Prapahandyst RT Kanstancin Prydybajła
«Zamiežny ahient ŚMI «Doždž» u čarhovy raz prademanstravała ŭzrovień svajho «prafiesijanalizmu», vydaŭšy ŭ efir niepravieranuju infarmacyju, jakaja apynułasia rozyhryšam», — napisaŭ 17 studzienia telehram-kanał «Minpravdy».
Kanał taksama apublikavaŭ frahmient efiru, u jakim Prydybajła raskazvaje «Daždžu» pra toje, što ŭ jahonym domie adklučyli aciapleńnie, z-za čaho jamu nibyta daviałosia hrecca kala manhała razam z susiedam. «Što zastavałasia rabić? My prosta adčynili akno ŭ kalidory, jon vynies svoj manhał, my pačali prosta hrecca la manhała, a jak inakš? Na vulicy choładna, vohnišča nie raźviadzieš», — zajaviŭ telekanału Prydybajła.
Sam prapahandyst prakamientavaŭ svajo zjaŭleńnie ŭ efiry «Daždžu» tak: «@tvrain vydaŭ moj, na kalency zrobleny, fejk i nie zmorščyŭsia. Ekstremisty šukali žychara Lipiecka, chto raskazaŭ by pra damy bieź ciapła. Ja vyrašyŭ telepartavacca tudy. Napisaŭ u ich bota, što tam typu hreŭsia z susiedam la manhała ŭ šmatpaviarchoviku. Jany heta pakazali».
Hałoŭny redaktar «Daždžu» Cichan Dziadko pryznaŭ, što telekanał vypuściŭ u efir niepravieranuju infarmacyju. «Što ž, heta prykraja historyja i prykraja pamyłka, jakuju my abmiarkujem u redakcyi — z tym, kab padobnaje nie paŭtarałasia», — napisaŭ Dziadko.
Taksama jon źviarnuŭ uvahu na toje, jakim sposabam prapahandyst vyrašyŭ dyskredytavać «Doždž»:
«Prydybajła nie prydumaŭ ničoha lepšaha, jak paviesialicca na temie ludziej, jakija zamiarzajuć u šerahu rasijskich rehijonaŭ — zamiarzajuć z-za taho, što hrošy byli nakiravanyja nie na ramont kamunikacyj, a na jaho, Prydybajły, zarobak. Što moža być viesialej, čym prydumać fejk pra ludziej, jakija zamiarzajuć u Lipiecku, praŭda?»
Avaryja ŭ Lipiecku, z-za jakoj bolš za 300 damoŭ zastalisia biez aciapleńnia, zdaryłasia ŭ noč na 13 studzienia. Adkaznyja słužby zafiksavali try praryvy na ciepłasietkach. Pa stanie na ranicu 15 studzienia, aciapleńnie było adnoŭlena ŭ bolšaści damoŭ.
Z pačatkam chaładoŭ u Rasii rehularna adbyvajucca kamunalnyja avaryi, jakija pakidajuć žycharoŭ bieź ciapła, vady i śviatła. Adklučeńni adbyvalisia, naprykład, u Varoniežy, Razani, Ciumieni, a taksama Jarasłaŭskaj i Leninhradskaj abłaściach. U pačatku studzienia ŭ padmaskoŭnym Padolsku ŭ vyniku praryvu ciepłatrasy biez aciapleńnia i haračaj vady zastalisia bolš za 170 šmatkvaternych damoŭ i balnica.
Čytajcie taksama:
Rasijski Nižni Noŭharad zatapiła kipieniem paśla praryvu truby. Paciarpieli 16 čałaviek
Jašče adzin rasijski horad zastaŭsia biez aciapleńnia
Błekaŭt u Maskvie: dziasiatki damoŭ zastalisia bieź śviatła i aciapleńnia ŭ 25-hradusny maroz
Žycharam Varonieža adklučyli aciapleńnie. A tam marazy pad minus 20°S
