieršyja budučyja abituryjenty vypravilisia da svaich repietytaraŭ, kab tyja mahli krychu pavialičyć svaje ścipłyja nastaŭnickija zarobki. Ale jość i inšyja abituryjenty, jakija repietytaraŭ nie naviedvajuć, im heta nie patrebna, u ich inšaja stratehija: jany prosta staviać naŭzdahad kryžyki ŭ patrebnych kletačkach i praz paŭhadziny vychodziać z aŭdytoryi.

U 2009 hodzie na testavańni pa matematycy 24% abituryjentaŭ nabrali 10 i mienš bałaŭ, a dla atrymańnia siertyfikatu ab «paśpiachovaj» zdačy CT było dastatkova i 1 (adnaho!) bała.

Ale dla dakładaŭ prezidentu Vam patrebnyja ŭražalnyja ličby, i takija abituryjenty ich zabiaśpiečvajuć.

Potym jany iduć na płatnyja adździaleńni, i ŭ peŭnaj hrafie źjaŭlajecca: adukacyjnyja pasłuhi zroblenyja na takuju i takuju sumu.

Što rabić z hetymi studentami vykładčykam, Vas, zrazumieła, nie cikavić. Dziŭna, jak pry takim padychodzie Vy jašče dazvalajecie sabie fantazii pra ruch našaj sistemy adukacyi da jeŭrapiejskich standartaŭ?

A navošta treba było raptam pieraryvać reformu, raspačatuju ŭ 1998 hodzie, jakaja ŭvodziła 12-hadovuju školnuju adukacyju? Bo hetaja reforma była adnym z krokaŭ da pierachodu na dvuchstupiennnuju vyšejšuju adukacyju, pryniatuju ŭ Jeŭropie. U adpaviednaści ź joj mierkavałasia, što apošnija dva hady budzie rabicca ŭpor na profilnuju adukacyju školnikaŭ pa abranych pradmietach, kab potym jany mahli atrymać stupień bakałaŭra. Napeŭna, i skaračeńnie hadzin na vykładańnie zamiežnych movaŭ maje ŭsio tuju ž metu adpaviadać jeŭrapiejskim adukacyjnym standartam. Sapraŭdy, navošta zabivać dzieciam hałavu niepatrebnymi viedami, kali ŭ Jeŭropie kožny druhi kali nie vałodaje rasijskaj, to pa-biełarusku havoryć tolki ź ledź prykmietnym akcentam.

I

što Vas prymušała maŭčać, kali było pryniataje rašeńnie likvidavać «za niepatrebnaściu» profilnyja, licejskija i himnazijnyja kłasy? Jak mahło pryjści ŭ hałavu zamianić ich fakultatyŭnymi zaniatkami, naviedvańnie jakich nie źjaŭlajecca abaviazkovym? Pakažycie toje dzicia, što budzie chadzić na «nieabaviazkovyja» ŭroki!

Niaŭžo było tak ciažka paraicca z nastaŭnikami, pierš čym pačynać takija škodnyja pieraŭtvareńni? Mnohija nastaŭniki nie chavali svajoj niazhody z płanami Ministerstva adukacyi, ale Vy, spadar ministr, zamiest ich słuchali inšaha «niepieraŭzydzienaha» refarmatara adukacyi — tahačasnaha namieśnika kiraŭnika Administracyi prezidenta Anatola Rubinava. Adnak vy praličylisia. Ciapier spadar Rubinaŭ znachodzicca ŭ «hanarovaj vysyłcy» ŭ Saviecie Respubliki, i heta dla Vas drenny znak.

Užo zusim chutka budzie ŭviedzienaja ŭsiebiełaruskaja prahrama vyvučeńnia zamiežnych movaŭ, znoŭ źjaviacca śpiecyjalizavanyja škoły, budzie źmienieny paradak pryjomu ŭ VNU, adbuducca inšyja tak nieabchodnyja našaj adukacyi źmieny, bieź jakich Biełaruś nikoli nie stanie na šlach inavacyjnaha raźvićcia.

Nastupny etap raźvićcia biełaruskaj adukacyi budzie prachodzić pad devizam: «Hałoŭnaje — nie być Radźkovym».

Mahčyma, adzinaje, što budzie nahadvać pra Vas, — heta 10-balnaja sistema acenki viedaŭ jak naŭprostaje ŭkazańnie na toje, čaho nielha rabić.

Na siońniašni ž dzień najlepšaje dla Vas rašeńnie — heta dobraachvotnaja adstaŭka.

Taki krok dapamoža Vam chacia b pracaŭładkavacca. 29 traŭnia praźvinieŭ apošni zvanok u škołach — siońnia jon źvinić dla Vas.