1 červienia ź Viciebska nakiravaŭsia chresny chod, pryśviečany 100‑hodździu pieraniasieńnia moščaŭ prapadobnaj Jefrasińni Połackaj z Kijeva ŭ Połack.
Chresny chod u pamiać ab hetaj histaryčnaj padziei arhanizavany Viciebskaj jeparchijaj Biełaruskaj pravasłaŭnaj carkvy. Chresny chod, jaki zavieršycca 4 červienia, adpraviŭsia ŭ 7.00 ad Śviata‑Pakroŭskaha kafiedralnaha sabora Viciebska, prajšoŭ pa vulicach Lenina, Zamkavaja, Kirava i Citova. U duchoŭnaj pracesii ŭdzielničaje amal 60 čałaviek, siarod ich — navučency Viciebskaha duchoŭnaha vučylišča i prychadžanie roznych chramaŭ Viciebska. Niekatoryja iduć z małymi dziećmi.
Chresnamu chodu papiaredničaje lichtar i piać charuhvaŭ z vyjavaj abličča Isusa Chrysta, Božaj Maci i Mikałaja Cudatvorcy. Uznačalvaje jaho ijerej Alaksandr Kavaloŭ, kiraŭnik maładziožnaha pravasłaŭnaha bractva ŭ imia śviatoha praviednaha Iaana Kranštackaha, inśpiektar Viciebskaha duchoŭnaha vučylišča.
Jak paviedamiŭ Kavaloŭ, na praciahu čatyroch dzion vierniki buduć pieraadolvać u siarednim pa 25 km prykładna taho šlachu, pa jakim 100 hadoŭ tamu nieśli śviatyja moščy Jefrasińni Połackaj. »Na hetym šlachu buduć niekatoryja znakavyja spynieńni, — adznačyŭ jon. — Tak, zaŭtra, 2 červienia, my pabyvajem u vioscy Užlacina, dzie naradziŭsia śviaščennapakutnik Mikałaj Viciebski (Akałovič). Zatym pryjdziem u viosku Łoŭša. Tut u noč z 2 na 3 červienia budzie adsłužana liturhija ŭ chramie Uśpieńnia Praśviatoj Baharodzicy, dzie 100 hadoŭ tamu načavali moščy śviatoj Jefrasińni. Liturhiju ŭznačalić vikarny jepiskap Piotr Drucki».
4 červienia chresny chod pryjdzie ŭ Połack, dzie adbudziecca malebien z žycharami horada na miescy sustrečy moščaŭ u 1910 hodzie, paśla čaho ŭdzielniki nakirujucca ŭ Spasa‑Jefrasińnieŭski manastyr.
Siońnia chresny chod spynicca ŭ škole vioski Staroje Siało. Usiaho chresnamu chodu treba pieraadoleć 100 km.
