Fota: royalmail.com
Brytanskaja paštovaja kampanija Royal Mail vypuskaje tematyčnuju kalekcyju marak, pryśviečanuju žanočamu pop-hurtu Spice Girls, jaki staŭ častkaj suśvietnaj pop-kultury 90-ch. Sioleta kalektyŭ adznačaje svajo 30-hodździe, paviedamlaje Bi-bi-si.
Sieryja składajecca z 15 marak z vyjavami ŭdzielnic hrupy i ich samych viadomych vystupaŭ minułych hadoŭ. U ich liku ŭručeńnie ŭznaharod Brit Awards u 1997 hodzie i cyrymonija zakryćcia łondanskich Alimpijskich hulniaŭ 2012 hoda.
Royal Mail rehularna vypuskaje kamplekty marak z nahody pamiatnych padziej abo ŭ honar znakamitych ludziej i piersanažaŭ: ad Devida Boŭi i miedźviedzianiaci Padynhtana da łondanskaj Alimpijady i sieryjału «Hulnia tronaŭ».
Na naviny pra toje, što ŭ hetym hodzie hetaha honaru ŭdastoilisia Spice Girls, sami ŭdzielnicy hrupy adreahavali svaim znakamitym słohanam: «heta Girl Power (žanočaja siła)!» Jany dadali, što i maryć pra takoje nie mahli, kali tolki sabralisia razam.
Fota: royalmail.com
Hurt Spice Girls staŭ suśvietnaj siensacyjaj dziakujučy debiutnamu sinhłu Wannabe 1996 hoda, za jakim nieŭzabavie źjaviŭsia albom Spice. Hetaja kružełka stała samym pradavanym albomam žanočaha hurta ŭ historyi muzyki, a ich słohan «Girl Power» — papularnym simvałam fieminizmu.
Paśla, pradaŭšy bolš za 100 miljonaŭ kopij usich svaich albomaŭ pa ŭsim śviecie, Spice Girls stali ŭ cełym samaj paśpiachovaj žanočaj hrupaj u śviecie.
Spice Girls źjavilisia na śviet u siaredzinie 1990-ch u vyniku prasłuchoŭvańniaŭ, arhanizavanych siamjoj muzyčnych pradziusaraŭ. Tyja chacieli stvaryć žanočuju alternatyvu papularnym u toj čas boj-bendam, takim jak Take That i East 17, pryčym kožnaja z udzielnic, pa ich zadumcy, pavinna była ŭvasablać peŭnuju jakaść. Tak źjavilisia psieŭdanimy «Rudaja», «Spartyŭnaja», «Šykoŭnaja», «Strohaja» i «Bebi».
Fota: royalmail.com
Džery Chaliŭeł, Miełani Čyschołm, Viktoryja Adams (ciapier Bekchem), Miełani Braun i Ema Bantan byli adabrany z prykładna 400 kankursantak.
Ale staŭšy kalektyvam, jany chutka rasčaravalisia ŭ svaich stvaralnikach, znajšli novych mieniedžaraŭ i padpisali kantrakt z hukazapisvalnym hihantam Virgin Records, z čaho i pačaŭsia ich šlach da słavy.
Ahułam jany zapisali dzieviać chitoŭ, jakija trapili na pieršaje miesca brytanskich čartaŭ. U ich liku Say You'll Be There, 2 Become 1, Who Do You Think You Are, Spice Up Your Life i Viva Forever.
Fota: royalmail.com
Jany prypynili svaju pracu ŭ 2020 hodzie, ale z tych časoŭ uźjadnalisia niekalki razoŭ dziela kancertaŭ.
Spice Girls stali tolki šostym muzyčnym hurtom, jakim Royal Mail pryśviaciła sieryju marak. Da ich byli The Beatles u 2007 hodzie, Pink Floyd u 2016 hodzie, Queen u 2020 hodzie, The Rolling Stones u 2022 hodzie i Iron Maiden u 2023 hodzie.
Viktoryja «Poš» («Šykoŭnaja») Bekchem. Fota: royalmail.com
«Z taho času, jak hrupa sfarmavałasia ŭ 1994 hodzie, Spice Girls byli siłaj, ź jakoj niemahčyma nie ličycca. My z honaram šanujem samuju paśpiachovuju žanočuju muzyčnuju hrupu z usich, što my viedajem, i nie tolki z-za jaje muzyki, ale i z-za ŭpłyvu na mnohija aśpiekty našaha žyćcia», — zajaviŭ pradstaŭnik Royal Mail Devid Hołd.
Marki pastupiać u šyroki prodaž 11 studzienia.
Tryumfalnaje viartańnie žančyn padčas zakryćcia Alimpijady ŭ Łondanie
Čytajcie taksama:
U konkursie na najlepšuju paštovuju marku hoda sioleta znoŭ pieramahli siłaviki
Kultavy muzyčny hurt znoŭ abjaviŭ pra raspad
Popyt na viniłavyja kružełki ŭ Brytanii dasiahnuŭ piku z 1990 hoda
