Biełaruskija kankursanty buduć vystupać na piesiennym konkursie «Jeŭrabačańnie‑2010» u Osła pad nazvaj »3+2» i Robiert Uełs» («3+2» feat. Robert Wells). Ab hetym paviedamlaje aficyjny sajt konkursu «Jeŭrabačańnie».
Napiaredadni na scenie »Jeŭrabačańnia» ŭ Osła prajšła pieršaja repietycyja ŭdzielnikaŭ pieršaha paŭfinała. Biełarusy ŭpieršyniu pradstavili konkursny numar. Nahadajem, hurt »3+2» vystupić z kampazicyjaj Butterflies («Matylki»), muzyku da jakoj napisaŭ rasijski pradziusier Maksim Fadziejeŭ, słovy — polskaja paetesa Malka Čaplin. Akampaniravać biełaruskim kankursantam budzie suśvietna viadomy šviedski pijanist i kampazitar Robiert Uełs.
Pavodle infarmacyi aficyjnaha sajta konkursu, padčas pieršaj repietycyi pijanist ihraŭ na biełym rajali. Dziaŭčaty — udzielnicy hurtu byli ŭ bliskučych doŭhich sukienkach załatoha, siarebranaha i miednaha koleraŭ, mužčyny — u čornych kaściumach. Scena padčas vystupleńnia była zaciemniena, vykanaŭcy aśviatlalisia tolki pražektarami. U finale pieśni za śpinami ŭ dziaŭčat źjavilisia kryły matylkoŭ, a na scenu pačali padać kanfieci ŭ formie matylkoŭ. Dymavyja efiekty, jakija dapoŭniać vystupleńnie biełaruskich kankursantaŭ, buduć aprabavanyja na nastupnych repietycyjach.
Paśla repietycyi ŭdzielniki hurtu «3+2» dali pres‑kanfierencyju. Jany skazali, što hurt byŭ stvorany paśla ich udziełu ŭ prajekcie »Novyja hałasy Biełarusi», ale jašče da jaho źjaŭleńnia muzykanty byli znajomyja i navat siabravali. Konkursnuju kampazicyju jany nazvali aptymistyčnaj pieśniaj, jakaja, jak jany ličać, była napisana śpiecyjalna dla ludziej, što imknucca da lepšaha žyćcia, taksama jak matylki imknucca da sonca.
Nahadajem, u składzie hurtu «3+2» — Arciom Michalenka, siostry‑bliźniaty Alena i Ninel Karpovič, Julija Šyško i Jehiazar Farašan. «Jeŭrabačańnie‑2010» u Osła projdzie 25—29 maja. Biełaruskija kankursanty vystupiać u pieršym paŭfinale 25 maja.
