Fota: vecteezy
U daśledavańni, apublikavanym u časopisie Animal Connections u kastryčniku 2021 hoda, havorycca, što heta moža być prykmietaj pavyšeńnia kancentracyi. Daśledčyki praviali papiaredniaje daśledavańnie, u jakim u adnym pakoi jany pakłali sabačyja cacki. Uładalniki sabak, jakija znachodzilisia ŭ inšym pakoi, pavinny byli paprasić svaich hadavancaŭ prynieści peŭnuju cacku, tolki nazyvajučy jaje ŭhołas biez anijakich inšych padkazak. Navat paśla troch miesiacaŭ navučańnia bolšaść sabak nie mahli hetaha zrabić. Adnak byli i tyja, chto moh heta zrabić — jany byli paznačanyja jak GWL (Gifted Word Learner, što možna pieravieści jak «talenavityja vučni, jakija navučajucca słovam»).
Vunderkindy z hrupy GWL nachilali hałavu nabok u 43% vypadkaŭ, kali čuli, što ich uładalniki prosiać peŭnuju cacku. U toj ža čas inšyja «siaredniestatystyčnyja» sabaki nachilali hałavu tolki ŭ 2% vypadkaŭ. Daśledčyki kažuć, što vierahodna isnuje ŭzajemasuviaź pamiž pośpiecham u zdabyvańni nazvanaj cacki i častymi nachiłami hałavy, kali sabaka čuje nazvu kankretnaj cacki.
Śćviardžajecca, što heta było pieršaje daśledavańnie, jakoje razhladała pavodziny sabak pry nachile hałavy; ale daśledčyki adznačajuć pry hetym, što razhladali hetuju źjavu ŭ vielmi kankretnaj situacyi. Takim čynam, nie varta rabić adnaznačnaj vysnovy, što tolki «talenavityja sabaki, jakija navučajucca słovam», buduć nachilać hałavu ŭ inšych situacyjach, jakija nie byli pravierany ŭ apisanym daśledavańni.
Vydańnie Howstuffworks adznačaje, što mohuć być i inšyja pryčyny takich pavodzinaŭ, i prapanuje spačatku bolš padrabiazna razhledzieć toje, jak sabaka bačyć śviet. Sabačy zrok, jak ni dziŭna, pačynajecca z… nosa. Padoŭžanaja morda niekatorych parod moža pieraškadžać zroku z peŭnych vuhłoŭ, tamu vaš hadavaniec moža nachilać hałavu, kab lepš razhladzieć što-niebudź — asabliva kali heta tvar čałavieka. Daśledavańni pakazali, što sabaki vykarystoŭvajuć vizualnyja sihnały, kab pračytać vyrazy tvaru ludziej, sprabujučy lepš zrazumieć,ci ščaślivyja my, ci sumnyja, ci źbirajemsia razdavać pačastunki.
Ale ž, viadoma, nie va ŭsich sabak doŭhija mordy. Inšaje tłumačeńnie moža być źviazana z tym, jak sabaki naładžvajucca na huki, jakija jany čujuć. Sabačy słych udvaja bolš adčuvalny, čym słych čałavieka, choć vastrynia słychu moža adroźnivacca ŭ zaležnaści ad parody i ŭzrostu.
Kali sabaki ŭłoŭlivajuć šum vyšejšaj tanalnaści, jany mohuć nachilać hałavu, kab lepš spraŭlacca z napłyvam hukavych chval. U pryvatnaści sabaki vykarystoŭvajuć končyki vušej jak spadarožnikavyja anteny, ruchajučy imi, kab lepš čuć huki, jakija vydaje čałaviek.
Akramia taho, u sabak jość śpiecyjalnyja myšcy, jakija dapamahajuć im apracoŭvać huki ŭ siarednim vuchu. Hetyja myšcy kirujucca častkaj stvała mozhu, viadomaj jak nucleus ambiguus, jakaja taksama rehuluje mimiku, pozirk, vakalizacyju i ruchi hałavy. To ž miły nachił hałavy moža być ničym inšym, jak refleksam, kali sabaka zasiarodžvajecca na huku.
Fota: vecteezy
I, narešcie, kali nachił hałavy vyhladaje tak miła, što pryciahvaje dadatkovuju ŭvahu, to heta, biezumoŭna, bonus dla sabaki. Niekatoryja śpiecyjalisty pa pavodzinach žyvioł śćviardžajuć, što heta vyvučanaja kamunikacyja, i nazyvajuć hetuju prajavu «sacyjalnym nachiłam hałavy». Kali sabaka nachilaje hałavu ŭ adkaz na zvarot čałavieka, heta, tak by mović, sposab «razmovy» sabaki. I kali my na heta adkazvajem pachvałoj abo inšymi stanoŭčymi emocyjami — abo ŭvohule pačastunkam! — tady bolš vierahodna, što nachileńnie hałavy paŭtorycca.
I, badaj, samaje važnaje. Choć sabaka, jaki nachilaje hałavu, i vyhladaje niejmavierna miłym, ale kali heta adbyvajecca zanadta časta, heta moža sihnalizavać ab miedyčnych prablemach. Nadta časta nachilenaja hałava moža aznačać vušnuju infiekcyju, zapaleńnie abo inšuju prablemu. Tamu kali vy bačycie, što vaš sabaka pavodzić siabie dziŭna — nieadkładna źviarniciesia da vieterynara.
Čytajcie taksama:
Usie sabaki dobryja — i heta nijak nie źviazana ź ich parodaj
Kryčyš na sabaku? Raskazvajem, čamu heta biessensoŭna i jak lepš dziejničać
