Ałan Ruk, Sara Snuk, Alaksandr Skarshard, Brajan Koks, Nikałas Braŭn, Kiran Kałkin, Mećju Makfejden i Džej Śmit-Kemieran, łaŭreaty premii za najlepšy dramatyčny sieryjał «Naščadki». Fota: Ashley Landis / AP
U Łos-Andželesie adbyłasia 75-ja cyrymonija ŭručeńnia televizijnych pryzoŭ «Emi», jakaja była adkładzienaja na čatyry miesiacy z-za strajku supracoŭnikaŭ halivudskich studyj, piša Bi-bi-si.
U liku hałoŭnych łaŭreataŭ 2024 hoda byli telesieryjał «Naščadki» ab baraćbie pamiž členami ŭpłyvovaha kłana miedyjamahnataŭ, kamiedyjny sieryjał pra čykahski restaran «Miadźviedź» i mini-sieryjał «Hryźnia», jaki raspaviadaje pra varožaść dvuch vypadkova sustretych ludziej.
Adnoj z asnoŭnych padziej cyrymonii taksama stała prysudžeńnie «Emi» brytanskamu śpievaku Ełtanu Džonu. Jon atrymaŭ hety pryz za teleprahramu pad nazvaj Elton Live: Farewell From Dodger Stadium (pramuju tranślacyju svajho apošniaha kancerta ŭ Paŭnočnaj Amierycy ŭ ramkach raźvitalnaha tura).
Dla sera Ełtana hety pryz byŭ asabliva važny, bo ź jaho atrymańniem jon staŭ adnym z členaŭ ekskluziŭnaha kłuba EHOT, heta značyć ludziej,
jakija na praciahu karjery atrymali premii «Emi», «Hremi», «Oskar» i «Toni».
Akramia Ełtana Džona, hetym dasiahnieńniem mohuć pachvalicca tolki 18 čałaviek u historyi, u tym liku aktrysa Odry Chiepbiern, režysior, akcior i pradziusar Mieł Bruks, aktrysa Vupi Hołdbierh, kampazitar Endru Łojd Uebier i muzykant Džon Ledžend.
Zrešty, Ełtan Džon nie zmoh asabista pryjechać u ZŠA na cyrymoniju ŭručeńnia «Emi», pakolki niadaŭna pieranios apieracyju na kalenie.
Bolš za ŭsio pryzoŭ sabrali «Naščadki» (Succession). Jany byli pryznanyja najlepšym dramatyčnym sieryjałam, a Sara Snuk i Kiran Kałkin atrymali «Emi» jak najlepšyja dramatyčnaja aktrysa i akcior. Sieryjału taksama dastalisia pryzy za najlepšuju režysuru i scenar.
U minułym hodzie sieryjał «Naščadki» zaviaršyŭsia paśla čatyroch paśpiachovych siezonaŭ.
Atrymlivajučy svoj «Emi», aŭtar scenaryja brytaniec Džesi Armstronh zaŭvažyŭ, što natchnieńniem dla jaho sieryjała pasłužyła historyja siamji aŭstralijskaha miedyjamahnata Rupierta Mierdaka.
«Pra jaho [Mierdaka] ničoha nie mahu skazać, ale ja vielmi ŭdziačny za vielikadušnaść, jakuju prademanstravali ŭ dačynieńni da mianie padčas pracy ŭ hetaj krainie», — skazaŭ Armstranh.
Najlepšym kamiedyjnym sieryjałam byŭ pryznany «Miadźviedź» (Bear), a jakija syhrali ŭ im Džeremi Alen Uajt, a taksama aktrysa i akcior druhoha płana Ajo Edebiry i Eban Mos-Bakrak atrymali pryzy za najlepšuju akciorskuju hulniu.
Dla Edebiry heta ŭžo treci pryz, jaki jana atrymała za apošnija 10 dzion: da hetaha joj taksama prysudzili «Załaty Hłobus» i premiju «Vybar krytykaŭ».
U katehoryi mini-sieryjałaŭ lidziravała «Hryźnia» (Beef) vytvorčaści Netflix, hety sieryjał raspaviadaje pra surjozny kanflikt pamiž ludźmi, vypadkova sustretymi ŭ vyniku darožnaha incydentu.
Dźvie jaho hałoŭnyja zorki Styvien Jan i Ali Vonh atrymali pryzy za najlepšuju mužčynskuju i žanočuju rolu ŭ mini-sieryjale.
Uručeńnie premii «Oskar» projdzie ŭ noč na 11 sakavika.
Čytajcie taksama:
