Žančyna viadzie akaŭnt pad nikam @gavriysha_mnogamama_. Sprečka pačałasia z taho, što jana pakazała, jak daje starejšamu synu (jamu 14 hadoŭ) hrošy na pachod ź dziaŭčynaj u kafe. Videa nabrała bolš za 860 tysiač prahladaŭ, kala 12 tysiač łajkaŭ i sotni kamientaryjaŭ. Ale ž mierkavańni nakont taho, ci dobra heta dla vychavańnia chłopčyka, padzialilisia.
«Zatoje budzie pavažać i kachać žančyn, a nie maciukać jak niekatoryja. Značyć tata prykład u siamji, jak treba stavicca da dziaŭčyny», — napisała adna z kamientatarak. Błohierka pahadziłasia: «Tata samy cudoŭny ŭ nas. Jon synu kaža: tvaja žančyna — tvajo ŭsio».
Jašče adna kamientatarka adznačyła, što vučyć svajho syna daryć dziaŭčynkam kvietki. Błohierka adkazała, što robić toje samaje: «I kali pasvaracca, zaŭsiody z prysmakami idzie mirycca».
Ale ž byli i tyja, chto ličyć, što chłopiec moh by zarabić hetyja hrošy, vykonvajučy niejkuju nietypovuju pracu doma: «A kali mama tupa praspansavała, to čamu heta navučyć?» Adna kamientatarka raspaviała, što jaje 15-hadovy syn, kab zarabić na padarunak na 8 Sakavika svajoj dziaŭčynie, dapamahaŭ tatu ŭ haražy.
Błohierka navat zapisała videa-adkaz:
— Praciahvajučy vašu dumku: heta značyć, kali ja jaho praspansavała, heta navučyć jaho nie pracavać, a ciahnuć ź mianie hrošy? Ale davajcie razhledzim vašu situacyju. Kali jon budzie vykonvać dla mamy nietypovuju pracu za hrošy, dyk čamu jaho heta navučyć? Usio žyćcio vykonvać prośby maci tolki za hrošy? To-bok, dapamohi nie budzie, a mnie treba budzie za kožnuju pracu syna zapłacić? Nie treba ŭ adnym učynku šukać niejki niehatyŭ i pradkazvać budučyniu maim dzieciam. Vychavańnie — heta sukupnaść mnohich faktaraŭ.
Žančyna taksama dadała, što i joj, i jaje mužu baćki niekali davali hrošy — i ich nie treba było adpracoŭvać. Ale ciapier užo jany jak darosłyja dzieci dapamahajuć svaim baćkam. Naprykład, kuplajuć zapčastki ŭ złamanuju mašynu, kab baćkam nie pryjšłosia tracić na heta svaju piensiju.
«Ja niekali taksama fundatarkaj była. A ciapier syn uładkavaŭsia na pracu, padzarablaje i ni ŭ jakuju hrošaj u mianie nie biare. Sam navat časam padkidvaje mnie na taksi. Jamu jašče niama 18 hadoŭ», — padzialiłasia ŭłasnym dośviedam jašče adna kamientatarka.
«A čamu ŭ ich niama adkaznaści pierad nami, mamami? Našy hrošy, zroblenyja potym i kryvioj, potym tak prosta tracić. U mianie takaja samaja situacyja. Kožny dzień daj i daj. Mnie nie škada, ale ja taksama chaču niešta kupić», — aburyłasia inšaja.
Było mierkavańnie, što chłopcu, pierš čym zaprašać dziaŭčynak na spatkańni, treba znajści sabie realnuju pracu. Ale błohierka adkazała, što ŭ jaje dziaciej budzie maksimalna ščaślivaje dziacinstva, a napracavacca jany za ŭsio žyćcio paśpiejuć. Inšaja kamientatarka adznačyła, što sama zabaraniała synu pracavać, pakul jon vučycca, bo jaho dypłom byŭ u pryjarytecie.
Źjaviŭsia ŭ kamientaryjach i kryk dušy: «Chočacca skazać usim baćkam z kamientaryjaŭ, jakija zmušajuć dziaciej zarablać sabie na spatkańni: nie rabicie składanaściaŭ dzieciam, navučyciesia narešcie zarablać dosyć dla siabie i svaich dziaciej».
A niechta navat chvalavaŭsia za asabistaje žyćcio chłopca ŭ budučym: «Nie daj Boh takuju śviakroŭ, pad łožkam u pieršuju šlubnuju noč budzie lažać».
Čytajcie taksama:
Chłopcy sa Śmiłavickaha kaledža sa stalovymi ružami ŭzarvali tyktok
Drama ŭ Minsku: dziaŭčynie padaryli 151 ružu nie taho pamieru
